ກອງບັນຊາການ ປກສ ແຂວງເຊກອງ ໄດ້ກະກຽມຄວາມພ້ອມການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະ ຊາຊົນແຂວງຊຸດທີ 2 ໃນທົ່ວປະເທດ ຈະໄດ້ເລືອກຕັ້ງໃນວັນທີ 21ກຸມພາ 2021 ດ້ວຍການຝຶກອົບຮົມຄວາມຮູ້ດ້ານຕ່າງໆໃຫ້ພະນັກງານໃນທົ່ວກໍາລັງປ້ອງກັນຄວາມສະຫງົບ,ເມື່ອບໍ່ດົນມານີ້; ມີຄະນະພັກຄະນະກອງ,ຫົວໜ້າ,ຮອງຫ້ອງ, ຫົວໜ້າພະແນກ-ຮອງພະແນກ ແລະ ພະ ນັກງານຫຼັກແຫຼ່ງທົ່ວກອງບັນຊາການປກສ ແຂວງເຂົ້າຮ່ວມ.
ພົຈວ ສົມໄຊ ພູລະຄໍາມະນີ ຫົວໜ້າກອງບັນຊາການ ປກສ ແຂວງ ປະທານກອງປະຊຸມ ໄດ້ກ່າວວ່າ: ເພື່ອເຮັດໃຫ້ການກະກຽມເລືອກຕັ້ງສະ ມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຊຸດທີ II ເປັນບັ້ນສຶກສາອົບຮົມການເມືອງແນວຄິດຕິດພັນກັບການສ້າງຂະ ບວນການຂ່ຳນັບຮັບຕ້ອນກອງປະຊຸມໃຫຍ່ ຄັ້ງທີ XI ຂອງພັກ ແລະ ເພື່ອເຊື່ອມຊຶມກຳແໜ້ນແນວທາງນະໂຍບາຍຂອງພັກໃນການສ້າງລັດຂອງປະຊາຊົນ, ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນຢ່າງແທ້ຈິງ ເພີ່ມທະວີຄວາມສັກສິດໃນການຄຸ້ມຄອງລັດ-ຄຸ້ມຄອງສັງ ຄົມຕາມກົດໝາຍ; ເພີ່ມທະວີຄວາມເຊື່ອໝັ້ນຕໍ່ການນຳພາຂອງພັກ ແລະລະບອບໃໝ່,ເພີ່ມທະວີຄວາມສາມັກຄີເປັນເອກະພາບໃນຖັນແຖວ ພະນັກງານລັດຖະກອນ, ສະມາຊິກພັກ, ກຳລັງປະກອບອາວຸດ ແລະ ປະຊາຊົນບັນດາເຜົ່າໃຫ້ນັບມື້ໜັກແໜ້ນເຂັ້ມແຂງ.
ເປັນການເປີດບັ້ນການຝຶກອົບຮົມໃນທົ່ວພັກ,ທົ່ວປວງຊົນຢ່າງກ້ວາງຂວາງເລິກເຊິ່ງ ເພື່ອສຶກສາອົບຮົມການເມືອງແນວຄິດແລະປຸກລະດົມການເສີມຂະຫຍາຍ ຈິດໃຈຮັກຊາດຕິດພັນກັບການຮັກລະບອບປະຊາທິປະໄຕ ປະຊາຊົນ; ຍົກສູງສະຕິຊາດເປັນເອກະພາບ ແລະ ຄວາມສາ ມັກຄີເປັນປຶກແຜ່ນ, ມີສະຕິລະວັງຕົວ; ເດັດດ່ຽວເປັນເຈົ້າການຕອບຕ້ານທຸກກົນອຸບາຍ ແລະ ການກະທໍາຂອງພວກຄົນບໍ່ດີທີ່ຫວັງມ້າງເພທຳລາຍລະບອບໃໝ່ຂອງພວກເຮົາ, ການຝຶກອົບຮົມໃນຄັ້ງນີ້ ເປັນບາດກ້າວສຳຄັນໃນການປັບປຸງ ແລະ ຍົກລະດັບຄວາມຮູ້, ທັດສະນະທີ່ຖືກຕ້ອງ, ເປັນເອກະພາບຕໍ່ການນຳພາຂອງພັກ ແລະ ການຄຸ້ມຄອງຂອງລັດຕາມກົດໝາຍ.
ໃນພິທີ, ຍັງໄດ້ປະການເລື່ອນຊັ້ນໃຫ້ນາຍ ແລະ ພົນຕໍາຫຼວດ. ໃນນີ້, ເລື່ອນຊັ້ນຮ້ອຍຕີ ຂຶ້ນຮ້ອຍໂທ ມີ 4 ສະຫາຍ, ວາທີ ຂຶ້ນຮ້ອຍຕີ 4 ສະຫາຍ, ສິບເອກ ຂຶ້ນວາທີ 8 ສະຫາຍ, ສິບໂທ ຂຶ້ນສິບເອກ 61 ສະຫາຍ, ປະດັບຊັ້ນໂດຍ ພົຈວ ສົມໄຊ ພູລະຄໍາມະນີ.