ວັນທີ 16 ກັນຍາ ຜ່ານມາ, ທ່ານ ພູຂົງ ບັນນາວົງ ຮອງເຈົ້າຄອງນະຄອນຫຼວງວຽງຈັນ (ນວ) ຫົວໜ້າພະແນກແຜນ ການ ແລະ ການລົງທຶນ ນວ ພ້ອມດ້ວຍຄະນະ ໄດ້ລົງຕິດຕາມການເຮັດທົດລອງການແກ້ໄຂຊຸມສາຍ ຢູ່ນະຄອນ ຫຼວງວຽງຈັນ ໃນ 3 ເສັ້ນທາງ ເພື່ອລົງກວດກາຕິດ ຕາມເບີ່ງການເຮັດທົດລອງ ໃນວຽກງານດັ່ງກ່າວຕາມເຕັກນິກຂອງແຕ່ລະບໍລິສັດ.
ສຳລັບການເຮັດທົດລອງແກ້ໄຂຊຸມສາຍໃນຄັ້ງນີ້ ໄດ້ດຳເນີນໃນ 3 ເສັ້ນທາງ ຄື: ເສັ້ນທາງ 23 ສິງຫາ ນັບແຕ່ ປະຕູໄຊ ຫາ ກະຊວງການເງິນ ແລະ ເສັ້ນໄກສອນ ພົມວິຫານ ນັບແຕ່ປະຕູໄຊ ຫາ ສີ່ແຍກໄຟແດງໂພນສະອາດ ມີຄວາມຍາວປະມານ 500 ແມັດ ມີສອງບໍລິສັດທີ່ຮັບ ຜິດ ຊອບ ຄື ຈຸດທຳອິດແມ່ນບໍລິສັດເຄທີສາມາດພັດທະນາຈຳກັດຜູ້ດຽວ ແລະ ຈຸດທີ 2 ບໍລິສັດລາວ ກໍ່ສ້າງຕິດຕັ້ງໂທລະຄົມ ຈຳກັດຜູ້ດຽວ ເຊິ່ງສອງບໍລິສັດ ໄດ້ມີການມ້ຽນມັດສາຍໃນແບບຄ້າຍຄືກັນ ເປັນຕົ້ນ ເກັບກູ້ສາຍທີ່ຂາດອອກຈາກກຸ່ມແລວສາຍ ປົດອຸປະກອນທີ່ບໍ່ໄດ້ໃຊ້ອອກຈາກເສົາ ແລະ ຕັດງ່າໄມ້ຕາມແລວສາຍອອກຕິດຕັ້ງອຸປະກອນຄອນສາຍຕິດໃສ່ເສົາ ໄຈ້ແຍກສາຍໄຍແກ້ວ ແລະ ສາຍໂທລະສັບຕັ້ງໂຕະ, ສາຍອິນເຕີເນັດໃຫ້ເປັນກຸ່ມ ເຄັ່ງສາຍທີ່ໂຕ່ງຍານ ແລະ ມັດລວມກຸ່ມສາຍເປັນຍ່ານໃຫ້ເປັນລະບຽບ ເກັບມ້ຽນສາຍ ແລະ ຫົວຕໍ່ຢູ່ເສົາໃຫ້ຈົບງາມ ແລະ ໝັ້ນຄົງ ເຊິ່ງທັງສອງບໍລິສັດ ແມ່ນຈັດຕັ້ງປະຕິບັດຄືກັນ ແຕ່ແຕກຕ່າງກັນຢູ່ທາງດ້ານເຕັກ ນິກ ແລະ ອຸປະກອນທີ່ນຳໃຊ້.
ສ່ວນຈຸດທີສາມ ເລີ່ມແຕ່ເສັ້ນທາງໜ້າຫໍຄຳ ຫາ ສີ່ແຍກໂຮງໝໍມະໂຫສົດ ມີຄວາມຍາວປະມານ 200 ແມັດ ບໍລິສັດທີ໋ຊ໋ອບໂປຣແກຣມ ດິວິລ໋ອບເມັນ ຈຳກັດຜູ້ດຽວ ຈັດຕັ້ງປະຕິບັດຕ່າງຈາກສອງຈຸດ ທີ່ຜ່ານ ມາ ຄື: ໄດ້ນຳໃຊ້ອຸປະກອນຄອນສາຍ ແມ່ນໄດ້ຫຸ້ມຊະນວນກັນໄຟຟ້າຊ໊ອດ ນຳໃຊ້ຮູບແບບຕິດຕັ້ງຄອນສາຍ ແລ້ວແຍກເປັນເສັ້ນຈັບໃສ່ຄອນສາຍ ເຊິ່ງໄດ້ຖືກຮອງຮັບມາດຕະຖານສາກົນ ໃນການເຮັດທົດລອງໃນ 3 ເສັ້ນທາງນີ້ ແມ່ນໄດ້ເຮັດສຳເລັດຕາມແຜນການ. ພາຍຫຼັງສຳເລັດການເຮັດທົດລອງໃນຄັ້ງນີ້ ຄະນະຮັບຜິດຊອບ ຈະໄດ້ຈັດກອງປະ ຊຸມຄົ້ນຄວ້າ ເພື່ອຮັບຮອງຄັດເລືອກເອົາບໍລິສັດທີ່ມີມາດຕະຖານເຕັກນິກ ເພື່ອສືບຕໍ່ດຳເນີນການແກ້ໄຂບັນຫາຊຸມສາຍໃນ ນວ ໃນຕໍ່ໜ້າ.
