ວັນທີ 21 ກັນຍາ 2020, ກົມກວດການ-ກວດການ ກະຊວງ ປກສ ໄດ້ເປີດບັ້ນດຳເນີນຊີວິດການເມືອງ ປະຈໍາປີ 2020, ເປັນປະທານໂດຍ ສະຫາຍ ພັອ ຄໍາຜາສິດ ບົງມູນທອງ ຄະນະພັກກະຊວງ ເລຂາໜ່ວຍພັກຮາກຖານ ຫົວໜ້າກົມກວດກາ-ກວດກາ, ມີ ຄະນະພັກ-ຄະນະບັນຊາ ພ້ອມດ້ວຍສະມາຊິກພັກ, ພະນັກ ງານ-ນັກຮົບ ເຂົ້າຮ່ວມ.
ການເປີດບັ້ນດໍາເນີນຊີວິດການເມືອງຄັ້ງນີ້ ເພື່ອຍົກສູງຄຸນນະພາບຂອງການຈັດຕັ້ງຮາກຖານພັກ, ກົມກອງ ແລະ ສະມາຊິກພັກ, ນາຍ ແລະ ພົນຕຳຫຼວດ, ເພີ່ມທະວີບົດບາດຄວາມສາມາດນຳພາ-ບັນຊາ ຂອງຄະນະພັກແຕ່ລະຂັ້ນຕໍ່ວຽກງານວິຊາສະເພາະ ເພື່ອເຮັດສຳເລັດໜ້າທີ່ການເມືອງຂອງຕົນ ຕາມແນວທາງຂອງພັກ, ພ້ອມທັງ ເປັນການກວດກາ-ຕີລາຄາຄືນ ການຊີ້ນຳ-ນຳພາ ຂອງຄະນະພັກແຕ່ລະຂັ້ນ ໃນການເຄື່ອນໄຫວກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ເປັນການກວດກາ, ຕີລາຄາ-ແບ່ງ ປະເພດຄຸນນະພາບ ຂອງຮາກຖານພັກ, ກົມກອງ, ສະມາຊິກພັກ-ນາຍ ແລະ ພົນຕຳຫຼວດ ເພື່ອເປັນພື້ນຖານໃນການປັບປຸງກົງ ຈັກການຈັດຕັ້ງຂັ້ນຕ່າງໆ ໃຫ້ປອດໃສ, ເຂັ້ມແຂງ, ໜັກແໜ້ນ, ຮັບປະກັນການຈັດຕັ້ງປະຕິບັດແນວທາງນະໂຍບາຍຂອງພັກ, ກົດໝາຍຂອງລັດ ກໍຄືແຜນການຂອງຂັ້ນເທິງໃນແຕ່ລະໄລຍະໃຫ້ປະກົດຜົນເປັນຈິງ.
ໂອກາດດັ່ງກ່າວ, ໄດ້ເຜີຍແຜ່ບັນດາເອກະສານສຳຄັນຕ່າງໆ ເປັນຕົ້ນແມ່ນ ແຈ້ງການເນາະນໍາເພີ່ມເຕີມກົມໃຫຍ່ການເມືອງ ປກສ ເລກທີ 2606/ກມປສ, ລົງວັນທີ 16 ສິງຫາ 2019 ກ່ຽວກັບການແນະນໍາຂັ້ນຕອນ, ວິທີການດໍາເນີນການກວດກາຕີລາຄາ ແບ່ງປະເພດສະມາຊິກພັກ, ໜ່ວຍພັກ ແລະ ຄັດເລືອກໜ່ວຍພັກປອດໃສ ເຂັ້ມແຂງ ໜັກແໜ້ນ, ຄຳສັ່ງແນະນຳຂອງຄະນະບໍລິຫານງານພັກ ກະຊວງ ປກສ ສະ ບັບເລກທີ 03/ຄພ.ປກສ, ລົງວັນທີ 12 ພະຈິກ 2018 ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນກຳ ລັງປ້ອງກັນຄວາມສະຫງົບ, ຄໍາສັ່ງແນະນຳ ຂອງກົມໃຫຍ່ການ ເມືອງປ້ອງກັນຄວາມສະຫງົບ ສະບັບເລກທີ 3791/ກມປສ, ລົງວັນທີ 28 ພະຈິກ 2018 ກ່ຽວກັບການຈັດຕັ້ງປະຕິບັດຄໍາສັ່ງແນະນໍາຂອງຄະນະບໍລິຫານງານພັກ ກະຊວງ ປກສ ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນກຳລັງປ້ອງກັນຄວາມສະຫງົບ, ພ້ອມທັງ ແນະນໍາວິທີການຂຽນບົດສໍາຫຼວດ.