ບັນຫາການລັກຊັບພົນລະເມືອງ ຍັງປະກົດຂຶ້ນຫຼາຍຢູ່ໃນສັງຄົມ ໂດຍສະເພາະຢູ່ຕາມຕົວເມືອງໃຫຍ່. ໃນນີ້, ໃນນະຄອນຫຼວງວຽງຈັນ ເກີດ ຂຶ້ນຫຼາຍກວ່າໝູ່ ເຖິງແມ່ນວ່າຜູ້ກະທຳຜິດ ຈຳນວນໜຶ່ງຈະຖືກຈັບຕົວມາລົງໂທດຕາມກົດໝາຍ. ແຕ່ກຸ່ມຄົນເຫຼົ່ານັ້ນຍັງບໍ່ໄດ້ລົດລະທີ່ຈະພະຍາຍາມກໍເຫດລັກຊັບ. ດັ່ງຄະດີ 2 ສ່ຽວ ຮ່ວມກັນຊອກລັກຊັບ (ລົດຈັກ) 10 ຄັ້ງ ຖືກສານຕັດສິນຈຳຄຸກ ພ້ອມປັບໃໝ.

ອົງການໄອຍະການປະຊາຊົນ ນະຄອນຫຼວງວຽງຈັນ ສັ່ງຟ້ອງ 2 ຈຳເລີຍ ຊື່ ທ້າວ ແອ ນ້ອຍ (ຈຳເລີຍ1) ອາຍຸ 20 ປີ ຢູ່ບ້ານຫ້ວຍຫົງ ເມືອງຈັນທະບູລີ, ທ້າວ ມູນ (ຈຳເລີຍ2) ອາຍຸ 20 ປີ ຢູ່ບ້ານສາຍນໍ້າເງິນ ເມືອງໄຊທານີ ນະຄອນຫຼວງວຽງຈັນ. ພວກຈຳເລີຍ ທັງສອງຄົນ ຖືກສານຕັດສິນ ໃນວັນທີ 7 ຕຸລາ ນີ້, ຂໍ້ຫາລັກຊັບພົນລະເມືອງ ແລະ ສານຂັ້ນຕົ້ນພິຈາລະນາຕັດສິນຈຳຄຸກ ຈຳເລີຍ 13 ປີ 3 ເດືອນ ປັບໃໝ 5.000.000 ກີບ ແລະ ຕັດສິນຈຳເລີຍ 2 ຈຳຄຸກ 1 ປີ 6 ເດືອນ ປັບໃໝ່ 2.500.000 ກີບ. ການຖະແຫຼງໄຈແຍກການກະທໍາຜິດຕົວຈິງຂອງພວກຈໍາເລີຍຕໍ່ຄະນະສານຂັ້ນຕົ້ນ ດັ່ງ ນີ້: ໃນໄລຍະເດືອນສິງຫາ ຫາ ກັນຍາ ປີ 2019, ທ້າວ ແອນ້ອຍ ໄດ້ເຄື່ອນໄຫວລັກຊັບມາແລ້ວ 10 ຄັ້ງ ໂດຍລັກຮ່ວມກັບ ທ້າວ ປິ່ນ 3 ຄັ້ງ ແລະ ຮ່ວມກັບ ທ້າວ ມູນ 7 ຄັ້ງ ເມື່ອລັກໄດ້ແລ້ວກໍນຳໄປຂາຍແລ້ວນຳເງິນມາແບ່ງປັນກັນໃຊ້ຈ່າຍຟຸມເຟືອຍ ໂດຍມີລາຍລະອຽດດັ່ງນີ້: ຄັ້ງທີ 1-3 ແມ່ນຮ່ວມກັບ ທ້າວ ປີ່ນ ລັກລົດຈັກຮອນ ດ້າເວບ 100 ສີຟ້າ ຢູ່ເຂດສວນເຈົ້າອານຸວົງ ແລ້ວນຳໄປຂາຍໃຫ້ກັບທ້າວ ໄກສອນ ຢູ່ແຂວງຫຼວງພະບາງ ໃນຄາລາ 2.500.000 ກີບ. ຕໍ່ມາ, ລັກລົດຈັກຮອນດ້າເວບ 125 ສີ ແດງດຳ ຢູ່ສ່ວນເຈົ້າອານຸວົງ ເອົາໄປຂາຍໃຫ້ກັບ ທ້າວ ໄກສອນ ໃນລາຄາ 2.000.000 ກີບ ແລະ ລັກລົດຈັກຊູໂມ້ເອັກສີຂາວແດງ ໝາຍເລກທະບຽນ ຕຕ 1551 ຄັ້ງນີ້ ທ້າວ ແອນ້ອຍ ເອົາໄປນຳໃຊ້ເອງ.ສຳລັບຄັ້ງທີ 4-10 ແມ່ນຮ່ວມກັບ ທ້າວ ມູນ ມີລາຍລະອຽດດັ່ງນີ້: ລັກລົດຈັກເອມສະ ແລດ ສີຂາວຂຽວ ຢູ່ເຂດບ້ານດົງນາທອງ ນຳໄປຂາຍໃຫ້ ທ້າວ ໄກສອນ ໄດ້ເງິນ 5.000.000 ກີບ, ລັກເອົາລົດຈັກເວບ 100 ສີດໍາ ຢູ່ເດີນໂຮງ ຮຽນວິທະຍາໄລສຸກສະຫວັດ ແລ້ວຂາຍໃຫ້ ທ້າວ ໄກສອນ ລາຄາ 2.500.000 ກີບ, ລັກ ລົດຈັກເວບ 100 ສີຂຽວຫົວເປັດ ຈໍານວນ 2 ຄັນ ຢູ່ແຖວແຄມຂອງ ຄັ້ງນີ້ ແມ່ນຂາຍໃຫ້ທ້າວ ໄກສອນ ລາຄາຄັນລະ 2.500.000 ກີບ, ລັກລົດຈັກເວບ 100 ສີຟ້າດໍາ ແລະ ສີດໍາແດງ ຢູ່ຕະຫຼາດເຂດດົງໂດກ ຂາຍໄດ້ຄັນລະ 2.500.000 ກີບ, ລັກລົດຈັກເວບ 100 ສີ ແດງດຳ ຢູ່ເເຄມທາງຕະຫຼາດຫ້ວຍຫົງ ຂາຍໄດ້ 2.500.000 ກີບ, ລັກລົດຈັກເວບ 100 ຈຳ ນວນ 2 ຄັນ ຢູ່ຕະຫຼາດຫຼັກ 21 ຂາຍໄດ້ຄັນລະ 2.500.000 ກີບ, ຄັ້ງສຸດທ້າຍ ລັກລົດຈັກຍີ່ຫໍ້ ຊູໂມ້ເອັກ ສີສົ້ມ ຢູ່ບ້ານຈອມແຈ້ງ ແຕ່ຄັ້ງນີ້ ເອົາໄປຂາຍໃຫ້ ທ້າວ ປິ່ນ ຢູ່ບ້ານນາໂອ ເມືອງບໍລິຄັນ ແຂວງບໍລິຄໍາໄຊ ລາຄາ 5.000.000 ກີບ. ມາວັນທີ 7 ຕຸລາ 2019, ທ້າວ ແອນ້ອຍ ແລະ ທ້າວ ມູນ ຈຶ່ງຖືກເຈົ້າໜ້າທີ່ກັກຕົວມາດໍາເນີນຄະດີ.

