ກະຊວງແຜນການ ແລະ ການລົງທຶນ (ກຜທ) ຈັດພິທີເປີດຫ້ອງມູນເຊື້ອ, ກາໝາຍໃໝ່ ແລະ ເວັບໄຊ ໃນວັນທີ 14 ສິງຫານີ້, ໂດຍການເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີ ກຜທ ພ້ອມດ້ວຍບັນດາທ່ານຫົວໜ້າກົມ, ຮອງກົມ, ພະແນກ ແລະ ແຂກຮັບເຊີນ ເຂົ້າຮ່ວມ.
ທ່ານ ສອນໄຊ ສີພັນດອນ ກ່າວວ່າ:
ພິທີເປີດຫ້ອງມູນເຊື້ອ, ກາໝາຍໃໝ່ ແລະ ເວັບໄຊ ຂອງ ກະຊວງ ເປັນເຫດການທາງການເມືອງໜຶ່ງທີ່ມີຄວາມສໍາຄັນ; ໃນນີ້, ຫ້ອງມູນເຊື້ອ ແມ່ນສ້າງຂຶ້ນເພື່ອຈາລຶກຄຸນງາມຄວາມດີ ແລະ ສະແດງຄວາມຮູ້ບຸນຄຸນຕໍ່ພະນັກງານການນຳປະຕິວັດອາວຸໂສຫຼາຍທ່ານ ທີ່ໄດ້ຊີ້ນໍາ-ນຳພາວຽກງານແຜນການ ແລະ ການລົງທຶນໃນແຕ່ລະໄລຍະ, ພ້ອມທັງສະແດງໃຫ້ເຫັນເຖິງການເຕີບໃຫຍ່ຂອງກົງຈັກພັກ ແລະ ພະນັກງານ, ສະແດງຜົນສໍາເລັດ, ຜົນງານດ້ານວິຊາສະເພາະ ແລະ ການເຄື່ອນໄຫວຂອງ 3 ອົງການຈັດຕັ້ງມະຫາຊົນ ຕະຫຼອດໄລຍະ 45 ປີ.
ນອກນັ້ນ, ຍັງໄດ້ພ້ອມກັນເປີດກາໝາຍໃໝ່ທີ່ໄດ້ຜ່ານການຄັດເລືອກຈາກຂະບວນການແຂ່ງຂັນອອກແບບກາໝາຍໃໝ່ ເຊິ່ງແມ່ນສະມາຊິກພັກ-ພະນັກງານ ຢູ່ບັນດາໜ່ວຍພັກທີ່ຂຶ້ນກັບກະຊວງ ໄດ້ສຸມສະຕິປັນຍາໃນການຄົ້ນຄວ້າອອກແບບດ້ວຍຄວາມຮັບຜິດຊອບສູງ ໂດຍມີກາໝາຍທັງໝົດຈໍານວນ 37 ຮູບແບບຈາກ 9 ໜ່ວຍພັກ ສົ່ງເຂົ້າຄັດເລືອກ; ທັງນີ້, ກໍເພື່ອຂໍ່ານັບຮັບຕ້ອນ ກອງປະຊຸມໃຫຍ່ອົງຄະນະພັກກະຊວງແຜນການ ແລະ ການລົງທຶນ ຄັ້ງທີ IV ທີ່ຈະຈັດຂຶ້ນໃນມໍ່ໆນີ້.
ສໍາລັບການເປີດເວັບໄຊ www.mpi.gov.la ຂອງກະຊວງ ແມ່ນຖືເປັນບາດກ້າວໃໝ່ ໃນການໂຄສະນາເຜີຍແຜ່ກ່ຽວກັບພາລະບົດບາດ, ນິຕິກໍາ, ການເຄື່ອນໄຫວ ແລະ ຜົນງານດ້ານຕ່າງໆ ເພື່ອໃຫ້ສັງຄົມທົ່ວໄປ, ນັກຮຽນ-ນັກສຶກສາ, ນັກລົງທຶນ, ຄູ່ຮ່ວມພັດທະນາ ແລະ ພາກສ່ວນອື່ນໆ ຮັບຮູ້ຢ່າງທົ່ວເຖິງໃຫ້ເປັນລະບົບ ແລະ ເປັນເອກະພາບ.
