ຍັງອີກບໍ່ພໍ່ເທົ່າໃດວັນຂ້າງໜ້າ ບຸນກຸດສົງການ ຫຼື ບຸນປີໃໝ່ລາວ ພສ 2564 ກໍຈະມາເຖິງ; ເຊິ່ງເປັນປາງບຸນໃຫຍ່ຂອງປວງຊົນລາວທັງຊາດ ສະເພາະປີນີ້ຈະບໍ່ມີການສະເຫຼີມສະຫຼອງໃຫຍ່ຄືກັບຫຼາຍປີທີ່ຜ່ານມາ ຍ້ອນການລະບາດຂອງພະຍາດໂຄວິດ-19, ລັດຖະບານ ກໍຄືຫ້ອງວ່າການສຳນັກງານນາຍົກ ກໍໄດ້ອອກແຈ້ງການກ່ຽວກັບການສະເຫຼີມສະຫຼອງບຸນປີໃໝ່ລາວ ພສ 2564 ໂດຍ ໃຫ້ແຕ່ລະພາກສ່ວນຈັດຕັ້ງປະຕິບັດຕາມຮີດຄອງປະເພນີຂອງລາວ ແລະ ຮັກສາໄດ້ມູນເຊື້ອວັດທະນະທຳ, ປະເພນີອັນດີງາມຂອງຊາດ, ເສີມສ້າງຄວາມສາມັກຄີໄມຕີຈິດມິດຕະພາບເທົ່ານັ້ນ; ແຕ່ຢ່າງໃດກໍຕາມ, ຄືດັ່ງທີ່ເຮົາຮູ້ນຳກັນແລ້ວວ່າ ສັງຄົມລາວບໍ່ວ່າຈະເປັນງານໃດໆກໍມີການພົບປະສັງສັນການດື່ມສິ່ງມຶນເມົາ ແຕ່ທຸກຄົນຈົ່ງຫຼິ້ນກິນຢ່າງມີສະຕິຢ່າໂລດໂພນເກີນໄປ, ຫຼິ້ນໃຫ້ມີຄວາມພໍເໝາະພໍດີ ແລະ ຮັບປະກັນຄວາມສະຫງົບ-ປອດໄພຄວາມເປັນລະບຽບຮຽບຮ້ອຍໃນສັງຄົມ.
ການສະເຫຼີມສະຫຼອງບຸນປີໃໝ່ລາວ ເປັນການສົ່ງເສີມວັດທະນະທຳຮີດຄອງປະເພນີອັນດີງາມຂອງຊາດລາວເຮົາຖືເອົາໂອກາດນີ້ອວຍພອນໄຊເຊິ່ງກັນແລະກັນສະຫຼອງດ້ວຍບັນຍາກາດເບີກບານມວນຊື່ນ ໂດຍຖືເອົາໂອກາດນີ້ພົບປະສັງສັນ ແລະ ບາສີສູ່ຂວັນພາຍໃນຄອບຄົວ ຫຼື ການຈັດຕັ້ງການຫົດນໍ້າອວຍໄຊໃຫ້ພອນຜູ້ອາວຸໂສ ເຂົ້າວັດຫົດສົງພຣະພຸດທະຮູບ, ຕົບພຣະທາດຊາຍ ແລະ ກິດຈະກຳອື່ນໆທີ່ມີຄຸນປະໂຫຍດ ສຳລັບເວລາຫົດສົງນ້ຳແບບມວນຊົນໃຊ້ເວລາ 3 ວັນ ຄື: ວັນທີ 14, 15 ແລະ 16 ເມສາ 2021. ໂດຍຫຼີກລ່ຽງສິ່ງອັບປະມົງຄຸນບໍ່ໃຫ້ເກີດ ຂຶ້ນເຊັ່ນ: ອັກຄີໄພ, ສຽງແຕກສຽງດັງ, ອາລະວາດຕີກັນ ຫຼື ອຸບັດຕິເຫດເປັນຕົ້ນ.