ຜ່ານການຖະແຫຼງໄຈແຍກການກະທຳຜິດຂອງຈຳເລີຍ ຄະນະສານອາຍາ ສານປະຊາຊົນ ຂັ້ນຕົ້ນ ນະຄອນຫຼວງວຽງຈັນ ໄດ້ຄົ້ນຄວ້າບັນດາຂໍ້ມູນຫຼັກຖານ ແລະ ເອກະສານຕ່າງໆທີ່ມີ ຢູ່ໃນສໍານວນຄະດີຢ່າງລະອຽດຄົບຖ້ວນ, ຮອບດ້ານ ແລະ ພາວະວິໄສແລ້ວເຫັນວ່າ ມີຫຼັກ ຖານຮັດກຸມທີ່ໜັກແໜ້ນ ແລະ ພຽງພໍຢັ້ງຢືນວ່າ ການກະທໍາຂອງພວກຈຳເລີຍ ເປັນການກະທໍາຜິດທາງອາຍາໃນສະຖານການລັກຊັບພົນລະເມືອງ, ເຊິ່ງແຕະຕ້ອງຕໍ່ກຳມະສິດສ່ວນ ຕົວຂອງຜູ້ອື່ນຕາມທີ່ໄດ້ກໍານົດໄວ້ໃນປະມວນກົດໝາຍ ອາຍາມາດຕາ 231.

