ເຜີຍແຜ່ວຽກງານຕ້ານອັກຄີໄພ ໃຫ້ຈັດສັນຕະຫຼາດເກົ້າລ້ຽວ ແລະ ກົກໂພ

ວັນທີ 15 ກັນຍາ 2020, ພະແນກຕໍາຫຼວດສະກັດກັ້ນ ແລະ ຕ້ານອັກຄີໄພ ປກສ ນະຄອນຫຼວງວຽງຈັນ ໄດ້ລົງໂຄສະນາເຜີຍແຜ່ວຽກງານສະກັດກັ້ນ ແລະ ຕ້ານອັກຄີໄພໃຫ້ພະນັກງານຈັດສັນຕະຫຼາດເກົ້າລ້ຽວ ແລະ ກົກໂພ ເມືອງສີໂຄດຕະບອງ ນະຄອນຫຼວງວຽງຈັນ ພ້ອມທັງພໍ່ຄ້າ-ແມ່ຄ້າ ພາຍໃນຕະຫຼາດດັ່ງກ່າວ ເຂົ້າຮ່ວມ.

 ພັຕ ບຸນມີ ແສງອາລຸນ ຮອງຫົວໜ້າກອງໂຄສະນາ ພະແນກຕໍາຫຼວດສະກັດກັ້ນ ແລະ ຕ້ານອັກຄີໄພ ປກສ ນະ ຄອນຫຼວງວຽງຈັນ ໄດ້ອະທິ ບາຍຄວາມຮູ້ພື້ນຖານກ່ຽວກັບການສະກັດກັ້ນ ແລະ ຕ້ານອັກຄີໄພ, ວິທີປະຕິບັດເມື່ອເກີດອັກຄີໄພ, ການເອົາຕົວລອດຈາກອັກຄີໄພ, ການຊ່ວຍເຫຼືອຜູ້ເຄາະຮ້າຍ ອອກຈາກສະຖານທີ່ເກີດເຫດ, ວິທີການນຳໃຊ້ອຸປະກອນຂັ້ນພື້ນຖານໃນການມອດໄຟໃນຂັ້ນເບື້ອງຕົ້ນ ເຊັ່ນ: ຜົງເຄ ມີແຫ້ງ, ການນໍາໃຊ້ນໍ້າດັບໄຟ, ເຄມີໂຟມ, ທາດອາຍບໍ່ຕິດໄຟ ແລະອື່ນໆ.

ພ້ອມນີ້ ຍັງໄດ້ອະທິບາຍ ແລະ ແນະນຳວິທີການກວດກາບັ້ງມອດໄຟ, ລະບົບສຽງສັນຍານເຕືອນໄພ ແລະ ລະບົບນ້ຳປະປາ ທີ່ຕິດຕັ້ງຕາມຈຸດຕ່າງໆໃຫ້ຢູ່ໃນສະພາບພ້ອມໃຊ້ງານຢູ່ສະເໝີ. ນອກຈາກນີ້, ກໍໄດ້ມີການສາທິດການນຳໃຊ້ອຸປະກອນການມອດໄຟຂັ້ນພື້ນຖານ ແລະ ປະຕິ ບັດຕົວຈິງ ໃນການນຳໃຊ້ບັ້ງມອດໄຟ, ການມອດໄຟຈາກຖັງແກັສ, ການແກ້ໄຂສະກັດກັ້ນຂັ້ນພື້ນຖານກ່ອນເຈົ້າໜ້າທີ່ມອດໄຟມາຊ່ວຍ, ວິທີການຊ່ວຍເຫຼືອຕົນເອງ ແລະ ຜູ້ເຄາະຮ້າຍອອກຈາກສະຖານທີ່ເກີດເຫດໄດ້ຢ່າງປອດໄພ.

ພາຍຫຼັງສຳເລັດການຝຶກອົບຮົມ, ພັຕ ບຸນມີ ແສງອາລຸນ  ຍັງໄດ້ຮຽກຮ້ອງໃຫ້ພະນັກງານຈັດສັນຕະຫຼາດ ພ້ອມດ້ວຍ ພໍ່ຄ້າ-ແມ່ຄ້າ  ທັງ 2 ຕະຫຼາດ ຈົ່ງນໍາເອົາບົດຮຽນດັ່ງກ່າວ ໄປເຜີຍແຜ່ໃຫ້ຄົນໃນຄອບຄົວ, ຄົນອ້ອມຂ້າງ ແລະ ນຳໄປໝູນໃຊ້ເຂົ້າໃນການຊີວິດຕົວຈິງ ເພື່ອປ້ອງ ກັນຊັບສີນຂອງຕົນ.