ປະຊາຊົນເມືອງພຽງ ແລະ ເມືອງໄຊຍະບູລີ ຈໍານວນ 33 ຄອບຄົວ ໄດ້ຈ່າຍເງິນລ່ວງໜ້າຈໍານວນ 60 ລ້ານກວ່າກີບ ໃຫ້ຜູ້ຕາງໜ້າບໍລິສັດໄຟຟ້າເອກະຊົນແຫ່ງໜຶ່ງ ເພື່ອໃຫ້ມາຕິດຕັ້ງໄຟຟ້າເຂົ້າຄົວເຮືອນ ແຕ່ສຸດທ້າຍຈ່າຍໃຫ້ບຸກຄົນທີ່ແອບອ້າງ ເຮັດໃຫ້ສູນເສຍເງິນຈໍານວນດັ່ງກ່າວ; ດັ່ງນັ້ນ, ຈຶ່ງແຈ້ງເຈົ້າໜ້າທີ່ຈົນນໍາໄປສູ່ກັບຈັບຕົວຜູ້ແອບອ້າງໄດ້ ໃນວັນທີ 4 ກໍລະກົດ 2020 ມາດໍາເນີນຄະດີ.
ເຈົ້າໜ້າທີ່ພະແນກຕຳຫຼວດ ປກສ ເມືອງ ແລະ ແຂວງໄຊຍະບູລີ ໃຫ້ຮູ້ວ່າ:
ໄດ້ມີບຸກຄົນເຄື່ອນໄຫວຕົວະຍົວະຫຼອກລວງປະຊາຊົນ ຢູ່ເມືອງພຽງ ຈໍານວນ 2 ບ້ານ ມີ 3 ຄອບຄົວ ແລະ ເມືອງໄຊຍະບູລີ ຈໍານວນ 11 ບ້ານ ມີ 30 ຄອບຄົວ ໂດຍແອບອ້າງເປັນຜູ້ຕາງໜ້າບໍລິສັດໄຟຟ້າຂອງເອກະຊົນ ດ້ວຍການເຂົ້າຫາ ແລະ ລະດົມໃຫ້ແຕ່ລະຄອບຄົວທີ່ມີເງື່ອນໄຂຕິດຕັ້ງໄຟຟ້າເຂົ້າເຮືອນ ໂດຍຈ່າຍຄ່າຕິດຕັ້ງລ່ວງໜ້າ.
ຈາກນັ້ນ, ຈຶ່ງມີປະຊາຊົນຫຼົງເຊື່ອ ແລະ ຈ່າຍເງິນຈໍານວນ 60 ລ້ານກວ່າກີບ; ຜ່ານໄປໄດ້ໄລຍະໜຶ່ງ ກໍບໍ່ເຫັນມີການຕິດຕັ້ງໄຟຟ້າເຂົ້າເຮືອນແຕ່ຢ່າງໃດ, ຕໍ່ມາຈຶ່ງສືບຮູ້ຕາມພາຍຫຼັງວ່າ ເປັນຄົນແອບອ້າງມາຕົວະເອົາເງິນ ຈົນນໍາໄປສູ່ການຈັບຕົວ.
ຜ່ານການສືບສວນ-ສອບສວນ, ທ້າວ ໄຊຄໍາ ສາລະພາບວ່າ:
ໃນໄລຍະປີ 2018-2019, ໄດ້ເດີນທາງອອກຈາກບ້ານໃໝ່ໜອງຄວາຍ ເມືອງວຽງຄໍາ ແຂວງວຽງຈັນ ໄປ ແຂວງໄຊຍະບູລີ ໂດຍມີຈຸດປະສົງເພື່ອເຄື່ອນໄຫວຕົວະຍົວະຫຼອກລວງເອົາເງິນປະຊາຊົນ ໂດຍໃຊ້ຮູບການແອບອ້າງເປັນຜູ້ຕາງໜ້າບໍລິສັດໄຟຟ້າຂອງເອກະຊົນ ລົງກວດກາຕິດຕັ້ງໄຟຟ້າເຂົ້າເຮືອນໃຫ້ປະຊາຊົນ ຢູ່ເຂດເມືອງພຽງ ແລະ ເມືອງໄຊຍະບູລີ ໂດຍນຳໃຊ້ລົດກະບະວີໂກ້ ໝາຍເລກທະບຽນ ກດ 5339 ກຳແພງນະຄອນ ເຄື່ອນໄຫວຢູ່ແຕ່ລະບ້ານ; ໃນເບື້ອງຕົ້ນ, ໄດ້ລົງສຳພາດຫົວໜ່ວຍຄອບຄົວ, ພ້ອມທັງລະດົມໃຫ້ແຕ່ລະຄອບຄົວທີ່ມີເງື່ອນໄຂຕິດຕັ້ງໄຟຟ້າເຂົ້າເຮືອນ ຕ້ອງໄດ້ຈ່າຍຄ່າຕິດຕັ້ງລ່ວງໜ້າ ແຕ່ພາຍຫຼັງໄດ້ເງິນແລ້ວ ໄດ້ນຳໄປໃຊ້ຈ່າຍຈົນໝົດ.
ຈາກການເຄື່ອນໄຫວມາໄດ້ໄລຍະໜຶ່ງ ຈຶ່ງຖືກຜູ້ເສຍຫາຍຮູ້ວ່າ: ເປັນບຸກຄົນແອບອ້າງ ຈຶ່ງໄດ້ແຈ້ງຄວາມຕໍ່ອຳນາດການປົກຄອງບ້ານ ແລະ ເຈົ້າໜ້າທີ່ກ່ຽວຂ້ອງ ລົງກວດກາຕົວຈິງ ແລະ ໃນທີ່ສຸດກໍຖືກເຈົ້່າໜ້າທີ່ຄວບຄຸມຕົວໄປດໍາເນີນຄະດີ ໃນຂໍ້ຫາສໍ້ໂກງຊັບພົນລະເມືອງ.
