ທີມເຕະບານຊາວໜຸ່ມ ປກສ ຄວ້າຂັນລາງວັນຊະນະເລີດທ່ານຮອງປະທານປະເທດ

ການແຂ່ງຂັນກິລາເຕະບານ ຊີງຂັນທ່ານຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດແຫ່ງ ສປປ ລາວ ປະຈໍາປີ 2020 ຮອບຊີງຊະນະເລີດ ລະຫວ່າງ ທີມນັກກິລາຊາວໜຸ່ມ ກະຊວງ ປກສ ແລະ ທີມນັກກິລາຊາວໜຸ່ມ ກະຊວງສຶກສາທິການ ແລະ ກິລາ ໄດ້ຈັດຂຶ້ນໃນຕອນແລງຂອງວັນທີ 18 ທັນວາ 2020 ທີ່ເດີນບານລ້ານຊ້າງ ບ້ານໜອງໄຮ່ ເມືອງຫາດຊາຍຟອງ ນະຄອນຫຼວງວຽງຈັນ, ທ່າມກາງກອງເຊຍທັງສອງຝ່າຍຢ່າງໜາແໜ້ນ,ຈົບການແຂ່ງຂັນ ເປັນຝ່າຍທີມ ປກສ ຄວ້າແຊັມໄປຄອງດ້ວຍຜົນ 3-2 ປະຕູ.

ການແຂ່ງຂັນຊີງຊະນະເລີດ ເຕັມໄປດ້ວຍບັນຍາກາດເບີກບານມ່ວນຊື່ນທາມກາງກອງເຊຍຕີກອງຮ້ອງເຮຢູ່ຂອບສະໜາມ, ເຊິ່ງທັງ 2 ທີມໄດ້ພັດປ່ຽນກັນບຸກກັນຮັບ, ຈົບເວລາຂອງການແຂ່ງຂັນຜົນປະກົດວ່າ: ທີມນັກກິລາຊາວໜຸ່ມ ກະຊວງ ປກສ ເອົາຊະນະທີມນັກກິລາຊາວ ໜຸ່ມກະຊວງສຶກສາທິການ ແລະ ກິລາ ດ້ວຍຜົນຄະ ແນນ 3-2 ປະຕູ.

ສໍາລັບລາງວັນອັນດັບທີ1 ທີມນັກກິລາຊາວໜຸ່ມກະຊວງ ປກສ ໄດ້ຮັບຂັນລາງວັນ 1ໜ່ວຍ ເງິນສົດ 1.200.000 ກີບ ແລະ ຫຼຽນ ໃຫ້ຄູຝຶກ-ນັກກິລາ 30 ຫຼຽນ ພ້ອມໃບຍ້ອງຍໍ, ອັນດັບທີ 2 ທີມນັກກິລາຊາວໜຸ່ມ ກະຊວງສຶສາທິການ ແລະ ກິລາໄດ້ຮັບເງິນສົດ 9.000.000 ກີບ ແລະ ຫຼຽນໃຫ້ຄູຝຶກ-ນັກກິລາ 30 ຫຼຽນ ພ້ອມໃບຍ້ອງຍໍ, ອັນດັບທີ 3 ທີມນັກກິລາຊາວໜຸ່ມ ທະນາຄານແຫ່ງ ສປປ ລາວ ໄດ້ຮັບເງິນສົດ 7.000.000 ກີບ ແລະ ຫຼຽນ ໃຫ້ຄູຝຶກ-ນັກກິລາ 30 ຫຼຽນ ພ້ອມໃບຍ້ອງຍໍ ແລະ ອັນອັບທີ 4 ທີມຊາວໜຸ່ມກະຊວງສາທາລະນະສຸກ ໄດ້ຮັບເງິນສົດ ຈໍານວນ 5.000.000 ກີບ ແລະ ຫຼຽນໃຫ້ຄູຝຶກ-ນັກກິລາ 30 ຫຼຽນ ພ້ອມໃບຍ້ອງຍໍ.

ທ່ານ ບຸນຕາ ເທບພະວົງ ຮອງເລຂາຄະນະບລິຫານງານ ສຊປລ, ປະທານຈັດງານແຂ່ງຂັນ ກ່າວວ່າ: ການຈັດງານການແຂ່ງຂັນຄັ້ງນີ້, ກໍເພື່ອເປັນການສ້າງຂະບວນການຂໍ່ານັບຮັບຕ້ອນ ແລະ ເປັນການສະເຫຼີມສະຫຼອງວັນ ສໍາຄັນຂອງຊາດຄື: ວັນຊາດທີ 2 ທັນວາ ຄົບຮອບ 45 ປີ (2 ທັນວາ 1975-2 ທັນວາ 2020),ວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ100 ປີ (13 ທັນວາ1920-13 ທັນວາ 2020) ແລະ ຍັງເປັນການສ້າງຜົນງານຂໍ່ານັບຮັບຕ້ອນກອງປະຊຸມໃຫຍ່ຜູ້ແທນຊາວໜຸ່ມ ທົ່ວປະເທດ ຄັ້ງທີ VIII ແລະ ກອງປະຊຸມໃຫຍ່ ຄັ້ງທີ XI ຂອງພັກ ທີ່ຈະໄດ້ຈັດຂຶ້ນໃນຕໍ່ໜ້ານີ້.

ນອກນີ້, ຍັງເປັນການເຕົ້າໂຮມຄວມສາໝັກຄີລະຫວ່າງ ຄະນະບໍລິຫານງານພັກກະຊວງ,ອົງການ,ພ້ອມດ້ວຍຄະນະຊາວໜຸ່ມ ແລະ ສະມາຊິກຊາວໜຸ່ມບັນດາກະຊວງ,ອົງການ,ນະຄອນຫຼວງໄດ້ມີໂອກາດພົບປະຮັດແໜ້ນຄວາມສາມັກຄີ,ສ້າງມິດຕະພາບທັງເປັນການສົງເສີມສຸຂະພາບ ຂອງສະມາຊິກຊາວໜຸ່ມ, ພະນັກງານ-ລັດຖະກອນໃຫ້ມີຄວາມແຂງແຮງ ກຽມພ້ອມປະຕິບັດໜ້າທີ່ການເມືອງຂອງຕົນ ໃຫ້ມີຄວາມສໍາເລັດ ພ້ອມກັນສ້າງການຫັນປ່ຽນຢ່າງຮອບດ້ານ ເພື່ອພັດທະນາປະເທດຊາດ.

ພາບ-ຂ່າວ: ແກ້ວ ອຸເພັດ