ຫຼາຍປີຜ່ານມາ, ການສະເຫຼີມສະຫຼອງສົ່ງທ້າຍປີເກົ່າຕ້ອນຮັບປີໃໝ່ລາວ ຂອງປວງຊົນລາວ ໃນຂອບເຂດທົ່ວປະເທດ ເປັນຕົ້ນແມ່ນຢູ່ນະຄອນຫຼວງວຽງຈັນ ຍັງມີຫຼາຍດ້ານທີ່ຍັງບໍ່ທັນສອດຄ່ອງກັບກັບລະບຽບກົດໝາຍ ແລະ ຮີດຄອງປະເພນີອັນດີງາມຂອງລາວ ອັນດັບຕົ້ນໆ ກໍຄືດື່ມສິ່ງມຶນເມົາແລ້ວຂັບຂີ່ລົດ, ຫຼິ້ນສິ່ງເປີເປື້ອນ ແລະ ລາມົກອະນາຈານເຊັ່ນ: ນໍ້າສີ, ນໍ້າເປື້ອນ, ນໍ້າຄັນ ແກວ່ງຖົງນໍ້າ, ແກວ່ງນໍ້າກ້ອນໃສ່ກັນ, ນຸ່ງເຄື່ອງໂປ້ເປືອຍ ເຂົ້າວັດ ແລະ ສະຖານທີ່ຊຸມຊົນ, ບາງຈຸດຕັນທາງການສັນຈອນຕາມເສັ້ນທາງແລ້ວລັດລົດຫົດນໍ້າຢູ່ກາງທາງ, ເປີດສຽງດົນຕີເນືອງນັນລົບກວນຜູ້ອື່ນ ແລະ ກາຍກຳນົດເວລາ; ນອກນີ້, ຍັງມີບາງປະກົດການຫຍໍ້ທໍ້ທີ່ເກີດຂຶ້ນ, ເຊິ່ງພວກຄົນບໍ່ດີມັກສວຍໂອກາດໄລຍະນີ້ ເປັນຕົ້ນແມ່ນປຸ້ນຈີ້-ຊິງຊັບ, ລັກຊັບ, ລວມໄປເຖິງບັນຫາຄາດຕະກໍາ, ເຊິ່ງສ້າງຄວາມບໍ່ສະຫງົບ ແລະ ຄວາມບໍ່ ເປັນລະບຽບຮຽບຮ້ອຍໃນສັງຄົມ.
ເພື່ອສະກັດກັ້ນ ແລະ ຕ້ານປະກົດການຫຍໍ້ທໍ້ໃນໄລຍະງານບຸນປີໃໝ່ນີ້, ກອງບັນຊາການ ປກສ ນະຄອນຫຼວງວຽງຈັນ ອອກແຈ້ງການເລກທີ 297/ປກສ ນວ, ລົງວັນທີ 1 ເມສາ 2021 ເລື່ອງການເພີ່ມທະວີປ້ອງກັນຮັກສາຄວາມສະຫງົບ, ຄວາມເປັນລະບຽບຮຽບຮ້ອຍໃນໄລຍະສະເຫຼີມສະຫຼອງບຸນປີໃໝ່ລາວ ພສ 2564 ຢູ່ນະຄອນຫຼວງວຽງຈັນ ກອງບັນຊາການ ປກສ ນະຄອນຫຼວງວຽງຈັນ ຈຶ່ງອອກບັນດາຂໍ້ຫ້າມດັ່ງນີ້:
- ຫ້າມບໍ່ໃຫ້ຊື້-ຂາຍສິນຄ້າ ແລະ ອຸປະ ກອນທີ່ກໍ່ໃຫ້ເກີດສຽງແຕກທຸກປະເພດ, ບໍ່ໃຫ້ ຈູດໝາກກະໂພກ, ບັ້ງໄຟດອກທຸກຊະນິດ, ບໍ່ໃຫ້ ນໍາໃຊ້ທາດລະເບີດ, ທາດແຕກ, ທາດເບື່ອ-ເຄມີ, ທາດກໍາມະລັງສີ ແລະ ວັດຖຸອອກລິດຕໍ່ສຸຂະ ພາບທີ່ເປັນຜົນລົບຕໍ່ຄວາມສະຫງົບ, ຄວາມເປັນ ລະບຽບຮຽບຮ້ອຍໃນສັງຄົມ.
