ຖືກຈັບໃນລະຫວ່າງນັດສົ່ງຢາບ້າ 2.000 ເມັດ

0
251

ໃນກາງເດືອນກໍລະກົດ 2020, ພົນລະເມືອງດີຢູ່ຂອບເຂດເທດສະບານ ເມືອງໄຊຍະບູລີ ແຈ້ງເຈົ້າໜ້າທີ່ໃຫ້ກວດກາການເຄື່ອນໄຫວຂອງກຸ່ມຄົນຈໍານວນໜຶ່ງ ທີ່ອາດເຄື່ອນໄຫວຄ້າຂາຍສິ່ງທີ່ຜິດກົດໝາຍ, ຈາກນັ້ນ; ໄດ້ຕິດຕາມການເຄື່ອນໄຫວນໍາໄປສູ່ການຈັບຜູ້ຖືຫາຄ້າຂາຍຢາເສບຕິດ 2 ຄົນ, ໃນລະຫວ່າງນັດສົ່ງພ້ອມຢາບ້າ 2.000 ເມັດ.

ເຈົ້າໜ້າທີ່ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ຫ້ອງຕໍາຫຼວດ ປກສ ແຂວງ ໄຊຍະບູລີ ໃຫ້ຮູ້ວ່າ: ພາຍຫຼັງໄດ້ຮັບການແຈ້ງໃຫ້ຕິດຕາມການເຄື່ອນໄຫວຂອງກຸ່ມຄົນທີ່ອາດຄ້າຂາຍສິ່ງທີ່ຜິດກົດໝາຍ, ໃນວັນທີ 16 ກໍລະກົດ 2020 ໄດ້ແຕ່ງຕັ້ງກໍາລັງວິຊາສະເພາະອອກເຄື່ອນໄຫວກວດກາ, ຕິດຕາມ ແລະ ໄດ້ພົບເຫັນເປົ້າໝາຍ 2 ຄົນ ກໍາລັງນັດສົ່ງຢາເສບຕິດ.

ດັ່ງນັ້ນ, ຈຶ່ງສະແດງຕົວຈັບ ທ້າວ ຢັງເຮີ ອາຍຸ 23 ປີ ແລະ ທ້າວ ຜັງລີເຈິຫວັງ ອາຍຸ 17 ປີ, ທັງ 2 ຢູ່ບ້ານຫ້ວຍຊໍາອໍ້ ເມືອງ ແລະ ແຂວງໄຊຍະບູລີ ພ້ອມຢາບ້າ 1 ຖົງ ມີ 2.000 ເມັດ ລົດຈັກ 2 ຄັນ ຍີ່ຫຍໍ້ເວບ 100 ສີດໍາແດງບໍ່ມີ ໝາຍເລກທະບຽນ, ລົດຈັກຍີ່ຫຍໍ້ຮອດດ້າເວບ 110 ໄອ ສີແດງດໍາ ໝາຍເລກທະບຽນ ຈດ 1226 ໄຊຍະບູລີ ແລະ ໂທລະສັບ 2 ເຄື່ອງ.