ກອງບັນຊາການທະຫານ ແຂວງວຽງຈັນ ຈັດພິທີປາຖະກະຖາ ວັນຄ້າຍວັນເກີດ ປະທານ ສຸພານຸວົງ ຄົບຮອບ 111 ປີ (ວັນທີ 13 ກໍລະກົດ 1909-13 ກໍລະກົດ 2020), ປາຖະກະຖາໂດຍ ທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນ, ມີການນຳຂັ້ນແຂວງ, ເມືອງ, ພະນັກງານຫຼັກແຫຼ່ງຈາກພະແນກການ, ທະຫານ, ຕຳຫຼວດອ້ອມຂ້າງແຂວງ ເຂົ້າຮ່ວມ.

ທ່ານ ຄຳພັນ ສິດທິດຳພາ ໄດ້ຍົກໃຫ້ເຫັນປະຫວັດການກຳເນີດ, ການເຄື່ອນໄຫວຂອງ ປະທານ ສຸພານຸວົງ ນັບແຕ່ນ້ອຍຫາໃຫຍ່ ກ້າວຂຶ້ນເປັນຜູ້ນຳສູງສຸດຂອງຊາດລາວເຮົາ ທີ່ມີມູນເຊື້ອນ້ຳໃຈຮັກຊາດຮັກບ້ານເກີດເມືອງນອນ, ຍອມເສຍສະລະຜົນປະໂຫຍດສ່ວນຕົວ ເພື່ອຜົນປະໂຫຍດສ່ວນລວມ, ທ່ານແມ່ນຜູ້ໜຶ່ງທີ່ມີຄວາມຈົງຮັກພັກດີຕໍ່ອຸດົມການປະຕິວັດຢ່າງເດັດຂາດ, ຕໍ່ສູ້ຢ່າງກ້າແກ່ນພິລະອາດຫານ, ມີຄວາມເອື້ອເຟື້ອເພື່ອແຜ່ຮັກແພງມິດສະຫາຍຢ່າງແທ້ຈິງ, ດຳລົງຊີວິດດ້ວຍຄວາມປອດໃສ, ຂາວສະອາດ, ຊື່ສັດບໍລິສຸດ, ມີທັດສະນະຫຼັກໝັ້ນ, ມີນ້ຳໃຈເສຍສະລະອັນສູງສົ່ງເພື່ອຊາດເພື່ອປະຊາຊົນ.

ປະທານ ສຸພານຸວົງ ໄດ້ເດີນຕາມເສັ້ນທາງຂອງພັກ ກາຍເປັນສິ່ງກະຕຸກຊຸກຍູ້ປຸກລະດົມດຶງດູດປະຊາຊົນບັນດາເຜົ່າ, ຊັ້ນຄົນຕ່າງໆຢູ່ພາຍໃນ ແລະ ຕ່າງປະເທດ, ຕະຫຼອດໄລຍະການເຄື່ອນໄຫວປະຕິວັດ ທ່ານ ປະທານ ສຸພານຸວົງ ໄດ້ເປັນປະທານປະເທດຄົນທຳອິດຂອງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຄັນທຸງ, ເຕົ້າໂຮມຄວາມສາມັກຄີປວງຊົນລາວທັງຊາດ ແລະ ບັນຫາສຳຄັນອື່ນໆ ເຊິ່ງພວກເຮົາຈະຕ້ອງໄດ້ພ້ອມກັນສືບຕໍ່ເພີ່ມພູນຄູນສ້າງ ແລະ ຮໍ່າຮຽນເອົາແບບຢ່າງຄຸນງາມຄວາມດີຂອງ ປະທານ ສຸພານຸວົງ ໄປໝູນໃຊ້ເຂົ້າໃນໜ້າທີ່ວຽກງານໃຫ້ໄດ້ຮັບຜົນສຳເລັດ ແລະ ມີຜົນງານໃຫຍ່ຫຼວງຂຶ້ນກວ່າເກົ່າ.

ນອກນັ້ນ, ໃນພີທີ ຍັງໄດ້ມີການປາຖະກະຖາ ວັນປ່ອຍປາ ແລະ ອະນຸລັກສັດນໍ້າ-ສັດປ່າແຫ່ງຊາດ ວັນທີ 13 ກໍລະກົດ ຂອງທຸກໆປີ ແນໃສ່ເພື່ອເຮັດໃຫ້ພະນັກງານຫຼັກແຫຼ່ງ ຕະຫຼອດເຖິງປະຊາຊົນບັນດາເຜົ່າ ໄດ້ຮັບຮູ້ ແລະ ເຂົ້າໃຈກ່ຽວກັບ ການອານຸລັກສັດນ້ຳ ແລະ ສັດປ່າ ໃຫ້ມີຄວາມອຸດົມສົມບູນ ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການ ທັງເປັນການປູກຈິດສຳນຶກໃຫ້ພະນັກງານ, ພໍ່-ແມ່ປະຊາຊົນ ຕະຫຼອດຮອດເດັກນ້ອຍຜູ້ສືບທອດໃຫ້ຮູ້ເຖິງຄວາມໝາຍ-ຄວາມສຳຄັນຂອງວັນດັ່ງກ່າວ ເພື່ອເປັນການສົ່ງເສີມ, ຮັກສາຊີວະນາໆພັນ ເປັນຕົ້ນແມ່ນ ສັດນ້ຳ-ສັດປ່າ ຄືນຄວາມອຸດົມສົມບູນໃຫ້ແກ່ທຳມະຊາດ, ໄດ້ມີຄວາມຍືນຍົງເປັນບ່ອນສ້າງແຫຼ່ງສະບຽງອາຫານໃຫ້ໄດ້ຫຼາຍ ແລະ ຕອບສະໜອງໃຫ້ໄດ້ຕາມຄວາມຮຽກຮ້ອງຕ້ອງການຂອງຄົນເຮົາ ໃຫ້ນັບມື້ນັບດີຂຶ້ນເລື້ອຍໆ.