- ຫ້າມໃຊ້ພາຫະນະບັນຈຸຖັງນໍ້າ, ຄຸນໍ້າ ຫຼື ທໍ່ຢາງຕໍ່ນໍ້າຈາກເຮືອນອອກມາ ເພື່ອຫົດສົງນໍ້າຄົນ ໃນຖະໜົນ ແລະ ຫ້າມລວມຕົວກັນເປັນກຸ່ມເຕັ້ນ ຟ້ອນຕາມທ້ອງຖະໜົນຢ່າງເດັດຂາດ.
- ຫ້າມບໍ່ໃຫ້ລົງຫຼິ້ນນໍ້າຢູ່ຫາດຊາຍນໍ້າຂອງ ທີ່ບໍ່ໄດ້ຮັບອະນຸຍາດຈາກທາງການ ຫຼື ບ່ອນທີ່ບໍ່ມີ ເຈົ້າໜ້າທີ່ປ້ອງກັນຮັກສາຄວາມສະຫງົບ, ຮັກ ສາຄວາມປອດໄພ ເພື່ອຫຼີກລຽງຕໍ່ສີ່ງທີ່ບໍ່ເພິ່ງປາດ ຖະໜາອາດຈະເກີດຂຶ້ນ.
- ຫ້າມບໍ່ໃຫ້ໃຊ້ນໍ້າເປິະເປື້ອນ, ນ້ໍາສີ, ນ້ໍາ ປົນກັບພືດທີ່ຄັນຄາຍ, ນ້ໍາກ້ອນໃສ່ຖົງຢາງຫົດ ຫຼື ແກ່ວງໃສ່ກັນ, ບໍ່ໃຫ້ນຸ່ງເຄື່ອງສັ້ນ-ເຂີນ ຍົ້ວຍວນທີ່ບໍ່ຖືກຕ້ອງຕາມຮີດຄອງປະເພນີ, ການທ່ຽວຫຼິ້ນ ແບບລາມົກອານາຈານ ແລະ ຫຼິ້ນການພະນັນທຸກ ປະເພດຢ່າງເດັດຂາດ.
- ຫ້າມເປີດສຽງດັງເນືອງນັນເກີນຂອບ ເຂດໃນບ້ານເຮືອນ-ຄອບຄົວ, ສໍານັກງານ-ອົງການ, ສະຖານທີ່ສາທາລະນະ, ບໍ່ໃຫ້ໃຊ້ພາຫະນະແຮ່ຄົບງັນຕາມທ້ອງຖະໜົນ, ບໍ່ຂີ່ລົດເປັນພືງເປັນ ແພ-ແລ່ນລົດໄວເກີນຂອບເຂດ, ເວລາຂັບຂີ່ລົດ ປະເພດຕ່າງໆສັນຈອນຕາມທ້ອງຖະໜົນ ຜູ້ຂັບຂີ່ຕ້ອງປະຕິບັດຕາມກົດລະບຽບຈະລາຈອນວາງອອກຢ່າງເຂັ້ມງວດ ເຊັ່ນ: ດື່ມສິ່ງມືນເມົາແລ້ວ ບໍ່ຂັບລົດ, ຂັບລົດບໍ່ດື່ມສິ່ງມືນເມົາຢ່າງເດັດຂາດ.
