ວັນທີ 24 ຕຸລາ ຜ່ານມາ, ທ່ານທອງລຸນສີສຸລິດນາຍົກລັດຖະມົນຕີ ພ້ອມຄະນະໄດ້ເຄື່ອນໄຫວຢ້ຽມຢາມ ແລະ ຊຸກຍູ້ວຽກງານຢູ່ແຂວງຈຳປາສັກ,ໂດຍມີ ທ່ານມະໄລທອງ ກົມມະສິດ ຮອງເຈົ້າແຂວງຈຳປາສັກ,ພ້ອມດ້ວຍ ທ່ານ ເມກສະຫວັນ ພົມພິທັກ ປະທານສະພາປະຊາຊົນ ແຂວງຈຳປາສັກ ແລະ ພະນັກງານຫຼັກແຫຼ່ງອ້ອມຂ້າງແຂວງເຂົ້າຮ່ວມ.
ທ່ານ ມະໄລທອງ ກົມມະສິດ ໄດ້ລາຍງານຫຍໍ້ກ່ຽວກັບສະພາບການພັດທະນາເສດຖະກິດ-ສັງຄົມ, ແຜນງົບປະມານ-ເງິນຕາ ໄລຍະ9 ເດືອນ ປີ 2020 ໃຫ້ຮູ້ວ່າ: ໂຄງລ່າງພື້ນຖານດ້ານຕ່າງໆ ໃນແຂວງຈຳປາສັກ ໄດ້ຮັບການກໍ່ສ້າງ ແລະ ປັບປຸງດີຂຶ້ນຢ່າງຕໍ່ເນື່ອງ, ມູນຄ່າລວມ ຍອດຜະລິດຕະພັນພາຍໃນ (GDP) ປະຕິບັດໄດ້ 12.620,76 ຕື້ກີບ, ທຽບໃສ່ແຜນປີ ປະຕິບັດໄດ້ 62,78%, ສະເລ່ຍລາຍຮັບ ໃສ່ຫົວຄົນໄດ້ 1.889 ໂດລາສະຫະລັດ, ການເກັບລາຍຮັບເຂົ້າງົບປະມານ ປະຕິບັດໄດ້ 822,62 ຕື້ກີບ.ທຽບໃສ່ແຜນປີ ປະຕິບັດໄດ້ 56,5%.
ທຽບໃສ່ໄລຍະດຽວກັນ ຫຼຸດລົງ16,5%, ແຜນລາຍຈ່າຍ ປະຕິບັດໄດ້ 371,94 ຕື້ກີບ ເທົ່າກັບ 49,2% ຂອງແຜນປີ,ທຽບໃສໄລຍະດຽວ ກັນ ຫຼຸດລົງ21,46%,ວຽກງານການລົງທຶນ ສາມາດຂົນຂວາຍຈາກທຸກແຫຼ່ງທຶນ3.283,81ຕື້ກີບ,ທຽບໃສ່ແຜນປີປະຕິບັດໄດ້57,12%, ທຽບໃສ່ໄລຍະດຽວກັນ ຫຼຸດລົງ 8,39%.ໃນນັ້ນ, ການລົງທຶນຂອງລັດ16,97 ຕື້ກີບ, ທຶນຊ່ວຍເຫຼືອ (ODA) 125,92 ຕື້ກີບ, ການລົງ ທຶນເອກະ ຊົນ ພາຍໃນ ແລະ ຕ່າງປະເທດ 131,82 ຕື້ກີບ ແລະ ທຶນສິນເຊື່ອທະນາຄານ 3.009,1 ຕື້ກີບ.
ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ເນັ້ນໃຫ້ອົງການປົກຄອງ ແຂວງຈຳປາສັກ ທຸກຂັ້ນ ແລະ ພາກສ່ວນທີ່ກ່ຽວຂ້ອງສືບຕໍ່ຄົ້ນຄວ້າພັດທະນາແຂວງຈຳປາສັກ ເຮັດໃຫ້ເສດຖະກິດຂະຫຍາຍຕົວ, ວຽກງານບໍລິການປະຊາຊົນນັບມື້ດີຂຶ້ນ, ຮັບປະກັນໄດ້ວຽກງານປ້ອງກັນຊາດ-ປ້ອງກັນຄວາມສະຫງົບຮອບດ້ານ; ເອົາໃຈໃສ່ປະຕິບັດມາດຕະ ການປ້ອງກັນ,ຄວບຄຸມ,ສະກັດກັ້ນ ແລະ ແກ້ໄຂການແພ່ລະບາດຂອງພະຍາດໂຄວິດ-19 ຕາມຄະນະສະເພາະກິດວາງອອກ ແຕ່ລະໄລຍະຢ່າງເຂັ້ມງວດ, ພ້ອມທັງປັບປຸງແບບແຜນການດຳລົງຊີວິດໃຫ້ດີຂຶ້ນກວ່າເກົ່າ.
ໃນການເຄື່ອນໄຫວຊຸກຍູ້ວຽກງານຢູ່ ແຂວງຈຳປສັກ ຄັ້ງນີ້, ທ່ານນາຍົກລັດຖະມົນຕີ ພ້ອມຄະນະ ຍັງໄດ້ໄປຢ້ຽມຢາມ ແລະ ຕິດຕາມສະພາບ ການ ປິ່ນປົວຄົນເຈັບຢູ່ໂຮງໝໍແຂວງ,ພ້ອມທັງມອບເງິນຊ່ວຍເຫຼືອໂຮງໝໍດັ່ງກ່າວ ແລະ ໄດ້ໄປຢ້ຽມຢາມສູນພັດທະນາສີມືແຮງງານພາກໃຕ້ ແລະ ເຂດເສດຖະກິດພິເສດ ປາກເຊ-ຍີ່ປຸ່ນ ຕື່ມອີກ.