ຄະນະຊາວໜຸ່ມຮາກຖານ ປກສ ແຂວງສາລະວັນ ໄດ້ປະຊຸມສະຫຼຸບຕີລາຄາຄືນການຈັດຕັ້ງປະຕິບັດ ຂໍ້ແຂ່ງຂັນ 4 ບຸກປະຈໍາປີ 2020 ແລະ ທິດທາງແຜນການປີ 2021 ໃນວັນທີ 23 ກັນຍາ 2020 ເປັນປະທານໂດຍ ພັທ ດວງເພັດ ພົມມະຈັນ ເລຂາຄະນະຊາວໜຸ່ມຮາກຖານ ປກສ ແຂວງສາລະວັນ,ມີ ພັທ ແພງສີ ໄຊຍະເພັດ ຮອງກອງບັນຊາການ ປກສ ແຂວງ,ມີບັນດາອົງການຈັດຕັ້ງຊາວໜຸ່ມ,ແມ່ຍິງ,ກໍາມະບານ ພ້ອມດ້ວຍພາກສ່ວນທີ່ກ່ຽວຂ້ອງ ແລະ ສະມາຊິກຊາວໜຸ່ມ ເຂົ້າຮ່ວມ.
ສະຫາຍ ພັຕ ທະນາພອນ ແກ້ວອຸ່ນເຮືອນ ຄະນະຊາວໜຸ່ມຮາກຖານປກສແຂວງ ໄດ້ຜ່ານບົດສະຫຼຸບກ່ຽວກັບການຈັດ ຕັ້ງປະຕິບັດຂໍ້ແຂ່ງຂັນ 4 ບຸກ ປີ 2020 ວ່າ: ໃນໄລຍະ 1 ປີ ຄະນະຊາວໜຸ່ມຮາກຖານ ປກສ ແຂວງສາລະວັນ ໄດ້ເອົາ ໃຈໃສ່ປັບປຸງການຈັດຕັ້ງແຕ່ລະຂັ້ນທີ່ຂຶ້ນກັບຄວາມຮັບຜິດຊອບຂອງຕົນເອງຢ່າງຕັ້ງໜ້າ ແລະ ຖືເອົາການ ເຄື່ອນໄຫວວຽກງານວິຊາສະເພາະຕໍາຫຼວດຕິດພັນ ແລະ ສອດຫ້ອຍເຂົ້າໃນຂົງ ເຂດວຽກງານຕາມການມອບໝາຍຂອງອົງການ ຈັດຕັ້ງທັງສາຍຕັ້ງແລະສາຍຂວາງ,ອົບຮົມ-ເຊື່ອມຊຶມຄໍາແນະນໍາ,ມະຕິ,ຄຳສັ່ງ,ຂໍ້ຕົກ ລົງ,ລະ ບຽບກົດໝາຍ,ວິໄນຂອງກໍາລັງ ປກສ ໂດຍຕິດພັນກັບຂໍ້ແຂ່ງຂັນ 4 ບຸກ ຂອງຊາວໜຸ່ມຢ່າງແຂງແຮງ. ຕະຫຼອດໄລຍະຜ່ານມາ ຄະນະຊາວ ໜຸ່ມ ຮາກຖານ ແລະ ສະມາຊິກ ສາມາດເຄື່ອນໄຫວວຽກງານຂອງຕົນ ເຊັ່ນ: ອອກແຮງງານອະນາໄມ ລວມ 34 ຄັ້ງ, 926 ແຮງງານ,ປ້ອງ ກັນສຳນັກງານອົງການວັນບຸນສຳຄັນຕ່າງໆ ຂອງພັກຂອງຊາດ ຈຳນວນ 164 ສະຫາຍ, ລົງເຜີຍແຜ່ກົດລະ ບຽບຈະລາຈອນ, ຜົນຮ້າຍຂອງສິ່ງເສບຕິດ ຢູ່ບັນດາໂຮງຮຽນແຫ່ງຕ່າງໆ 5 ຄັ້ງ ມີຜູ້ເຂົ້າຮ່ວມ ຮັບຟັງ 1.524 ຄົນ,ປັບປຸງ-ຍົກລະດັບໃຫ້ພະນັກງານ,ປັບປຸງແບບແຜນວິທີເຮັດວຽກ, ລະບົບການສ່ອງແສງລາຍງານວຽກງານປະຈຳວັນ-ອາທິດ,ເດືອນ,ປີ ເພື່ອຕຳນິກໍ່ສ້າງຊ່ວຍເຫຼືອເຊິ່ງກັນແລະກັນ ເຮັດໃຫ້ສະມາຊິກຊາວໜຸ່ມ ມີຄວາມອຸ່ນອຽນທຸ່ນທ່ຽງ,ດຸໝັ່ນຫ້າວຫັນໃນການປະຕິບັດໜ້າທີ່ວຽກງານ,ມີລະບຽບວິໄນ, ມີສະຕິຕໍ່ການຈັດຕັ້ງ ແລະ ປະຕິບັດທຸກມະຕິຄຳສັ່ງຢ່າງເຂັ້ມງວດ,ມີຄວາມບຸກໜ້າບືນຕົວເຂົ້າໃສ່ໃນການຝຶກຝົນຫຼໍ່ຫຼອມຕົນເອງ ໃຫ້ກາຍເປັນພະນັກງານຜູ້ສືບທອດດີເດັ່ນ, ເປັນສະມາຊິກ ທີ່ມີຄວາມກ້າວໜ້າ ເພື່ອຂະຫຍາຍເຂົ້າເປັນສະມາຊິກພັກ.
ໂອກາດນີ້, ພັທ ແພງສີ ໄຊຍະເພັດ ໄດ້ໂອ້ລົມສະມາຊິກ ແລະ ຄະນະຊາວໜຸ່ມຮາກຖານ ວ່າ: ການຮັກສາໝາກຜົນຂອງການປະຕິວັດ ລ້ວນແລ້ວແຕ່ຮຽກຮ້ອງຕ້ອງການເຖິງກຳລັງແຮງຂອງຊາວໜຸ່ມໃນຍຸກສະໄໝ ເປັນກົງຈັກຫຼັກ ແຫຼ່ງ ໂດຍສະເພາະ ການສ້າງສາພັດທະນາປະເທດ ຊາດ,ພັດທະນາອົງການຈັດຕັ້ງທ້ອງຖິ່ນຂອງຕົນ ໃຫ້ມີຄວາມສີວິໄລກ້າວຂຶ້ນ,ໂດຍເນັ້ນໃສ່ 7ບັນຫາຫຼັກ ທີ່ຊາວໜຸ່ມຈະໄດ້ສືບຕໍ່ແກ້ໄຂ ແລະເຮັດໃຫ້ສຳເລັດໃນປັດຈຸບັນ ຄື: ສະກັດກັ້ນ ແລະ ຕ້ານການມົ້ວສຸມສິ່ງເສບຕິດ,ອາຊະຍາກຳສັງຄົມ ແລະ ອອນລາຍ, ເອົາໃຈໃສ່ຂະຫຍາຍຕາ ໜ່າງວຽກງານວິຊາສະເພາະ, ການສ້າງກໍາລັງແຮງໃຫ້ບຸກຄົນ-ພົນລະເມືອງໄດ້ນຳໃຊ້ຢ່າງຖືກຕ້ອງຕາມລະບຽບກົດໝາຍ, ການຫຼີ້ນກິນພຸມເຟືອຍ, ການຄ້າມະນຸດໂສເພນີ,ແຮງງານຂອງຊາວຕ່າງປະເທດ ທີ່ເຂົ້າມາພັກອາໃສແບບເລື່ອນລອຍ,ການເກີດອຸບັດຕິເຫດຕາມທ້ອງຖະໜົນຫຼວງ ແລະ ປະກົດການຫຍໍ້ທໍ້ພາຍນອກ-ໃນກົງການຈັດຕັ້ງໃຫ້ໄດ້ແຕ່ຫົວທີ່.
