ໃນວັນທີ 10 ຕຸລາ 2020 ທີຜ່ານມາ, ອະດີດນັກຮຽນ ຮຸ່ນທີ 22 ສົກຮຽນ 2002-2003 ໄດ້ສ້າງຂະບວນການເຕະບານມິດຕະພາບ ​ແລະ ມອບ​ວັດຖຸ​ອຸປະກອນ​ການ​ຮຽນ-ການ​ສອນ ເນື່ອງໃນວັນຄູແຫ່ງຊາດ 7 ຕຸລາ 2020 ຄົບຮອບ 26 ປີ (7 ຕຸລາ 1994-7 ຕຸລາ 2020); ໂດຍ​ການ​ເຂົ້າ​ຮ່ວມ ​ແລະ ​ເປັນ​ປະທານຂອງ ພັທ ທະວີ​ພອນ ຮັກໜໍ່ລາດ ຜູ້ອຳນວຍການ​ໂຮງຮຽນ ວັດທະນະທຳ ຫຼັກ 67 ມີ ຄະນະ​ອຳນວຍ​ການ, ອະດີດຄູ-​ອາຈານ ແລະ ຄູ​-ອາຈານຜູ້ປະຈໍາການ; ນັກຮຽນ, ອະດີດນັກຮຽນ ຮຸ່ນ​ທີ 22 ​ແລະ ນັກທຸລະກິດ​ເຂົ້າ​ຮ່ວມ.

ໃນ​ພິທີ ໄດ້​ມີ​ການສ້າງ​ຂະ​ບວນການ​ບານເຕະ​ມິດຕະພາບ ​ເພື່ອ​ເປັນ​ການຮັດ​ແໜ້ນຄວາມ​ສາມັກຄີ ລະຫວ່າງ​ ອະດີດນັກຮຽນ ຮຸ່ນ​ທີ 22 ສົກຮຽນ 2002-2003 ​ແລະ ຄູອາ​ຈານ ​ໂຮງຮຽນ​ວັດທະນະ​ທໍາ ຫຼັກ 67 ​ໃຫ້​ມີ​ບັນຍາກາດ​ເບີກບານ​ມ່ວນ​ຊື່ນ; ນອກ​ນັ້ນ, ຍັງ​ໄດ້​ມີ​ການ​ມອບ​ວັດຖຸ​ອຸປະກອນ​ການ​ຮຽນ-ການ​ສອນຈຳນວນໜຶ່ງ​ ໃຫ້​​ແກ່ໂຮງຮຽນ ລວມມູນ​ຄ່າທັງໜົດ 15.000.000 ກີບ ( ສິບ​ຫ້າ​ລ້ານ​ກວ່າ​ກີບ) ເປັນຕົ້ນແມ່ນ ຄອມ​ພີ​ວ​ເຕີຕັ້ງໂຕະ ຈຳນວນ 1 ຊຸດ; ປິຼນ​ເຕີ້ ຈຳນວນ 1 ຊຸດ ​ແລະ ປຶ້ມ​ແບບຮຽນ ຈຳນວນ 38 ລາຍການ.