- ຫ້າມບໍ່ໃຫ້ຜູ້ໂດຍສານນັ່ງຫົວລົດເວລາ ຂັບຂີ່ໄປຕາມທ້ອງຖະໜົນ, ລົດບັນທຸກຂົນສົ່ງ ສິນຄ້າໜັກ-ລົດໂດຍສານບໍ່ໃຫ້ໃສ່ເກີນຂອບ ເຂດ, ຜູ້ຂັບຂີ່ພາຫະນະທຸກປະເພດຕ້ອງປະຕິ ບັດຕາມປ້າຍສັນຍານຈະລາຈອນ ແລະ ກົດລະບຽບ ການສັນຈອນຢ່າງເຄັ່ງຄັດ.
- ບັນດາຮ້ານທຸລະກິດບັນເທີງ, ຮ້ານກິນ ດື່ມໃຫ້ປະຕິບັດຕາມແຈ້ງການ, ຄໍາສັ່ງຂອງລັດ ຖະບານວາງອອກຢ່າງເຂັ້ມງວດ.
- ຫ້າມຫົດນໍ້າໃສ່ເຈົ້າໜ້າທີ່ ທີ່ກໍາລັງປະຕິບັດໜ້າທີ່ຮັກສາຄວາມເປັນລະບຽບຮຽບຮ້ອຍ ຕາມເສັ້ນທາງ ແລະ ສະຖານທີ່ຕ່າງໆ.
ຖ້າຫາກວ່າຜູ້ໄດ້ຫາກລະເມີດຂໍ້ຫ້າມໃນ ແຈ້ງການສະບັບນີ້ ດ້ວຍການເຈດຕະນາ ຫຼື ບໍ່ ເຈດຕະນາ ລ້ວນແຕ່ໄດ້ຖືກສຶກສາອົບຮົມ, ກ່າວ ເຕືອນ, ປັບໃໝຕາມສະຖານການລະເມີດ ຫຼື ດໍາ ເນີນຄະດີ ຕໍ່ຜູ້ກະທໍາຜິດສ່ວນບຸກຄົນ, ກຸ່ມຄົນ, ນິຕິບຸກຄົນ ໂດຍປະສານສົມທົບກັບທຸກພາກ ສ່ວນທີ່ກ່ຽວຂ້ອງ ເພື່ອປະຕິບັດຕາມລະບຽບ ກົດໝາຍ.
ສໍາລັບການຊື້-ຂາຍ, ການມີໄວ້ໃນຄອບຄອງ ໝາກກະໂພກ, ບັ້ງໄຟດອກທຸກປະເພດ ຫຼື ຈູດ ໝາກກະໂພກ, ບັ້ງໄຟດອກທຸກປະເພດ ຖ້າເຈົ້າ ໜ້າທີ່ກ່ຽວຂ້ອງ, ອໍານາດການປົກຄອງບ້ານ, ຕໍາ ຫຼວດກຸ່ມ, ປກສ ບ້ານ, ກອງຫຼອນກວດກາພົບ ເຫັນໃຫ້ຢຶດ ແລະ ທໍາລາຍຖິ້ມ ພ້ອມທັງນໍາຕົວຜູ້ ກະທໍາຜິດມອບໃຫ້ອໍານາດການປົກຄອງບ້ານ ສ້າງບົດບັນທຶກສຶກສາອົບຮົມ, ກ່າວເຕືອນ ແລະ ປັບໃໝຕາມລະບຽບການ.
ການປັບໃໝແຕ່ລະກໍລະນີໃຫ້ອີງໃສ່ຂໍ້ຕົກ ລົງສະບັບເລກທີ 1323/ຈນວ, ລົງວັນທີ 21 ທັນວາ 2018, ຂໍ້ຕົກລົງ ສະບັບເລກທີ 620/ຈນວ, ລົງວັນທີ 29 ກັນຍາ 2020 ຂອງອົງການ ປົກຄອງນະຄອນຫຼວງວຽງຈັນ ແລະ ດໍາລັດສະ ບັບ ເລກທີ 188/ນຍ, ລົງວັນທີ 3 ກໍລະກົດ 2017 ຂອງນາຍົກລັດຖະມົນຕີ ໂດຍບໍ່ມີຂໍ້ຍົກ ເວັ້ນ.