ປະທານປະເທດ ເນັ້ນ 7 ໜ້າວຽກຮີບດ່ວນທີ່ກໍາລັງປ້ອງກັນຄວາມສະຫງົບປະຊາຊົນ ຕ້ອງສືບຕໍ່ເອົາໃຈໃສ່

ໃນພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງກຳລັງປ້ອງກັນຄວາມປະຊາຊົນ ຄົບຮອບ 60 ປີ ໃນວັນທີ 5 ເມສາ 2021, ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ໄດ້ຂຶ້ນກ່າວສູນທອນພົດ ພ້ອມໄດ້ເນັ້ນໜັກໃຫ້ກຳລັງປ້ອງກັນຄວາມສະຫງົບປະ ຊາຊົນ ສືບຕໍ່ເອົາໃຈໃສ່ 7 ວຽກ ງານທີ່ມີລັກສະນະຮີບດ່ວນ ເພື່ອເຮັດໃຫ້ກໍາລັງປ້ອງກັນຄວາມສະຫງົບປະຊາຊົນ ນັບມື້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງ ຄື:

1) ປັບປຸງແບບແຜນວິທີຄົ້ນຄິດ, ວິທີເຮັດວຽກ ຂອງຖັນແຖວພະນັກງານ ຂົງເຂດປ້ອງກັນຄວາມສະຫງົບ ໃຫ້ໄປທ່ວງທັນກັບສະພາບການເລັ່ງທວງປປັດຈຸບັນ, ທັງຕ້ອງຄາດຄະເນ ໃຫ້ຖືກຕ້ອງຊັດເຈນສະຖານະການທີ່ເກີດຂຶ້ນ ແລະ ທີ່ຈະເກີດຂຶ້ນ ເພື່ອກະກຽມຄວາມພ້ອມທຸກດ້ານຮັບມືໃຫ້ທັນການ, ເປັນເຈົ້າການ,ບໍ່ໃຫ້ຖືກທ່າຮັບ ໂດຍໃຫ້ມີທັງການປ້ອງກັນເຫດ,ມີທັງການແກ້ໄຂເຫດຕ່າງໆໃຫ້ທັນສະພາບການ, ຖືກວິທີ ແລະ ແນບນຽນສຸຂຸມ ແຕ່ ໜັກແໜ້ນເດັດຂາດ ສຸດທ້າຍຕ້ອງໃຫ້ໄດ້ໄຊຊະນະ.

2) ໃຫ້ວິໄຈໃຫ້ຖືກຕ້ອງ ແລະ ວາງແຜນຢ່າງຮັດກຸມ, ຈັດລຽງບູລິມະສິດ ຂອງສະພາບການທີ່ເກີດຂຶ້ນ ແລະ ມີຢູ່ປັດຈຸບັນຂອງປະເທດເຮົາ ເພື່ອວາງແຜນໃຫ້ຈັດຕັ້ງປະຕິບັດຕາມແຜນບູລິມະສິດໃຫ້ເກີດເປັນຮູບປະທໍາ, ແກ້ອັນໃດກ່ອນ, ແກ້ອັນໃດທັດໄປ, ແກ້ໄຂອັນໃດຕ້ອງໃຫ້ຕົກໄປແຕ່ລະອັນແຕ່ລະກ້າວ.

3) ເພື່ອຮັກສາ ແລະ ເສີມຂະຫຍາຍມູນເຊື້ອການປ້ອງກັນຊາດ,ປ້ອງກັນຄວາມສະຫງົບ ທົ່ວປວງຊົນຮອບດ້ານ, ກໍາລັງປະກອບອາວຸດປ້ອງກັນຄວາມສະຫງົບ ຕ້ອງສືບຕໍ່ລົງສ້າງຮາກຖານຢູ່ທ້ອງຖິ່ນໃຫ້ມີຕາໜ່າງການ ປ້ອງກັນຄວາມສະຫງົບໃຫ້ໜັກແໜ້ນເຂັ້ມແຂງ, ດຶງເອົາປະຊາຊົນເຂົ້າຮ່ວມ ແລະ ເຂົ້າຮ່ວມດ້ວຍຄວາມຈິງໃຈ ແລະ ຈິງຈັງ, ດ້ວຍຄວາມຕື່ນຕົວ ຂອງເຂົາເຈົ້າ, ຢາກໃຫ້ປະຊາຊົນ ເຂົ້າຮ່ວມ, ພະນັກງານ, ນັກຮົບປ້ອງກັນຄວາມສະ ຫງົບຕ້ອງເປັນແບບຢ່າງ, ສ້າງຄວາມເຊື່ອຫມັ້ນໃຫ້ປະຊາຊົນ,ເປັນທີ່ເພິ່ງຂອງປະຊາຊົນ, ຮ່ວມທຸກຮ່ວມສຸກກັບປະຊາຊົນ,ປະຕິບັດຄໍາຂວັນທີ່ວ່າ “ຕໍາຫຼວດ ແລະ ປະຊາຊົນ ຄືໃຫ້ເປັນຄືປາກັບນໍ້າ”.