ພິ​ເສດ, ໃນການສ້າງຂະບວນການກິດຈະກຳຄັ້ງນີ້ ທ່ານ ທິລະ​ພົນ ​ໂກສີ​ພັນ ຜູ້ອຳນວຍການ ສະ​ຖາບັນ​ເງິນ​ຈຸ​ລະ​ພາກ ທີ່​ຮັບ​ເງິນ​ຝາກ ດອກ​ຄູນ ຈຳກັດ ສຳນັກງານໃຫ່ຍ ທີ່ ນະຄອນຫຼວງວຽງຈັນ ແລະ ສະ​ຖາບັນ​ເງິນ​ຈຸ​ລະ​ພາກ ທີ່​ຮັບ​ເງິນ​ຝາກ ດອກ​ຄູນ ຈຳກັດ ສາຂາ​ ຮ່ອງ​ງົວ ​ເມືອງ​ ນາ​ຊາຍ​ທອງ ນະຄອນຫຼວງວຽງຈັນ, ພ້ອມ​ດ້ວຍ ທ່ານ ສີສະຫຼຽວ ສະ​ແຫວ​ງສຶກສາ ​ແລະ ທ່ານ ວິ​ເສດ ສະ​ແຫວ​ງສຶກສາ ຍັງໄດ້​ໃຫ້ການອຸປະຖໍາປະກອບສ່ວນ​ອຸປະກອນ​ການ​ຮຽນ-ການ​ສອນ ຈຳນວນ 93 ລາຍການ ແລະ ອຸປະກອນຮັບໃຊ້ໃນຂະບວນການກິລາຈຳນວນໜຶ່ງ ລວມມູນຄ່າທັງໜົດ 6.075.000 ກີບ (ຫົກລ້ານເຈັດສີບຫ້າພັນກີບ) ​ເຂົ້າ​ໃນ​ງານ​ຢ້ຽມຢາມ ​ແລະ ​ແລກປ່ຽນບົດຮຽນ ລະຫວ່າງ ​ອະດີດ ​ນັກຮຽນ ​ກັບ​ ຄູອາຈານ ​ໂຮງຮຽນ ຫຼັກ 67.

ພັທ ທະວີພອນ ຮັກໜໍ່ລາດ ​ຜູ້​ອໍານວຍ​ການ​ໂຮງຮຽນ ​ໄດ້​ສະ​ແດງ​ຄວາມ​ຂອບ​ອົກ​ຂອບ​ໃຈ​ຢ່າງ​ຊຸດ​ຊຶ້ງ ຕໍ່​ການ​ມາ​ຢ້ຽມຢາມ ສ້າງ​ຂະ​ບວນການ​ແລກປ່ຽນ ​ແລະ ຖອດຖອນ​ບົດ​ຮຽນ ຂອງ​ອາ​ດີດ​ນັກຮຽນ ​ຮຸ່ນ​ທີ 22 ພິ​ເສດ​ຍັງ​ໄດ້​ນໍາ​ເອົາ​ວັດຖຸອຸປະກອນ​ຕ່າງ​ໆ ມາ​ມອບ​ໃຫ້​​ແກ່ໂຮງຮຽນ​ພວກ​ເຮົາ.

ທ້າຍນີ້, ຂໍ​ອວຍ​​ໄຊອັນ​ປະ​ເສີດ​ແດ່​ຄູ​ລາວ​ທົ່ວ​ປະ​ເທດຈົ່ງ​ມີ​ມີ​ແຕ່​ຄວາມສຸກ​ຄວາມ​ຈະ​ເລີ​ນ ມີ​ພາລະ​ນາ​ໄມ​ສົມບູນ. ​ເວົ້າ​ລວມ, ເວົ້າ​ສະ​ເພາະແມ່ນຄູ​ອາ​ຈານ​ໃນ​ກຳລັງ ປກສ ​ແລະ ຄູ​ອາຈານ​ໂຮງ ຮຽນ​ວັດທະນະ​ທໍາ ​ຫຼັກ 67 ຕະຫຼອດ​ຮອດ​ນ້ອງໆ​ນັກຮຽນ​; ອະດີດ​ນັກຮຽນຮຸ່ນ​ທີ 22 ​ແລະ ນັກທຸລະກິດທີ່​ມາ​ຮ່ວມ​ງານໃນ​ຄັ້ງ​ນີ້ ຈົ່ງ​ມີ​​ແຕ່ສຸຂະພາບ​ເຂັ້ມ​ແຂງ, ປະສົບ​ຜົນສຳ​ເລັດ​ໃນໜ້າທີ່​ວຽກງານ​ໄດ້​ຮັບ​ໄຊຊະນະ​ໃຫຍ່​ຫຼວງ​ກວ່າ​ເກົ່າ.