ຫ້ອງພະລາທິການ ປກສ ແຂວງອຸດົມໄຊ ໄດ້ສຳເລັດຊຸດຝຶກອົບຮົມໄລຍະສັ້ນ ປະຈຳປີ 2020 ໃນວັນທີ 7 ຕຸລາ ຜ່ານມາ, ໂດຍເປັນປະທານຂອງ ພັທ ຄຳຜາຍ ບຸດຕະພົງ ຫົວໜ້າຫ້ອງພະລາທິການ ປກສ ແຂວງ, ມີ ພັອ ສີວອນ ໄຊຍະວົງ ຫົວໜ້າກອງບັນຊາການ ປກສ ແຂວງອຸດົມໄຊ, ມີຄະນະພັກຄະນະບັນຊາ, ຄູຝຶກ ແລະ ນັກສຳມະນາກອນ ຈາກບັນດາຫ້ອງ, ກອງອ້ອມຂ້າງ ປກສ ແຂວງ ແລະ ປກສ 7 ເມືອງເຂົ້າຮ່ວມ ທັງໝົດ 60 ກວ່າສະຫາຍ.
ການຝຶກອົບຮົມຄັ້ງນີ້, ນັກສຳມະນາກອນ ໄດ້ພ້ອມກັນຝຶກ ແລະ ຮຽນຮູ້ກ່ຽວກັບເອກະສານຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບເກັບລາຍຮັບຂັ້ນກະຊວງ, ຄຳສັ່ງວ່າດ້ວຍການຈັດຕັ້ງປະຕິບັດການຈັດເກັບລາຍຮັບຜ່ານປະຕູດຽວ, ເອກະສານທີ່ຕັ້ງພາລະບົດບາດສິດໜ້າທີ່ພະແນກຄຸ້ມຄອງການຜະລິດ-ທຸລະກິດ, ວຽກງານຄຸ້ມຄອງເຕັກນິກ ແລະຍຸດໂທຫຼັກການຄຸ້ມຄອງ, ປົກປັກຮັກສາ ແລະ ການນຳໃຊ້ເຕັກນິກ, ຍຸດໂທ; ເອກສານທີ່ຕັ້ງພາລະບົດບາດສິດໜ້າທີ່, ສະຖິຕິພະແນກຄຸ້ມຄອງກໍ່ສ້າງ-ຊັບສິນ; ບົດແນະນຳວິທີການການເກັບລາຍຮັບລວມສູນປະ ຕູດຽວ ແລະ ພື້ນຖານການອະນຸມັດງົບປະມານ; ລາຍຈ່າຍງົບປະມານ; ບົດສະຫຼຸບລາຍຮັບຈາກຄ່າທຳນຽມ ແລະ ລາຍຮັບວິຊາການ; ປຶ້ມບັນ ຊີ ປະຈຳວັນລາຍຮັບ-ລາຍຈ່າຍ ບັນຊີເງິນຝາກ 471; ລາຍຈ່າຍບ້ວງເງິນນະໂຍບາຍ ແລະ ເງິນອຸດໜູນຕ່າງໆ; ບັນຊີປະຈຳວັນ ຕິດຕາມບ້ວງ ບໍລິຫານປົກກະຕິ, ບັນຊີປະຈຳວັນຕິດຕາມລາຍຈ່າຍບ້ວງເງິນລາຍຈ່າຍອື່ນໆ, ບັນຊີປະຈຳວັນ ຕິດຕາມບ້ວງເງິນການລົງທຶນຂອງລັດ, ບັນຊີປະຈຳວັນ ລາຍຮັບຄ່າທຳນຽມ, ຄ່າບໍລິການແລະຄ່າປັບໃໝ່ຕ່າງໆ, ບັນຊີປະຈຳວັນການຮັບເງິນພົວພັນກັບຄັງເງິນ, ລາຍຈ່າຍ ແລະ ລາຍຮັບລໍຖ້າສະສາງ, ບັນຊີີປະຈຳວັນຕິດຕາມລາຍຮັບ-ລາຍຈ່າຍເງິນ ສົດ, ໃບດຸ່ນດ່ຽງກ່ອນການກວດນັບ ແລະ ຕາຕະລາງອື່ນໆອີກຈຳນວນໜຶ່ງ; ຜ່ານການປະຕິບັດຕົວຈິງສາມາດຕີລາຄາຄວາມຮັບຮູ້ເຂົ້າໃຈຂອງນັກສຳມະນາກອນ ສະເລ່ຍ 80%.
ຕອນທ້າຍ, ພັອ ສີວອນ ໄຊຍະວົງ ໄດ້ສະແດງຄວາມຍ້ອງຍໍຊົມເຊີຍທີ່ນັກສຳມະນາກອນ ໄດ້ພ້ອມກັນເອົາໃຈໃສ່ໃນການຝຶກອົບຮົມໃນຄັ້ງນີ້ ຈົນປະສົບຜົນສຳເລັດດ້ວຍດີ; ພ້ອມທັງ ເນັ້ນໃຫ້ບັນດານັກສຳມະນາກອນຈົ່ງນຳເອົາເນື້ອໃນຈິດໃຈຂອງການຝຶກອົບຮົມໃນຄັ້ງນີ້ ໄປຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງ ຢ່າງມີຈຸດສຸມດ້ວຍຄວາມຮັບຜິດຊອບສູງ ແລະເອົາໃຈໃສ່ການເມືອງນຳພາແນວຄິດ ເປັນຕົ້ນແມ່ນວຽກ ງານພະລາທິການໃຫ້ມີຄວາມໂປ່ງໃສ, ເອົາໃຈໃສ່ຄຸ້ມຄອງລາຍຮັບເຂົ້າປະຕູດຽວ ເພື່ອເຮັດໃຫ້ວຽກງານພະລາທິການ ມີຄວາມເຂັ້ມແຂງທັງປະລິມານ ແລະ ຄຸນນະພາບ ເທື່ອລະກ້າວ.