ວັນທີ 28 ຕຸລາ ນີ້, ພະແນກຕໍາຫຼວດສະກັດກັ້ນ ແລະ ຕ້ານອັກຄີໄພ ນະຄອນຫຼວງວຽງຈັນ (ນວ) ພ້ອມດ້ວຍທີມງານ ລົງຝຶກອົບຮົມວິທີມອດໄຟໃຫ້ສະຖາບັນຄົ້ນຄວ້າໂຍທາທິການ ແລະ ຂົນສົ່ງ ກະຊວງ ຍທຂ, ນໍາໂດຍ ພັທ ຄໍາເພັດ ດາລາວົງ ຫົວໜ້າພະແນກຕໍາຫຼວດສະກັດກັ້ນ ແລະ ຕ້ານອັກຄີໄພ ນວ, ມີ ທ່ານ ນາງ ພອນສະຫວັນ ແພງສີດາ ຫົວໜ້າສະຖາບັນ ພ້ອມດ້ວຍຫົວໜ້າ-ຮອງຫ້ອງການ, ກົມກອງ ແລະ ພະນັກງານເຂົ້າຮ່ວມ.
ພັຕ ບຸນມີ ແສງອາລຸນ ຮອງຫົວໜ້າໂຄສະນາອົບຮົມ ກ່າວວ່າ: ການເກີດອັກຄີໄພ ແມ່ນເກີດຂຶ້ນຢ່າງຫຼວງຫຼາຍໃນຂອບເຂດທົ່ວປະເທດ ບໍ່ວ່າຈະເກີດມາຈາກສາເຫດມະນຸດສ້າງຂຶ້ນ ຫຼື ເກີດໂດຍທໍາມະຊາດ ເຊິ່ງບັນຫາດັ່ງກ່າວ ໄດ້ສົ່ງຜົນໃຫ້ສະທົບຢ່າງໜັກໜ່ວງທັງດ້ານຊັບສິນ ແລະ ຊີວິດສ່ວນລວມໝູ່ ແລະ ສ່ວນຕົວ.ທັງນີ້, ກໍຍ້ອນຄວາມປະໝາດຂາດສະຕິ-ເລີນເລີຂອງຜູ້ຊົມໃຊ້ເຄື່ອງໄຟຟ້າ ເພື່ອອໍານວຍຄວາມສະ ດວກຕ່າງໆເຂົ້າໃນຊີວິດປະຈໍາວັນ ໂດຍສະເພາະການນໍາໃຊ້ຖັງແກ໊ດ.
ກ່ອງເຕີໄຟເກົ່າ ບໍ່ມີການປ່ຽນຖ່າຍ,ການໃຊ້ໝໍ້ກະທະ,ການຈູດທູບທຽນ ແລະ ຈູດຂີ້ເຫຍື້ອຊະຊາຍ ແລ້ວບໍ່ດັບ-ມອດ ເຮັດໃຫ້ສ່ຽງທີ່ຈະເກີດໄຟລຸກລາມໄໝ້ເຮືອນໄດ້.ນອກຈາກນີ້,ຍັງໄດ້ແນະນໍາວິທີການນໍາໃຊ້ຖັງແກ໊ດ ແລະ ການໃຊ້ບັ້ງມອດໄຟ ເຂົ້າໃນເວລາເກີດເຫດຕົວຈິງ ເພື່ອຢັບຢັ້ງແປວໄຟທີ່ກໍາລັງໄໝ້ໄດ້ທັນກັບສະພາບການ ກ່ອນລໍຖ້າເຈົ້າໜ້າທີ່ກ່ຽວຂ້ອງເຂົ້າຊ່ວຍເຫຼືອດັບໄຟ.
ໃນຕອນທ້າຍ, ພະແນກຕໍາຫຼວດສະກັດກັ້ນ ແລະ ຕ້ານອັກຄີໄພ ຍັງໄດ້ມອບໃບຢັ້ງຢືນພາຍຫຼັງທີ່ສໍາເລັດການຝຶກອົບຮົມ ໂດຍຕາງໜ້າຮັບຂອງທ່ານ ນາງ ພອນສະຫວັນ ແພງສີດາ.