ເຈົ້າໜ້າທີ່ພະແນກຕຳຫຼວດສືືບສວນ-ສອບສວນ ປກສ ແຂວງອຸດົມໄຊ ສົມທົບພາກສ່ວນກ່ຽວຂ້ອງຊັນນະສູດສົບຂອງ ນາງ ຮັກ ອາຍຸ 48 ປີ, ບ້ານວັງມົນ ເມືອງໄຊ ແຂວງອຸດົມໄຊ ທີ່ເສຍຊີວິດຢູ່ແຄມແມ່ນໍ້າກໍ ໃນສະພາບເປືອຍກາຍ, ພົບຮ່ອງຮອຍຖືກຕີດ້ວຍຂອງແຂງ ແລະ ຖືກກະທຳຊຳເລົາ.

ພັທ ສົມແພງ ລໍປະເສີດ ຮອງຫ້ອງຕຳຫຼວດ ປກສ ແຂວງ ໃຫ້ຮູ້ວ່າ: ໃນວັນທີ 18 ທັນວາ 2020, ໄດ້ຮັບແຈ້ງຈາກປະຊາຊົນວ່າພົບເຫັນຄົນເສຍຊີວິດຢູ່ແຄມແມ່ນໍ້າກໍ. ຈາກນັ້ນ, ຈຶ່ງແຕ່ງຕັ້ງພະນັກງານສົມທົບກັບ ປກສ ເມືອງໄຊ ຊັນນະສູດສົບຜູ້ຖືກເຄາະຮ້າຍຊື່ ນາງ ຮັກ ອາຍຸ 48 ປີ, ປະຊາຊົນບ້ານວັງມົນ ມີຮ່ອງຮອຍຖືກທຸບຕີດ້ວຍຂອງແຂງມີເລືອດໄຫຼອອກຫູເບື້ອງຂວາ, ມີຮອຍບາດແຜຢູ່ຫົວເບື້ອງຂວາ 1ຈຸດ, ຮອຍຊໍ້າຢູ່ງ່ອນດົ້ນ 1 ຈຸດ ແລະ ຖືກຂົ່ມຂືນກະທໍາຊຳເລົາ. ຈາກນັ້ນ, ເຈົ້າໜ້າທີ່ວິຊາສະເພາະ ຈຶ່ງໄດ້ເກັບກຳບັນດາຂໍ້ມູນຫຼັກຖານຢ່າງລະອຽດ ແລະ ວາງແຜນສືບຄົ້ນຫາເປົ້າໝາຍ. ມາຮອດວັນທີ 30 ທັນວາ 2020, ຈຶ່ງໄດ້ກັກຕົວ ທ້າວ ສົມບຸນ ອາຍຸ 20 ປີ ຢູ່ບ້ານວັງມົນ ເມືອງໄຊ ແຂວງອຸດົມໄຊ ມາສອບສວນ.

ຜ່ານການສືບສວນຜູ້ຖືກຫາສາລະພາບວ່າ: ວັນທີ 14 ທັນວາ 2020, ເວລາ 13:00 ໂມງ ໄດ້ກັບມາຈາກຫາປາຢູ່ຕາມລໍານໍ້າກໍ ໄດ້ພົບເຫັນ ນາງ ຮັກ ຢືນຢູ່ແຄມທາງລົດສົ້ນຂົວນໍ້າກໍໃກ້ບ້ານ ຈຶ່ງຄິດຢາກເສບສົມ. ຈາກນັ້ນ, ໄດ້ໄປປ່ຽນເຄື່ອງນຸ່ງຢູ່ເຮືອນກັບຄືນມາຫາ ນາງ ຮັກ ຢູ່ຈຸດດັ່ງກ່າວ. ພໍໄປຮອດທາງລົງທ່ານໍ້າກໍ ໄດ້ຈັບແຂນ ນາງ ຮັກ ລົງໄປແຄມນໍ້າ, ແຕ່ຖືກຂັດຂືນບໍ່ຍອມໄປນໍາ ຈຶ່ງຈັບເອົາໄມ້ຄ້ອນຢູ່ປ່າແຄມທາງຍາວປະມານ 60 ຊັງຕີແມັດ ມາຟາດໃສ່ງ່ອນດົ້ນ ຈຳນວນ 2 ບາດ, ຟາດໃສ່ຫົວເບື້ອງຂວາອີກ 2 ບາດ, ຈົນເຮັດໃຫ້ ນາງ ຮັກ ໝົດສະຕິລົ້ມລົງ. ແຕ່ຍັງບໍ່ທັນເສຍຊີວິດໃນເວລານັ້ນ.

ຈາກນັ້ນ, ຜູ້ກ່ຽວໄດ້ເອົາໄມ້ຄ້ອນແກ່ວງຖິ້ມເຂົ້າປ່າ ແລ້ວລາກຕົວ ນາງ ຮັກ ລົງໄປແຄມນໍ້າແລ້ວລົງມືຂົ່ມຂືນທໍາຊໍາເລົາ 1 ຄັ້ງ, ພາຍຫຼັງສຳເລັດ ນາງ ຮັກ ກໍໄດ້ເສຍຊີວິດ ແລະ ຜູ້ກ່ຽວກໍເອົາເສື້ອຂອງຜູ້ເສຍຊີວິດມາປົກໜ້າເອິກແລ້ວເອົາກ້ອນຫີນມາເຕັງອີກ ແລ້ວຜູ້ກ່ຽວກໍລ້າງຕົນຕົວກັບເມືອເຮືອນ. ມາຮອດວັນທີ 30 ທັນວາ 2020, ຈຶ່ງຖືກເຈົ້າ ໜ້າທີ່ ສືບຮູ້ລາຍລະອຽດ ແລ້ວເຂົ້າກັກຕົວ ທ້າວ ສົມບຸນ ໄປດຳເນີນຄະດີ ແລະ ໃນວັນ ທີ 31 ທັນ ວາ 2020, ເຈົ້າໜ້າທີ່ໄດ້ນໍາເອົາຄາດຕະ ກອນໄປທໍາແຜນປະກອບຄໍາຮັບສາລະພາບ.