ກອງປະຊຸມໃຫຍ່ ຄັ້ງທີ III ຂອງ ສະມາຄົມສິລະປະແຄນລາວ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ກະຊວງ ຖວທ) ໄດ້ຈັດໃນວັນທີ 8 ຕຸລາ 2020; ເຊິ່ງເປັນປະທານໂດຍ ທ່ານ ຄຳເໝືອນ ສິດທິດາ ປະທານສະມາຄົມສິນລະປະແຄນລາວ, ເປັນກຽດເຂົ້າຮ່ວມໂດຍ ທ່ານ ສຈ ປອ ກິແກ້ວ ໄຂຄຳພິທູນ ລັດຖະມົນຕີ ຖວທ, ມີບັນດາຕາງໜ້າຈາກກະຊວງ, ອົງການທຽບເທົ່າ, ຕົວແທນຈາກສະມາຄົມສິລະປະແຄນລາວ ທົ່ວປະເທດ ແລະ ສື່ມວນຊົນ ເຂົ້າຮ່ວມ.

ທ່ານ ສຈ ປອ ຈະເລີນ ເຢຍປາວເຮີ ລັດຖະມົນຕີ ປະຈໍາສໍານັກງານນາຍົກລັດຖະມົນຕີ, ປະທານຄະນະຂົນຂວາຍສ້າງຕັ້ງ ສະມາຄົມສິລະປະແຄນລາວ

ທ່ານ ສຈ ປອ ຈະເລີນ ເຢຍປາວເຮີ ລັດຖະມົນຕີ ປະຈໍາສໍານັກງານນາຍົກລັດຖະມົນຕີ, ປະທານຄະນະຂົນຂວາຍສ້າງຕັ້ງ ສະມາຄົມສິລະປະແຄນລາວ ໄດ້ກ່າວວ່າ:

ແຄນ ແມ່ນເຄື່ອງດົນຕີປະຈໍາຊາດລາວ ຊຶ່ງເກີດຈາກພູມປັນຍາຂອງບັນພະບູລຸດລາວ ໄດ້ປະດິດສ້າງຂຶ້ນມາ.

ແຄນ ໃຊ້ເປົ່າຕາມປະເພນີ ຫຼື ປະສານກັບສຽງຂັບສຽງລໍາທ້ອງຖິ່ນ ດ້ວຍສຽງທໍານອງຈັງຫວະຕ່າງໆ ຢ່າງກົມກືນ ອອນຊອນ ແລະ ມ່ວນຊື່ນ, ເຊິ່ງໍຫຼັກຖານປະຫວັດສາດ ໄດ້ຢືນຢັນວ່າ:

“ຢູ່ບ່ອນໃດມີແຄນ, ສຽງແຄນ ຢູ່ບ່ອນນັ້ນມີຄົນລາວ, ມີແຄນຕ້ອງມີຂັບມີລໍາຢູ່ນໍາກັນຄືເງົາຕາມຕົວ ຕິດພັນກັບ ວິຖີຊີວິດ ແລະ ວັດທະນະທໍາຂອງຄົນລາວບັນດາເຜົ່າ ມາແຕ່ດຶກດໍາບັນ”

ຜ່ານການເຄື່ອນໄຫວຢ່າງຕັ້ງໜ້າ ໃນໄລຍະ 15 ປີ ຂອງ ຄະນະບໍລິຫານງານ ສະໂມສອນສິລະປະແຄນລາວ 2 ສະໄໝ ທີ່ຜ່ານມາ, ໄດ້ປະກອບສ່ວນສໍາຄັນເຂົ້າໃນການເຄື່ອນໄຫວຮັບໃຊ້ສັງຄົມ ຕາມບົດບາດຂອງຕົນ ພາຍຫຼັງທີ່ອົງການອຸຍແນສໂກ ໄດ້ຮັບຮອງເອົາສຽງແຄນລາວ ເປັນມໍລະດົກວັດທະນະທໍານາມມະທໍາຂອງຄົນເຊື້ອຊາດລາວ ແລະ ເປັນມໍລະດົກວັດທະນະທໍານາມມະທໍາຂອງມວນມະນຸດໂລກ ໃນວັນທີ 7 ທັນວາ ປີ 2017; ສະໂມສອນສິລະປະແຄນລາວ ກໍໄດ້ປັບປຸງຍົກລະດັບ ສະໂມສອນສິລະປະແຄນລາວ ເປັນ ສະມາຄົມສິລະປະແຄນລາວ ເພື່ອເຕົ້າໂຮມໝໍແຄນ, ໝໍຂັບ-ໝໍລໍາຕ່າງໆ ແລະ ຊ່າງແຄນ ໃຫ້ກວ້າງຂວາງ ເພື່ອຕັ້ງໜ້າປະກອບສ່ວນປົກປັກຮັກສາ ແລະ ເສີມຂະຫຍາຍແຫຼ່ງວັດຖຸເຮັດແຄນ, ມູນເຊື້ອແຄນ ແລະ ສຽງແຄນເຊື້ອຊາດລາວ ອັນເປັນມໍລະດົກໂລກ ໃຫ້ຍືນຍົງຄົງຢູ່ຄູ່ຄົນລາວ, ຊາດລາວ ແລະ ຊາວໂລກຕະຫຼອດໄປ.

ເພື່ອສືບຕໍ່ສົ່ງເສີມມູນເຊື້ອວັດທະນະທໍາອັນດີງາມຂອງຊາດ ໃນຕໍ່ໜ້າ, ສະມາຄົມສິລະປະແຄນລາວ ຈະສືບຕໍ່ປັບປຸງການຈັດຕັ້ງ ສະມາຄົມສິລະປະແຄນລາວ ໃຫ້ເຂັ້ມແຂງ, ມີຄວາມສາມາດນໍາພາ-ຊີ້ນໍາເຄື່ອນໄຫວວຽກງານ ຕາມພາລະບົດບາດທີ່ໄດ້ກໍານົດໄວ້ໃນກົດລະບຽບຂອງສະມາຄົມ, ສະເໜີຂັ້ນເທິງແຕ່ງຕັ້ງ ຄະນະຮັບຜິດຊອບຄົ້ນຄວ້າຫຼັກສູດການຮຽນ-ການສອນເປົ່າແຄນ ໂດຍສົມທົບກັບ ກະຊວງສຶກສາທິການ ແລະ ກິລາ ເພື່ອເອົາຫຼັກສູດວິຊາການເປົ່າແຄນ ເຂົ້າຫຼັກສູດການຮຽນ-ການສອນຂອງໂຮງຮຽນປະຖົມ, ມັດທະຍົມສຶກສາ ແລະ ມະຫາວິທະຍາໄລ; ພ້ອມນັ້ນ, ຍັງຈະໄດ້ເປີດການຮຽນເປົ່າແຄນໃຫ້ນັກການທູດ ໃຫ້ຮູ້ເປົ່າແຄນ ແລະ ພະນັກງານ-ລັດຖະກອນ ຂະແໜງການຕ່າງໆທີ່ສົນໃຈ. ເຊິ່ງທັງໝົດກໍເພື່ອແນໃສ່ໃຫ້ປະຊາຊົນຄົນລາວບັນດາເຜົ່າ ທີ່ເປັນເຈົ້າຂອງແຄນ ແລະ ສຽງແຄນ ໄດ້ຮຽນຮູ້ເປົ່າແຄນຢ່າງກວ້າງຂວາງ ແລະ ຟົດຟື້ນ.