4) ຕໍາຫຼວດປະຊາຊົນ ຕ້ອງມີນໍ້າໃຈປົກປ້ອງ ຊັບສິນສ່ວນລວມ, ຊັບສິນ ແລະ ຜົນປະໂຫຍດຂອງລັດ, ຊັບສິນ ແລະ ຜົນປະໂຫຍດ ຂອງປະຊາຊົນຢ່າງຖືກຕ້ອງ ແລະ ເປັນທໍາແທ້. ໃຫ້ປະຊາຊົນມີສ່ວນຮ່ວມ, ປະຊາຊົນ ຮ່ວມມື ແລະ ປະຊາຊົນກ້າລາຍງານບ໊ອກແສ ເມື່ອເຫັນສິ່ງ ທີ່ເກີດຂຶ້ນ ທີ່ບໍ່ຊອບມາພາກົນ ທີ່ເປັນອັນຕະລາຍຕໍ່ ສັງຄົມ ແລະ ຕໍ່ພົນ ລະເມືອງ ໃນທ້ອງຖິ່ນຂອງເຂົາ (ຫຼີກ ທີ່ສຸດການກະທໍາໃດໆ ທີ່ເຮັດໃຫ້ປະຊາຊົນຢ້ານ, ປະຊາຊົນບໍ່ກ້າເວົ້າ, ປະຊາ ຊົນບໍ່ກ້າລາຍງານ ແລະ ບໍ່ກ້າເຂົ້າເຖິງເຈົ້າໜ້າທີ່… ).

5) ກໍາລັງປ້ອງກັນຄວາມສະຫງົບ ໃນຍຸກໃໝ່ ຕ້ອງພະຍາຍາມກ້າວສູ່ຄວາມທັນສະໄໝ, ກ້າວສູ່ການ ນໍາໃຊ້ເຕັກໂນໂລຊີໃໝ່, ວິທະຍາສາດໃໝ່ທີ່ສາມາດ ເຊື່ອມສານໄດ້ຢ່າງວ່ອງໄວທັນການ ແລະ ຊັດເຈນ ທັງຢູ່ພາຍໃນ ແລະ ຕໍ່ຕ່າງປະເທດ.

6) ໃນຍຸກແຫ່ງສັງຄົມຂໍ້ມູນຂ່າວສານ ທີ່ທັນສະໄໝ ຫຼື ຍຸກຂ່າວສັງຄົມທາງອອນລາຍທີ່ແຜ່ຂະຫຍາຍນີ້, ກໍາລັງປ້ອງກັນຄວາມສະຫງົບຕ້ອງມີຕາໜ່າງເກັບກໍາຂ່າວ ແລະ ຕາໜ່າງຕໍ່ຕ້ານ, ປ້ອງກັນ ແລະ ສະກັດກັ້ນໃຫ້ທັນການ ແລະ ໄດ້ຜົນ, ບໍ່ປະປ່ອຍໃຫ້ສື່ອອນລາຍກາຍ ເປັນອາຊະຍາກໍາທະລຸເຂົ້າທໍາລາຍປະເທດຊາດ ຫຼື ການໃຊ້ສືອອນລາຍສ້າງຄວາມອົນລະເວງໃນສັງຄົມ ດ້ວຍການມ້າງຄວາມສາມັກຄີ ສ້າງຄວາມເຂົ້າໃຈຜິດ ແລະ ສ້າງຄວາມເປັນປໍລະປັກຕໍ່ກັນໃນສັງຄົມ.

7) ກໍາລັງປ້ອງກັນຄວາມສະຫງົບຂອງພວກເຮົາ ຍັງຕ້ອງໄດ້ສືບຕໍ່ປະຕິບັດແນວທາງການຕ່າງປະເທດ ໂດຍການສືບຕໍ່ຮ່ວມມື ແລະ ຍາດແຍ່ງການສະ ໜັບສະໜູນ ຈາກເພື່ອນມິດ ເປັນຕົ້ນແມ່ນຕໍ່ກັບ ສສ ຫວຽດນາມ, ສປ ຈີນ ແລະ ສະຫະພັນລັດເຊຍ ແລະ ປະເທດເພື່ອນມິດອື່ນໆ ເພື່ອປະຕິບັດພັນທະຂອງຕົນໃນຖານະເປັນພາຄີ ແລະ ເປັນສະມາຊິກຂອງອີນເຕີໂປນ, ອາຊຽນໂປນ ແລະ ອົງການຈັດຕັ້ງສາກົນອື່ນໆ.