ກອງບັນຊາການປ້ອງກັນທີ່ຕັ້ງກະຊວງປກສ ໄດ້ປະກາດການຈັດຕັ້ງ ໃນວັນທີ 1 ຕຸລາ 2020 ໂດຍການເປັນປະທານຂອງ ພັອ ໄຊສີ ແກ້ວສະຫງ່າ ຫົວໜ້າກອງບັນຊາການປ້ອງກັນທີ່ຕັ້ງ, ມີບັນດາຄະນະພັກ 4 ຫ້ອງ, 3 ກອງພັນ ແລະກອງຮ້ອຍເອກະລາດເຂົ້າຮ່ວມ.
ພັທ ກອງແກ້ວ ກຸສານົນ ຫົວໜ້າຫ້ອງການເມືອງ ໄດ້ຜ່ານຂໍ້ຕົກລົງ ສະບັບເລກທີ 3150/ກມປສ, ລົງວັນທີ 27 ສິງຫາ 2020 ວ່າດ້ວຍການໂຍກຍ້າຍນາຍຕຳຫຼວດ ທີ່ຂຶ້ນກັບກອງບັນຊາການປ້ອງກັນທີ່ຕັ້ງ.ໃນນີ້, ໄດ້ໂຍກຍ້າຍ ພັທ ນິພົນ ແກ້ວແສງສີ ຈາກກອງພັນ 205 ໄປຮັບໜ້າທີ່ໃໝ່ ຢູ່ຫ້ອງເສນາທິການ, ພັທ ບຸນລຽບ ວົງດາລັກ ຈາກຫ້ອງການເມືອງ ໄປຮັບໜ້າທີ່ໃໝ່ ຢູ່ກອງພັນ 205, ພັທ ໄມພອນ ພວງຍະສານ ຈາກຫ້ອງເສນາທິການ ໄປຮັບໜ້າທີ່ ໃໝ່ຢູ່ກອງພັນ 205. ພ້ອມນີ້, ຍັງໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຫົວໜ້າ ແລະ ຮອງຂັ້ນພະແນກ, ຂັ້ນກອງຮ້ອຍ, ຂັ້ນໝວດ, ຂັ້ນໝູ່ຂອງບັນດາກອງພັນ, ກອງຮ້ອຍເອກະລາດ ອີກຈໍານວນໜຶ່ງ.
ໃນພິທີ, ພັອ ໄຊສີ ແກ້ວສະຫງ່າ ໄດ້ສະແດງຄວາມຍ້ອງຍໍຊົມເຊີຍ ຕໍ່ນາຍຕຳຫຼວດ ທຸກສະຫາຍທີ່ໄດ້ທຸມເທເຫື່ອແຮງ, ສຸມທຸກສະຕິປັນຍາ ເຂົ້າໃນປະຕິບັດໜ້າທີ່ວຽກງານວິຊາສະເພາະ ຈົນມີຜົນສຳເລັດຕາມຄາດໝາຍ. ພ້ອມນັ້ນ, ບັນດາສະຫາຍທີ່ຖືກໂຍກຍ້າຍ ແລະ ສັບຊ້ອນແຕ່ງຕັ້ງໃນຄັ້ງນີ້ ຕ້ອງພ້ອມກັນນຳໃຊ້ວິຊາສະເພາະຂອງກຳລັງປ້ອງກັນຄວາມສະຫງົບ ເພື່ອຊອກຮູ້, ຕ້ານ ແລະ ສະກັດກັ້ນກົນອຸບາຍການເຄື່ອນໄຫວຂອງພວກຄົນບໍ່ຫວັງດີຕໍ່ລະບອບໃໝ່ຂອງພວກເຮົາ ຢ່າງເຂັ້ມງວດ.
