ກອງສິລະປະກອນ ກົມໂຄສະນາ-ອົບຮົມ ກົມໃຫຍ່ການເມືອງ ກະຊວງ ປກສ ໄດ້ຝຶກຊ້ອມໃຫຍ່ເພື່ອກະກຽມຮັບໃຊ້ ກອງປະຊຸມໃຫຍ່ ຄັ້ງທີ V ຂອງ ອົງຄະນະພັກກະຊວງ ປກສ ທີ່ຈະຈັດຂຶ້ນໃນຕໍ່ໜ້ານີ້, ເຂົ້າຮ່ວມໂດຍ ພົຈວ ຄໍາສາຍ ຈັນທະວົງ ຮອງຫົວໜ້າກົມໃຫຍ່ການເມືອງ ປກສ ທັງເປັນ ຮອງຫົວໜ້າອະນຸກໍາມະການຂະບວນການຂໍ່ານັບຮັບຕ້ອນ ກອງປະຊຸມໃຫຍ່ ຄັ້ງທີ V ຂອງ ອົງຄະນະພັກກະຊວງ ປກສ ແລະ ມີຄະນະຮັບຜິດຊອບກົມກອງອ້ອມຂ້າງ ເຂົ້າຮ່ວມ.

ພັທ ວັນນະສັກ ທອງອຸໄລ ຮອງຫົວໜ້າກົມໂຄສະນາ-ອົບຮົມ ໃຫ້ຮູ້ວ່າ:

ການຝຶກຊ້ອມສະແດງສິລະປະ ກໍຄື ບົດຟ້ອນ ແລະ ຮ້ອງເພງ ແມ່ນໄດ້ເລີ່ມຝຶກຊ້ອມແຕ່ຕົ້ນເດືອນກໍລະກົດ ເປັນຕົ້ນມາ ໂດຍປະກອບມີບົດຟ້ອນຈໍານວນ 6 ບົດຟ້ອນ ຄື: ບົດຟ້ອນເຕົ້າໂຮມທຸງໄຊ, ບົດຟ້ອນທໍາມະຊາດບ້ານນາ, ບົດຟ້ອນຊີວິດໃໝ່ເຜົ່າມົ້ງ, ບົດຟ້ອນຕໍ່າເຂົ້າ, ບົດຟ້ອນບຸນເລີຣ ແລະ ບົດຟ້ອນຕໍາຫຼວດລາວ; ມີ 10 ບົດເພງ ຄື: ບົດເພງລຸງໄກສອນໃນດວງໃຈ, ໃຕ້ຮົ່ມທຸງສີແດງ, ຕໍາຫຼວດຍຸກໃໝ່, ບ້ານນ້ອງພວມພັດທະນາ, ນໍ້າຕາແມ່, 5 ເມສາ ໝັ້ນຍືນ, ປກສ ມີໄຊ, ຊົມເຊີຍກອງປະຊຸມໃຫຍ່, ລໍາເດີນສຽງຈາກໜຸ່ມຕໍາຫຼວດລາວ ແລະ ລໍາຜູ້ໄທ (ມູນເຊື້ອ ປກສ ).

ມາຮອດປັດຈຸບັນ, ການສະແດງລາຍການຕ່າງໆ ແມ່ນມີຄວາມພ້ອມ 100% ທີ່ຈະຮັບໃຊ້ສະແດງໃນກອງປະຊຸມໃຫຍ່ ຄັ້ງທີ V ຂອງ ອົງຄະນະພັກກະຊວງ ປກສ ທີ່ຈະຈັດຂຶ້ນໃນຕໍ່ໜ້ານີ້ ໃຫ້ມີບັນຍາກາດຟົດຟື້ນ ແລະ ເບີກບານມ່ວນຊື່ນ.