ໃນໄລຍະ 6 ເດືອນຕົ້ນປີ 2020, ທົ່ວປະເທດມີອັກຄີໄພເກີດຂຶ້ນທັງໝົດ 116 ຄັ້ງ ເຊິ່ງສ້າງຄວາມເສຍຫາຍໃຫ້ແກ່ຊີວິດ, ຊັບສິນຂອງລັດລວມໜູ່, ປະຊາຊົນພົນລະເມືອງ ແລະ ສ້າງຄວາມບໍ່ສະຫງົບສຸກໃຫ້ແກ່ສັງຄົມ, ໃນນັ້ນ ພົ້ນເດັ່ນກວ່າໝູ່ແມ່ນຢູ່ແຂວງສາລະວັນ.

ພັທ ວິລະພອນ ວົງຄໍາມຸນຕີ ຫົວໜ້າກົມຕໍາຫຼວດສະກັດກັ້ນ ແລະ ຕ້ານອັກຄີໄພ ກົມໃຫຍ່ຕໍາຫຼວດ ກະຊວງ ປກສ ໃຫ້ສໍາພາດໃນວັນ 23 ກໍລະກົດ 2020 ວ່າ:

ໃນໄລຍະ 6 ເດືອນຕົ້ນປີ 2020, ທົ່ວປະເທດມີອັກຄີໄພເກີດຂຶ້ນທັງໝົດ 116 ຄັ້ງ ເຊິ່ງສ້າງຄວາມເສຍຫາຍໃຫ້ແກ່ຊີວິດ, ຊັບສິນຂອງລັດລວມໝູ່, ປະຊາຊົນພົນລະເມືອງ ແລະ ສ້າງຄວາມບໍ່ສະຫງົບສຸກໃຫ້ແກ່ສັງຄົມ. ໃນນີ້, ເຮັດໃຫ້ມີຜູ້ເສຍຊີວິດ 6 ຄົນ, ບາດເຈັບ 3 ຄົນ, ເຮືອນໄໝ້ທັງໝົດ 56 ຫຼັງ, ເຮືອນຖືກລວກ 16 ຫຼັງ, ຫໍພັກ 10 ຫ້ອງ, ຫ້ອງນອນ 2 ຫ້ອງ, ກຸດຕິວັດ 9 ຫຼັງ, ຮ້ານຂາຍເຄື່ອງ 4 ຮ້ານ, ຮ້ານອາຫານ 1 ຮ້ານ, ຮ້ານສ້ອມແປງລົດຈັກ 1 ຮ້ານ, ຮ້ານຕັດຫຍິບ 1 ຮ້ານ, ໂຮງສີເຂົ້າ 1 ຫຼັງ, ໂຮງງານ 3 ຫຼັງ, ໂຮງເຟີນີເຈີ 1 ຫຼັງ, ລົດໃຫຍ່ 14 ຄັນ, ລົດໄຖນາ 3 ຄັນ, ລົດຈັກ 9 ຄັນ, ສວນໝາກພຸກ 1 ແຫ່ງ, ສວນຢາງພາລາ 5 ເຮັກຕາ, ສວນຊາ 51 ເຮັກຕາ, ສວນໝາກແໜ່ງ 51 ເຮັກຕາ, ໄມ້ 579 ແມັດກ້ອນ ແລະ ອື່ນໆອີກຈໍານວນໜຶ່ງ ລວມມູນຄ່າເສຍຫາຍທັງໝົດ 77.333.500.000 ກີບ.

ສ່ວນສາເຫດແມ່ນຍ້ອນໄຟຟ້າລັດວົງຈອນ 57 ຄັ້ງ, ຂາດສະຕິ 25 ຄັ້ງ, ຂາດຄວາມຮັບຜິດຊອບ 17 ຄັ້ງ, ໄຟທໍາມະຊາດ 2 ຄັ້ງ, ຜິດພາດທາງດ້ານເຕັກນິກ 1 ຄັ້ງ ແລະ ບໍ່ຮູ້ສາເຫດ 5 ຄັ້ງ.

ໃນນັ້ນ, ພົ້ນເດັ່ນກວ່າໝູ່ແມ່ນຢູ່ແຂວງສາລະວັນ ມູນຄ່າເສຍຫາຍ 38.472.700.000 ກີບ ໂດຍແມ່ນເຫດໄຟໄໝ້ໂຮງງານ 1 ຫຼັງ ສາເຫດແມ່ນຄົນລັກວາງເພີງ, ຮອງລົງມາແມ່ນ ແຂວງຊຽງຂວາງ ມູນຄ່າເສຍຫາຍມີ 13.725.000.000 ກີບ, ໄຊຍະບູລີ ມີຜົນເສຍຫາຍ 43.500.000 ກີບ ແລະ ນະຄອນຫຼວງວຽງຈັນ ມູນຄ່າເສຍຫາຍ 3.000.000.000 ກີບ.

ທິດທາງແຜນການ 6 ເດືອນທ້າຍປີ, ກົມຕຳຫຼວດສະກັດກັ້ນ ແລະ ຕ້ານອັກຄີໄພ ຈະສືບຕໍ່ເຂົ້າປະຈໍາການກຽມພ້ອມຕະຫຼອດ 24 ຊົ່ວໂມງ ເມື່ອມີອັກຄີໄພເກີດຂຶ້ນແມ່ນໃຫ້ສົມທົບກັບ ພະແນກສະກັດກັ້ນ ແລະ ຕ້ານອັກຄີໄພ ໃນຂອບເຂດທົ່ວປະເທດໃຫ້ວ່ອງໄວທັນເວລາ, ສືບຕໍ່ຝຶກຊ້ອມຍຸດທະວິທີສູ້ຮົບມອດໄຟ, ການນຳໃຊ້ພາຫະນະອຸປະກອນມອດໄຟ ແລະ ກູ້ໄພ ໃຫ້ພະນັກງານ-ນັກຮົບມີຄວາມຄ່ອງແຄ້ວ, ຊໍານິ-ຊໍານານ ແລະ ມີປະສິດທິພາບ.