ທ່ານ ຕຽງສະໝອນ ພອນປະເສີດ ເຈົ້າເມືອງໆວຽງພູຄາ ແຂວງຫຼວງນ້ຳທາ ລາຍງານໃຫ້ຮູ້ວ່າ: ເຫດອຸທົກໄພນ້ຳຖ້ວມ ເຂດບ້ານນ້ຳແອ່ງ ເມືອງວຽງພູຄາ ໃນວັນທີ 12 ກໍລະກົດ ທີ່ຜ່ານມານັ້ນ ຍ້ອນເກີດມີສະພາບຝົນຕົກໜັກ ປະລິມານນ້ຳຝົນຫຼາຍ ເຮັດໃຫ້ດິນເຊາະເຈື່ອນ, ຕົ້ນໄມ້ໄຫຼມາຄ້າງຢູ່ຂົວຂ້າມນ້ຳແອ່ງ ເຮັດໃຫ້ນ້ຳໄຫຼບໍ່ສະດວກ ຈຶ່ງລົ້ນຖ້ວມເສັ້ນທາງ R3 ແລະ ເຂດບ້ານນໍ້າແອ່ງຢ່າງກະທັນຫັນ ເຮັດໃຫ້ເຮືອນຊານ, ການຜະລິດ ແລະ ຊັບສິນຂອງພໍ່-ແມ່ປະຊາຊົນເສຍຫາຍ1 ຕື້ກວ່າກີບ.

ຜ່ານການລົງເກັບກຳຂໍ້ມູນ ຂອງຄະນະຮັບຜີດຊອບ ຫ້ອງການທີ່ກ່ຽວຂ້ອງຂັ້ນເມືອງ ໃຫ້ຮູ້ວ່າ: ບ້ານນ້ຳແອ່ງ ມີ 112 ຫຼັງຄາເຮືອນ, ມີພົນ ລະເມືອງ 525 ຄົນ, ຍິງ 245 ຄົນ. ອຸທົກກະໄພຄັ້ງນີ້, ມີເຮືອນທີ່ໄດ້ຮັບຜົນກະທົບ ຖືກນ້ຳຖ້ວມ  51 ຫຼັງຄາ, ຈໍານວນ​ພົນ​ເມືອງ 255 ຄົນ.ໃນນີ້, ມີເຮືອນໄຫຼນ້ຳ  2 ຫຼັງຄາ, ເຂົ້າ​ເປືອກ 5 ​ໂຕນ, ເຂົ້າ​ສານ 178 ​ເປົາ, ລົດໃຫຍ່  1 ຄັນ, ລົດໄຖນາ 4 ຄັນ, ລົດຈັກ 8 ຄັນ, ໂຮງສີເຂົ້າ 3 ເຄື່ອງ ແລະ ຈັກສູບ​ນໍ້າ 10 ​ເຄື່ອງ; ເນື້ອທີ່ນາ ເສຍຫາຍ ປະມານ 9 ເຮັກຕາ, ຊົນລະປະທານ ເປເພ 1 ແຫ່ງ; ມີສັດລ້ຽງ ຕາຍ ແລະ ສູນຫາຍ ລວມມີ: ຄວາຍ, ງົວ, ໝູ, ແບ້ ແລະ ສັດປີກຈຳນວນໜຶ່ງ  ລວມມູນຄ່າເສຍຫາຍທັງໝົດ ປະມານ 1 ຕື້ ກວ່າກີບ.

ປັດຈຸບັນ, ເມືອງວຽງພູຄາ ໄດ້ແຕ່ງຕັ້ງຄະນະຮັບຜິດຊອບຂັ້ນເມືອງ ແລະ ຂັ້ນບ້ານ ເພື່ອເກັບກໍາຂໍ້ມູນສະພາບຄວາມເປັນຈິງເພີ່ມເຕີມ  ແລະ ປຸກລະດົມບັນດາອົງການຈັດຕັ້ງຂັ້ນເມືອງ ແລະ ກໍາລັງ ປກຊ-ປກສ ຊ່ວຍເຫຼືອປະຊາຊົນຟື້ນຟູສະຖານທີ່ເຮືອນຊານໃຫ້ກັບຄືນມາເປັນສະ ພາບປົກກະຕິໂດຍໄວ, ພ້ອມທັງສຸມໃສ่ການສະກັດກັ້ນ ແລະ ຕ້ານພະຍາດຕ່າງໆ ທີ່ອາດຈະເກີດຂຶ້ນຕໍ່ກັບປະຊາຊົນຢ່າງທັນການ. ສຳລັບການຊ່ວຍເຫຼືອໃນເບື້ອງຕົ້ນ ແມ່ນໄດ້​ລະດົມ​ທຸກ​ພາກສ່ວນ ​ພາຍ​ໃນ​ເມືອງ ​ແລະ ​ແຂວງ ​ໃຫ້ການ​ຊ່ວຍ​ເຫຼືອແລ້ວ.