ວັນທີ 17 ກັນຍາ 2020, ວິທະຍາຄານສັນຕິບານປະຊາຊົນ ( ວສປ ) ກະຊວງ ປກສ ໄດ້ເປີດບັ້ນດຳເນີນຊີວິດການເມືອງ ປະຈໍາປີ 2020,ມີສະຫາຍ ພັອ ປອ ວັນສົມ ສີສົມບັດ ອໍານວຍການວິທະຍາຄານສັນຕິບານປະຊາ ຊົນ ພ້ອມດ້ວຍຄະນະພັກ-ຄະນະບັນຊາ ແລະ ສະມາຊິກພັກ ເຂົ້າຮ່ວມ.
ການເປີດບັ້ນດໍາເນີນຊີວິດການເມືອງຄັ້ງນີ້ ເພື່ອຍົກສູງຄຸນນະພາບຂອງການຈັດຕັ້ງຮາກຖານພັກ, ກົມກອງ ແລະ ສະມາຊິກພັກ, ນາຍແລະພົນຕຳຫຼວດ, ເພີ່ມທະວີບົດບາດຄວາມສາມາດນຳພາ-ບັນຊາ ຂອງຄະນະພັກແຕ່ລະຂັ້ນຕໍ່ວຽກງານວິຊາສະເພາະ ເພື່ອເຮັດສຳເລັດໜ້າທີ່ການເມືອງຂອງຕົນ ຕາມແນວທາງຂອງພັກ, ພ້ອມທັງ ເປັນການກວດກາ-ຕີລາຄາຄືນການຊີ້ນຳ-ນຳພາ ຂອງຄະນະພັກແຕ່ລະຂັ້ນ ໃນການເຄື່ອນໄຫວກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ເປັນການກວດກາ, ຕີລາຄາ-ແບ່ງປະເພດຄຸນນະພາບຂອງຮາກຖານພັກ, ກົມກອງ, ສະ ມາຊິກພັກ-ນາຍ ແລະພົນຕຳຫຼວດ ເພື່ອເປັນພື້ນຖານໃນການປັບປຸງກົງຈັກການຈັດຕັ້ງຂັ້ນຕ່າງໆ ໃຫ້ປອດໃສ, ເຂັ້ມແຂງ, ໜັກແໜ້ນ, ຮັບປະກັນການຈັດຕັ້ງປະຕິບັດແນວທາງນະໂຍບາຍຂອງພັກ, ກົດໝາຍຂອງລັດ ກໍຄືແຜນການຂອງຂັ້ນເທິງໃນແຕ່ລະໄລຍະໃຫ້ປະກົດຜົນເປັນຈິງ.
ໃນພິທີ, ພັອ ວັນສົມ ສີສົມບັດ ໄດ້ເຜີຍແຜ່ບັນດາເອກະສານສຳຄັນຕ່າງໆ ເປັນຕົ້ນແມ່ນ ຄຳສັ່ງແນະນຳຂອງຄະນະບໍລິຫານງານພັກກະຊວງ ປກສ ສະບັບເລກທີ 03/ຄພ.ປກສ, ລົງວັນທີ 12 ພະຈິກ 2018 ວ່າດ້ວຍການເພີ່ມທະ ວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນກຳລັງປ້ອງກັນຄວາມສະຫງົບ, ຄໍາສັ່ງແນະນຳຂອງກົມໃຫຍ່ການເມືອງ ປ້ອງກັນຄວາມສະຫງົບ ສະບັບເລກທີ 3791/ກມປສ,ລົງວັນທີ 28 ພະຈິກ 2018 ກ່ຽວກັບການຈັດຕັ້ງປະຕິບັດຄໍາສັ່ງແນະນໍາ ຂອງຄະນະບໍລິຫານງານພັກ ກະຊວງ ປກສ ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນກຳລັງປ້ອງກັນຄວາມສະຫງົບ ແລະ ເອກະສານທີ່ກ່ຽວ ຂ້ອງ ຈໍານວນໜຶ່ງ ພ້ອມທັງແນະນຳວິທີການຂຽນບົດສຳຫຼວດ.