ພາຍຫຼັງ ເຈົ້າໜ້າທີ່ ປກສ ເມືອງສິງ ແຂວງຫຼວງນໍ້າທາ ໄດ້ກວດພົບສາວຈີນຈໍານວນ 4 ຄົນ ທີ່ລັກລອບເຂົ້າເມືອງຜິດກົດໝາຍ. ດັ່ງນັ້ນ, ວັນທີ 15 ຕຸລາ 2020 ຈຶ່ງໄດ້ສົ່ງຕົວກັບຄືນປະເທດ ໂດຍການສົ່ງຂອງ ພັຕ ແອສະຫວັນ ທີບພະຍອດແກ້ວ ຮອງຫົວໜ້າພະແນກສັນຕິບານ ປກສ ເມືອງສິງ ແລະ ກ່າວຮັບໂດຍ ພັຕ ຈາງລີ ຮອງຫົວໜ້າດ່ານທ້ອງຖິ່ນສະເຫີ ເມືອງຫຼ້າ ສປ ຈີນ ພ້ອມດ້ວຍພາກສ່ວນກ່ຽວຂ້ອງທັງສອງຝ່າຍ ເຂົ້າຮ່ວມ.
ໃນນີ້, ມີພົນລະເມືອງຈີນທີ່ລັກລອບເຂົ້າ ສປປ ລາວ ໂດຍບໍ່ຜ່ານດ່ານ ແລະ ບໍ່ມີເອກະສານອະນຸຍາດເຂົ້າ-ອອກປະຕູດ່ານ ຊື່ ນາງ ຈາວສື່ຊີ ອາຍຸ 29 ປີ, ນາງ ຢາງເພີງແຢະ ອາຍຸ 32 ປີ, ນາງ ຊົງຈືຍີນ ອາຍຸ 21 ປີ ແລະ ນາງ ໂຈຊີເຫີ ອາຍຸ 20 ປີ.
ຈຸດປະສົງທີ່ລັກລອບເຂົ້າເມືອງ ແມ່ນເພື່ອຈະຊອກວຽກເຮັດງານທຳຢູ່ເຂດສາມຫຼຽມຄຳ ແຂວງບໍ່ແກ້ວ, ແຕ່ພວກກ່ຽວລັກລອບເຂົ້າມາແບບບໍ່ຖືກຕ້ອງຕາມລະບຽບຫຼັກການ. ດັ່ງນັ້ນ, ທາງເຈົ້າໜ້າທີ່ ກອງບັນຊາການ ປກສ ເມືອງສີງ ແຂວງຫຼວງນ້ຳທາ ຈຶ່ງມອບໃຫ້ກັບ ເຈົ້າໜ້າທີ່ ສປ ຈີນ ເພື່ອໄປສຶກສາອົບຮົບ, ກ່າວເຕືອນ ແລະ ບໍ່ໃຫ້ລັກລອບເຂົ້າມາອີກໃນຄັ້ງຕໍ່ໄປ.
