ບໍລິສັດ ໂຮມຊັບ ກໍ່ສ້າງ ຈຳກັດ ໃຫ້ການສະໜັບສະໜູນເຄື່ອງນຸ່ງກິລາບານເຕະ ຈຳນວນ 35 ຊຸດ ປະກອບສ່ວນສ້າງໂອກາດໃຫ້ ທີມບານເຕະຊາວໜຸ່ມ ກົມຄຸມຂັງ-ດັດສ້າງ ກະຊວງປ້ອງກັນຄວາມສະຫງົບ ໄດ້ມີການເຄື່ອນໄຫວສ້າງກິດຈະກຳກັບບັນດາພາກສ່ວນຕ່າງໆ ທີ່ຂຶ້ນກັບພາກລັດ ແລະ ເອກກະຊົນ ເພື່ອສ້າງຂະບວນການສະເຫຼີມສະຫຼອງຜົນສຳເລັດ ກອງປະຊຸມໃຫຍ່ ຄັ້ງທີ V ຂອງ ອົງຄະນະພັກ ກະຊວງ ປກສ ເຊິ່ງຫາກໍສຳເລັດຢ່າງຈົບງາມ ໃນລະຫວ່າງວັນທີ 9-10 ກັນຍາ ຜ່ານມານີ້.

ພິທີມອບ-ຮັບເຄື່ອງດັ່ງກ່າວ ໄດ້ມີຂຶ້ນໃນວັນທີ 14 ກັນຍາ ທີ່ຫ້ອງການກົມຄຸມຂັງ-ດັດສ້າງ ບ້ານຊໍາເຄ ເມືອງໄຊເຊດຖາ ນະຄອນຫຼວງວຽງຈັນ; ຕາງໜ້າ ບໍລິສັດ ໂຮມຊັບ ກໍ່ສ້າງ ເປັນການກ່າວມອບໂດຍ ທ່ານ ໄຊຊະນະ ຕີສີລິວົງ ແລະ ກ່າວຮັບແມ່ນ ພັທ ປອ ສີອຳພອນ ອິນແກ້ວ ຫົວໜ້າຫ້ອງການ ກົມຄຸມຂັງ-ດັດສ້າງ ປກສ ແລະ ມີບັນດາພະນັກງານຂອງທັງສອງພາກສ່ວນ ເຂົ້າຮ່ວມ.

ໂອກາດນີ້, ພັທ ປອ ສີອຳພອນ ອິນແກ້ວ ໄດ້ກ່າວສະແດງຄວາມຂອບໃຈ ແລະ ຮູ້ບຸນຄຸນຢ່າງສູງຕໍ່ ບໍລິສັດ ໂຮມຊັບ ກໍ່ສ້າງ ຈຳກັດ ທີ່ໄດ້ມີນໍ້າໃຈເອື້ອເຟື້ອເພື່ອແຜ່ອຸປະຖຳເຄື່ອງກິລາໃຫ້ແກ່ ກົມຄຸມຂັງ-ດັດສ້າງ ໂດຍເຄື່ອງດັ່ງກ່າວຈະໄດ້ນຳໄປເຄື່ອນໄຫວສ້າງກິດຈະກຳກັບບັນດາພາກສ່ວນຕ່າງໆ ເພື່ອເປັນສະເຫຼີມສະຫຼອງຜົນສຳເລັດ ກອງປະຊຸມໃຫຍ່ ຄັ້ງທີ V ຂອງ ອົງຄະນະພັກ ກະຊວງ ປກສ.

ຕະຫຼອດໄລຍະທີ່ຜ່ານມາ, ສາມາດຕີລາຄາໄດ້ສູງ ຂະບວນການກິລາຂອງ ກົມຄຸມຂັງ-ດັດສ້າງ ໄດ້ມີການເຄື່ອນໄຫວຮ່ວມແຂ່ງຂັນກິລາອ້ອມຂ້າງ ກະຊວງ ປກສ ແລະ ພົ້ນເດັ່ນຫຼາຍປະເພດ ໂດຍສະເພາະ ກິລາເປຕັງ ແລະ ບານສົ່ງ ສາມາດຍາດໄດ້ລາງວັນມາຢ່າງຫຼວງຫຼາຍ ແລະ ຈະມີການສືບຕໍ່ເຄື່ອນໄຫວໃນຕໍ່ໜ້າຕື່ມອີກ. ສະນັ້ນ, ຫວັງວ່າໃນໂອກາດໜ້າຈະໄດ້ຮັບການຊຸກຍູ້ຈາກບໍລິສັດຂອງພວກທ່ານຕື່ມອີກ.​

ໃນໂອກາດດຽວກັນ, ທ່ານ ໄຊຊະນະ ຕີສີລິວົງ ກໍໄດ້ກ່າວເຖິງຈິດໃຈຂອງ ປະທານ ບໍລິສັດ ໂຮມຊັບ ກໍ່ສ້າງ ຈຳກັດ ເພີ່ນບອກວ່າໜ້າເສຍດາຍທີ່ສຸດທີ່ບໍ່ໄດ້ມາດ້ວຍຕົນເອງ ຍ້ອນຄາພາລະກິດທີ່ສຳຄັນ. ສະນັ້ນ, ໃນໂອກາດໜ້າເພີ່ນໃຫ້ຄຳເຊື່ອໝັ້ນວ່າ ຈະສືບຕໍ່ໃຫ້ການສະໜັບສະໜູນຕື່ມອີກ; ແນວໃດກໍຕາມ, ຫວັງວ່າເຄື່ອງດັ່ງກ່າວ ຈະສາມາດເປັນປະໂຫຍດໃຫ້ແກ່ ກົມຄຸມຂັງ-ດັດສ້າງ ແລະ ຖືໂອກາດນີ້ຂໍອວຍພອນໄຊອັນປະເສີດມາຍັງຄະນະນຳ ແລະ ພະນັກງານຕຳຫຼວດອ້ອມຂ້າງກົມດັ່ງກ່າວ ຈົ່ງມີແຕ່ຄວາມຜາສຸກ ແລະ ປະສົບຜົນສຳເລັດກັບໜ້າທີ່ການງານທຸກປະການ.