ກອງປະຊຸມໃຫຍ່ຄັ້ງທີ VII ແນວລາວສ້າງຊາດ ເມືອງຫາດຊາຍຟອງ ນະຄອນຫຼວງວຽງຈັນ ໄດ້ໄຂຂຶ້ນໃນວັນທີ 25 ກັນຍາ ຜ່ານມາ,ໂດຍການເປັນປະທານຂອງ ສະຫາຍ ຄໍາຝ່ອນ ມະນີວັນ ປະທານແນວລາວສ້າງຊາດ ເມືອງຫາດຊາຍຟອງ, ມີ ສະຫາຍ ຖະໜອມ ທໍາທອງ ປະ ທານແນວລາວສ້າງຊາດ ນະຄອນຫຼວງວຽງຈັນ, ພ້ອມດ້ວຍແຂກຮັບເຊີນ ແລະ ຄະນະປະທານແນວລາວສ້າງຊາດເມືອງແລະບ້ານ ເຂົ້າຮ່ວມ.
ສະຫາຍ ຄໍາຝ່ອນ ມະນີວັນ ໄດ້ຜ່ານບົດລາຍງານການເມືອງ ໃນໄລຍະ 5 ປີຜ່ານມາ ວ່າ: ຄະນະກໍາມະການແນວລາວສ້າງຊາດ ເມືອງຫາດ ຊາຍຟອງ ໄດ້ເອົາໃຈໃສ່ຊີ້ນຳ-ນຳພາວຽກງານແນວລາວສ້າງຊາດ ແຕ່ລະຂັ້ນພາຍໃນເມືອງ ເພື່ອປະສານສົມທົບກັບຄະນະພັກ,ຄະນະໂຄສະ ນາ-ອົບຮົມ ແນໃສ່ເຕົ້າໂຮມຄວາມສາມັກຄີ.ນອກນັ້ນ, ຍັງໄດ້ເລືອກເອົາຜູ້ຊົງຄຸນວຸດທິຂອງເຜົ່າຕ່າງໆ ເຂົ້າເປັນຄະນະກໍາມະການແນວລາວສ້າງຊາດເມືອງ ແລະ ບ້ານ,ໄດ້ຊຸກຍູ້ໃຫ້ປະຊາຊົນບັນດາເຜົ່າ ໃຫ້ມີຄວາມສາມັກຄີຮັກແພງຊ່ວຍເຫຼືອເຊິ່ງກັນແລະກັນ, ປຸກລະດົມປະຊາຊົນບັນດາເຜົ່າ ເຂົ້າຮ່ວມບຸນປະເພນີຂອງເຜົ່າຕ່າງໆ ເປັນ ຕົ້ນແມ່ນ: ເຜົ່າລາວ,ເຜົ່າໄຕດໍາ ແລະ ເຜົ່າກຶມມຸ ແລະ ໄດ້ປຸກລະດົມອົງການຈັດຕັ້ງທຸກພາກສ່ວນ ເຂົ້າຮ່ວມຂະບວນການຕ່າງໆ ໂດຍສະເພາະ ຂະບວນການປ້ອງກັນຊາດ-ປ້ອງກັນຄວາມສະຫງົບ, ຕິດພັນກັບວຽກງານ3 ຫຼຸດ,3 ເພີ່ມ, ຊຸກຍູ້ໃຫ້ປະຊາຊົນພາຍໃນບ້ານສ້າງຄອບຄົວປອດຄະດີ, ບ້ານປອດຄະດີ, ບ້ານປ້ອງກັນຊາດ-ປ້ອງກັນຄວາມສະຫງົບດີ, ຕັ້ງໜ້າປະຕິ ບັດກົດລະບຽບດີ, ຜ່ານການປຸກລະດົມຂະບວນການປ້ອງກັນຊາດ-ປ້ອງກັນຄວາມສະຫງົບ ສາມາດຍົກສູງໄດ້ ສະຕິຕື່ນຕົວເປັນເຈົ້າການຂອງ ປະຊາຊົນບັນດາເຜົ່າ ເຮັດໃຫ້ເມືອງຫາດຊາຍຟອງ ມີສະຖຽນລະພາບທາງດ້ານການເມືອງໜັກແໜ້ນ, ມີຄວາມສະຫງົບ ແລະ ເປັນລະ ບຽບຮຽບຮ້ອຍໂດຍພື້ນຖານ.
ໃນກອງປະຊຸມ,ຍັງໄດ້ພ້ອມກັນປະຊາມະຕິ ເອົາປະທານແນວລາວສ້າງຊາດເມືອງຫາດຊາຍຟອງຜູ້ໃໝ່, ຜ່ານການລົງປະຊາມະຕິ ໄດ້ເປັນເອກະສັນເລືອກເອົາ ສະຫາຍ ບົວລີ ມຸກດາລາ ເປັນປະທານແນວລາວສ້າງຊາດເມືອງຫາດຊາຍຟອງ.