ໃນອາທິດຜ່ານມາ, ພະແນກຕຳ ຫຼວດສະກັດກັ້ນ ແລະ ຕ້ານອັກຄີໄພ ແຂວງຈຳປາສັກ ໄດ້ລົງເຄື່ອນໄຫວຝຶກອົບຮົມວຽກງານມອດໄຟຢູ່ທີ່ບໍລິສັດ CBF ນະຄອນປາກເຊ ແຂວງຈຳປາສັກ; ໂດຍການເຂົ້າຮ່ວມຂອງ ທ່ານ ບູນອ້ອມ ໄຊຍະລາດ ຫົວໜ້າພະແນກບໍລິຫານ ຊີ້ນຳວຽກງານຮັກສາຄວາມປອດໄພພາຍໃນບໍລິສັດ; ມີ ພັທ ກອງຂັນ ພອນຈະເລີນ ຮອງຫົວໜ້າພະແນກຕຳຫຼວດສະກັດກັ້ນ ແລະ ຕ້ານອັກຕີໄພພ້ອມ ພະນັກງານວິຊາສະເພາະມອດໄຟ, ພະນັກງານ ແລະ ນັກສຳມະນາກອນພາຍໃນບໍລິສັດດັ່ງກ່າວ ເຂົ້າຮ່ວມ.
ພັຕ ສູດໃຈ ສາຍພວງເພັດ ຫົວ ໜ້າກອງໂຄສະນາພະແນກສະກັດກັ້ນ ແລະ ຕ້ານອັກຄີໄພ ໄດ້ຂຶ້ນບັນຍາຍເອກະສານຕ່າງໆກ່ຽວກັບຜົນຮ້າຍຂອງອັກຄີໄພຕໍ່ການພັດທະນາເສດຖະກິດ-ສັງ ຄົມຂອງປະເທດຊາດ, ເມື່ອໄດ້ເກີດອັກຄີໄພແລ້ວ ເຮັດໃຫ້ມີຜົນເສຍຫາຍຢ່າງມະຫາສານ ລວມທັງວັດຖຸ; ຊີວິດຈິດໃຈ ສະນັ້ນທ່ານ ຍັງໄດ້ເນັ້ນໜັກຕື່ມເລື່ອງວິທີການປ້ອງກັນເພື່ອບໍ່ໃຫ້ເກີດບັນຫາອັກຄີໄພ, ຮຽກຮ້ອງໃຫ້ທຸກຄົນ ແລະ ໜວ່ຍ ງານທີ່ກ່ຽວຂ້ອງພາຍໃນບໍລິສັດຈົ່ງມີສະຕິກວດກາກ່ຽວກັບລະບົບກົງຈັກຂອງໄຟຟ້າພາຍໃນບໍລິສັດໃຫ້ມີຄວາມຮັບຜິດຊອບສູງ ເພື່ອຄວາມຮັບປະກັນບໍ່ໃຫ້ເກີດບັນຫາດັ່ງກ່າວ.
ຈາກນັ້ນ ເຈົ້າໜ້າທີ່ວິຊາສະເພາະ ມອດໄຟກໍໄດ້ອະທິບາຍ ແລະ ສາທິດ ວິທີການນຳໃຊ້ບັ້ງມອດໄຟ, ການນຳໃຊ້ ບັ້ງອົກຊີ, ການນຳໃຊ້ແກັດຫຸງຕົ້ມ, ການຊ່ວຍເຫຼືອຄົນເຈັບໃນເວລາເກີດອັກຄີໄພວິທີການມອດໄຟ, ພ້ອມທັງໃຫ້ພະນັກ ງານ ແລະ ນັກສຳມະນາກອນພາຍໃນບໍ ລິສັດຝືກແອບຕົວຈິງ ໂດຍການຕິດຕາມຢ່າງໃກ້ຊິດຂອງເຈົ້າໜ້າທີ່ ເພື່ອຮັບປະ ກັນຄວາມປອດໄພ.
ໃນຕອນທ້າຍເຈົ້າໜ້າທີ່ພະແນກສະກັດກັ້ນ ແລະ ຕ້ານອັກຄີໄພ ປກສ ແຂວງ ໄດ້ມອບໃບຢັ້ງຢືນໃຫ້ບໍລິສັດ CBF ນະຄອນປາກເຊ ແຂວງຈຳປາສັກ ເພື່ອ ເປັນການຢັ້ງຢືນໃນການສຳເລັດການຝຶກອົບຮົມດັ່ງກ່າວ.