ເຫັນວ່າ: ໃນໄລຍະເດືອນສິງຫາ ຫາ ເດືອນ ກັນຍາ 2019, ພວກຈຳເລີຍ ໄດ້ເຄື່ອນໄຫວລັກ ຊັບ ທັງໝົດ 10 ຄັ້ງ ໂດຍ ທ້າວ ແອນ້ອຍ ຮ່ວມກັບ ທ້າວ ປີ່ນ 3 ຄັ້ງ ລັກໄດ້ລົດຈັກ 3 ຄັນ ມີເວບ 100, ເວບ 125 ແລະ ຊູໂມ້ເອັກ ແລະ ຮ່ວມກັບ ທ້າວ ມູນ 7 ຄັ້ງ ໄດ້ລົດຈັກ ຈໍານວນ 10 ຄັນ ມີເອັມສະແລດ, ຊູໂມ້ເອັກ, ເວບ 100 ຈໍານວນ 8 ຄັນ ແລ້ວນຳເອົາໄປຂາຍໃຫ້ ທ້າວ ໄກສອນ ຢູ່ບ້ານເມືອງງອຍ ເມືອງງອຍ ແຂວງຫຼວງພະບາງ 12 ຄັນ ແລະ ໄດ້ຂາຍໃຫ້ ທ້າວ ປິ່ນ 1 ຄັນ ໂດຍໄດ້ລາຄາຄັ້ນລະ 2.500.000-5.000.000 ກີບ.

ຜ່ານການສືບສວນຂອງເຈົ້າໜ້າທີ່, ພວກກ່ຽວສາລະພາບວ່າ ໄດ້ກໍ່ເຫດກະທຳຜິດແທ້. ດັ່ງນັ້ນ; ຄະນະສານ ຈຶ່ງເຫັນວ່າການກະທຳຂອງພວກຈຳເລີຍ ເປັນການກະທຳຜິດໂດຍເຈດຕະນາ ເນື່ອງຈາກວ່າ ພວກຈໍາເລີຍ ຈົງໃຈລັກເອົາຊັບຂອງບຸກຄົນອື່ນມາເປັນຂອງຕົນ, ເປັນການກະທຳເປັນອາຈີນ, ເຊິ່ງພວກຈໍາເລີຍກໍຮູ້ດີວ່າ ການກະທໍາຂອງຕົນນັ້ນເປັນການກະທໍາຜິດຕໍ່ກົດໝາຍ ເພາະວ່າພວກຈຳເລີຍເປັນບຸກຄົນທີ່ ມີສະຕິຊຳປັດຊັນຍະສົມບູນດີ ແລະ ເຖິງອາຍຸ ກະສຽນທາງອາຍາແລ້ວ, ສາມາດຮູ້ໄດ້ວ່າ ການກະທໍາຂອງຕົນແຕ່ຍັງເຈດຕະນາກະທໍາລົງໄປ.

ນອກນີ້, ທ້າວ ແອນ້ອຍ ຍັງເຄີຍຕ້ອງໂທດມາແລ້ວ 1 ຄັ້ງ ຂໍຫາຊຸກເຊື່ອງຊັບຢ່າງຜິດກົດ ໝາຍສານໄດ້ຕັດສິນ 1 ປີ 10 ເດືອນ. ດັ່ງນັ້ນ, ສານຈຶ່ງເຫັນຄວນຕັດສິນຈຳຄຸກ ທ້າວ ແອ ນ້ອຍ ຕາມປະມວນກົດໝາຍອາຍາ ມາດຕາ 231 ວັກ 3. ສ່ວນ ທ້າວໄກສອນ ແລະ ທ້າວ ປີ່ນ ທີ່ພວກຈຳເລີຍ ໃຫ້ການຊັດທອດວ່າເປັນຜູ້ຮ່ວມຂະບວນການ ແລະ ຮັບຊື້-ຂາຍຊັບຜິດກົດໝາຍນັ້ນ. ປັດຈຸບັນ, ແມ່ນໄດ້ເອົາຕົວຫຼົບໜີ ເເລະ ໄດ້ມີຄໍາສັ່ງຈັບຕົວຈາກອົງການໄອຍະການປະຊາຊົນແລ້ວ.