ວັນທີ 17 ກັນຍາ 2020, ຄະນະບໍລິຫານງານຊາວໜຸ່ມ ແຂວງບໍລິຄຳໄຊ ມອບທຶນສົມທົບສ້ອມແປງຫ້ອງນໍ້າ ແລະ ເຮືອນຄົວລວມຂອງພະນັກງານໂສດ ປກສ ແຂວງ ຈໍານວນ 5.000.000 ກີບ; ຕາງໜ້າມອບໂດຍ ສະຫາຍ ທອງມະນີ ໂຄດປັນຍາ ເລຂາຄະນະບໍລິຫານງານ ຊາວໜຸ່ມ ແຂວງບໍລິຄຳໄຊ ແລະ ຕາງໜ້າຮັບໂດຍ ພັອ ປອ ກົງຈັນ ໄຊປັນຍາ ຫົວໜ້າກອງບັນຊາການ ປກສ ແຂວງບໍລິຄຳໄຊ, ມີບັນດາຄະນະປະຈໍາຊາວໜຸ່ມແຂວງ, ຄະນະຊາວໜຸ່ມຮາກຖານ ກອງບັນຊາການ ປກສ ແຂວງ, ພ້ອມດ້ວຍພາກສ່ວນກ່ຽວຂ້ອງທັງສອງຝ່າຍ ເຂົ້າຮ່ວມ.
ພັຕ ຄໍາພິທັກ ທິບພະໄກສອນ ຮອງຫົວໜ້າຫ້ອງຄຸ້ມຄອງສໍາມະໂນຄົວ-ກໍ່ສ້າງຮາກຖານ ຮອງເລຂາຄະນະຊາວໜຸ່ມຮາກຖານ ກອງບັນຊາການ ປກສ ແຂວງ ໄດ້ລາຍງານໂດຍຫຍໍ້ກ່ຽວກັບ ແຜນການສ້ອມແປງຫ້ອງນໍ້າ ແລະ ເຮືອນຄົວລວມຂອງພະນັກງານໂສດ ປກສ ແຂວງ ເຊິ່ງມີມູນຄ່າສ້ອມແປງທັງໝົດ 8.000.000 ກວ່າກີບ; ໂດຍເປັນໂຄງການໜຶ່ງທີ່ນອນຢູ່ໃນ 5 ແຜນງານ ການເຄື່ອນໄຫວສ້າງຂະບວນການພັດທະນາກົມກອງຂອງ ອົງການຈັດຕັ້ງມະຫາຊົນຊາວໜຸ່ມ-ແມ່ຍິງ ປກສ ແຂວງບໍລິຄໍາໄຊ; ທັ້ງນີ້, ເງິນທຶນທີ່ຄະນະບໍລິຫານງານຊາວໜຸ່ມແຂວງຊຸກຍູ້ນັ້ນ ເປັນການປະກອບສ່ວນສຳຄັນໃນການສ້ອມແປງຫ້ອງນຳ້ ແລະ ເຮືອນຄົວໃຫ້ພະນັກງານ-ນັກຮົບ ທີ່ຍັງເປັນໂສດ ທີ່ພັກຢູ່ເຮືອນລວມຂອງ ປກສ ແຂວງ.
ໂອກາດດັ່ງກ່າວ, ພັອ ປທ ກົງຈັນ ໄຊປັນຍາ ຕາງໜ້າໃຫ້ແກ່ ຄະນະບໍລິຫານງານພັກກອງບັນຊາການ ແລະ ອົງການຈັດຕັ້ງມະຫາຊົນຊາວໜຸ່ມ-ແມ່ຍິງ ປກສ ແຂວງ ໄດ້ກ່າວສະແດງຄວາມຂອບໃຈຕໍ່ ຄະນະບໍລິຫານງານຊາວໜຸ່ມ ແຂວງບໍລິຄຳໄຊ ທີ່ໄດ້ປະກອບສ່ວນທຶນຮອນ ເພື່ອຊຸກຍູ້ເຂົ້າໃນວຽກງານພັດທະນາພື້ນຖານໂຄງລ່າງຂອງ ກອງບັນຊັນການ ປກສ ແຂວງ ແລະ ກໍເປັນການປະກອບສ່ວນຊຸກຍູ້ວຽກງານປ້ອງກັນຊາດ-ປ້ອງກັນຄວາມສະຫງົບຕື່ມອີກ.
