ວິທະຍາຄານຕໍາຫຼວດປະຊາຊົນ (ວຕປ) ກະຊວງ ປກສ ໄດ້ປິດຊຸດຮຽນລະບົບຕໍ່ເນື່ອງປະລິນຍາຕີ ຮຸ່ນທີ XIII ໃນວັນທີ 14 ສິງຫາ 2020 ເປັນປະທານ ແລະ ມອບໃບປະກາສະນີຍະບັດໂດຍ ພັອ ປອ ວົງເຊໂດນ ພັນທະແກ້ວ ຫົວໜ້າອໍານວຍການ ວຕປ, ເຂົ້າຮ່ວມມີ ພົຈວ ປອ ສຸວັນນີ ສີສຸພາບມີໄຊ ຮອງຫົວໜ້າກົມໃຫຍ່ການເມືອງ ປກສ, ມີຕາງໜ້າກົມນະໂຍບາຍ, ກົມຈັດຕັ້ງພະນັກງານ, ຄູ-ອາຈານ, ນັກສຶກສາ ເຂົ້າຮ່ວມ.
ພັທ ປອ ຄຳຕັນ ບຸນທອນອຸໄທ ຫົວໜ້າຫ້ອງການ ວຕປ ກ່າວວ່າ:
ຊຸດຮຽນລະບົບຕໍ່ເນື່ອງປະລິນຍາຕີ ຮຸ່ນທີ XIII ໃຊ້ເວລາຮຽນ 2 ປີ ເຊິ່ງໄດ້ເປີດຮຽນໃນວັນທີ 5 ກັນຍາ 2018 ເປັນຕົ້ນມາ, ມີນັກສຶກສາຈໍານວນ 63 ສະຫາຍ ຍິງ 2 ສະຫາຍ ທີ່ມາຈາກກົມກອງອ້ອມຂ້າງກະຊວງ, ກອງບັນຊາການ ປກສ ແຂວງ, ກະຊວງປ້ອງກັນປະເທດ.
ການຮໍ່າຮຽນໄດ້ລົງເລິກ 2 ຂະແໜງການ ຄື: ຂະແໜງປ້ອງກັນເສດຖະກິດ ແລະ ຂະແໜງສືບສວນ-ສອບສວນອາຍາ ລວມມີ 1.440 ຊົ່ວໂມງ, 66 ໜ່ວຍກິດ, ໂດຍແບ່ງອອກເປັນ 2 ໄລຍະຮຽນ ມີ 4 ໝວດວິຊາ ຄື: ໝວດວິຊາເລືອກ ມີ 2 ໜ່ວຍກິດ 64 ຊົ່ວໂມງ, ໝວດວິຊາຄວາມຮູ້ທົ່ວໄປ ມີ 17 ໜ່ວຍກິດ 264 ຊົ່ວໂມງ, ໝວດວິຊາຄວາມຮູ້ພື້ນຖານວິຊາສະເພາະ ມີ 16 ໜ່ວຍກິດ 256 ຊົ່ວໂມງ ແລະ ໝວດວິຊາສະເພາະ ມີ 18 ໜ່ວຍກິດ 352 ຊົ່ວໂມງ ລວມທັງການລົງຝຶກງານຕົວຈິງ 3 ເດືອນ.
ນັກສຶກສາໄດ້ນໍາໃຊ້ຮູບການຂຽນບົດໂຄງການຈົບຊັ້ນ ແລະ ຈັດຕັ້ງສອບເສັງຢ່າງຖືກຕ້ອງຕາມລະບຽບຂອງສະຖາບັນ, ສອດຄ່ອງກັບລະບຽບກະຊວງສຶກສາທິການ ແລະ ກິລາ, ລະບຽບຂອງວິທະຍາຄານຕໍາຫຼວດປະຊາຊົນ ກະຊວງ ປກສ ເຊິ່ງຜ່ານການສອບເສັງຈົບຊັ້ນ ມີນັກສຶກສາປ້ອງກັນບົດໂຄງການຈົບຊັ້ນ ໄດ້ຄະແນນສູງສຸດ 9,27, ຕໍ່າສຸດ 9,05 ມີ 13 ສະຫາຍ ຍິງ 2 ສະຫາຍ, ສອບເສັງຈົບຊັ້ນ ມີ 50 ສະຫາຍ ຍິງ 1 ສະຫາຍ; ໃນນີ້, ເສັງໄດ້ຄະແນນສູງສຸດ 9, ຄະແນນຕໍ່າສຸດ 7.
ພັອ ປອ ວົງເຊໂດນ ພັນທະແກ້ວ ໄດ້ຊີ້ນໍາຜູ້ທີ່ສໍາເລັດການສຶກສາຄັ້ງນີ້ ຈົ່ງເອົາໃຈໃສ່ນໍາເອົາບົດຮຽນ, ຍຸດທະສາດ, ຍຸດທະວິທີ, ຄວາມຮູ້-ຄວາມສາມາດທີ່ຕົນໄດ້ສຶກສາຮໍ່າຮຽນ ໄປໝູນໃຊ້ເຂົ້າໃນວຽກງານຕົວຈິງທີ່ໄດ້ຮັບມອບໝາຍ ໃຫ້ມີຜົນສໍາເລັດຢ່າງຖືກຕ້ອງຕາມລະບຽບ-ກົດໝາຍ; ຄຽງຄູ່ກັນນັ້ນ, ຕ້ອງເປັນແບບຢ່າງນໍາໜ້າໃຫ້ພະນັກງານ-ນັກຮົບຮຸ່ນນ້ອງ ທາງດ້ານການປະຕິບັດວຽກງານວິຊາສະເພາະ, ດ້ານການເມືອງ-ແນວຄິດ, ຄຸນສົມບັດສິນທໍາປະຕິວັດ ແລະ ແບບແຜນການນໍາພາຢ່າງຖືກຕ້ອງທີ່ສຸດ.
ນອກນັ້ນ, ພິທີຍັງໄດ້ມອບໃບຍ້ອງຍໍໃຫ້ນັກສຶກສາຮຽນດີ-ຮຽນເກັ່ງ; ໃນນີ້, ໄດ້ຮັບໃບຍ້ອງຍໍຂັ້ນກະຊວງ ປກສ 1 ສະຫາຍ, ຂັ້ນກົມໃຫຍ່ການເມືອງ 9 ສະຫາຍ, ຂັ້ນວິທະຍາຄານ ວຕປ 23 ສະຫາຍ ຍິງ 1 ສະຫາຍ ມອບໂດຍ ພົຈວ ສຸວັນນີ ສີສຸພາບມີໄຊ.