ໃນວັນທີ 2 ມິຖຸນາ 2021 ແຂວງໄຊຍະບູລີ ໄດ້ຈັດກອງປະຊຸມ ທາງໄກວິດີໂອຄອນເຟີເຣັນສ ກ່ຽວກັບການຈັດຕັ້ງປະຕິບັດຄໍາສັ່ງເລກທີ 15/ນຍ, 087/ຈຂ.ຊຍ ແລະ ມາດຕະການປ້ອງກັນ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ຢູ່ແຂວງໄຊຍະບູລີ; ໂດຍການເປັນປະທານຂອງ ທ່ານ ເພັດພິໄຊ ສູນວິໄລ ຮອງເຈົ້າແຂວງ, ປະທານຄະນະສະເພາະກິດຂັ້ນແຂວງ, ມີຄະນະສະເພາະກິດຂັ້ນແຂວງ ແລະ 11 ເມືອງ ເຂົ້າຮ່ວມ.

ດຣ ແກ່ນ ດວງດີ ຮອງຫົວໜ້າພະແນກສາທາລະນະສຸກແຂວງໄດ້ລາຍງານປະເມີນຜົນການຈັດຕັ້ງປະຕິບັດມາດຕະການປ້ອງກັນ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ເຊິ່ງທ່ານໄດ້ຍົກໃຫ້ເຫັນສະພາບການແພ່ລະບາດຂອງພະຍາດໂຄວິດ-19 ໃນທົ່ວໂລກ ແລະ ພາຍໃນປະເທດ; ສະເພາະແຂວງໄຊຍະບູລີ ການເຂົ້າ-ອອກດ່ານສາກົນຊາຍແດນຕົວເລກສະສົມນັບແຕ່ 23 ພຶດສະພາ ຫາ 1 ມິຖຸນາ  2021 ມີຈໍານວນທັງໝົດ 736 ຄົນ ຍິງ 15 ຄົນ,ໃນນີ້ ແຮງງານລາວ 142 ຄົນ ຍິງ 4 ຄົນ, ແຮງງານໄທ 594 ຄົນ ຍິງ 11 ຄົນ, ມີແຮງງານລັກລອບເຂົ້າເມືອງສະສົມທັງໝົດ 3 ຄົນ; ຮອດ​ປັດ​ຈຸ​ບັນ, ຍັງ​ມີແຮງງານລາວທີ່ໄປອອກແຮງງານຢູ່ຕ່າງປະເທດຕົກຄ້າງຢູ່ຣາຊະອານາຈັກໄທ,ປະເທດເກົາຫຼີ; ປະເທດຍີ່ປຸ່ນ ແລະ ສປ ຈີນ ທັງໝົດ ຈໍານວນ 7.100 ຄົນ ​ຍິງ 3.810 ຄົນ; ທົ່ວແຂວງມີຜູ້ຕິດເຊື້ອສະສົມ ຈໍານວນ 3 ຄົນ ຍິງ 1 ຄົນ, ປັດຈຸບັນແມ່ນປິ່ນປົວຫາຍດີທັງໝົດ ແລະ ໄດ້ອອກໂຮງໝໍແລ້ວ.

ຜ່ານການຈັດຕັ້ງປະຕິບັດຄໍາສັ່ງຂອງທ່ານນາຍົກລັດຖະມົນຕີສະບັບເລກທີ 15/ນຍ ແລະ ຄໍາສັ່ງຂອງທ່ານເຈົ້າແຂວງສະບັບເລກທີ 087/ຈຂ.ຊຍ ນັບແຕ່ວັນທີ 24 ເມສາ 2021 ມາຮອດປັດຈຸບັນເຫັນວ່າສະພາບການແພ່ລະບາດຂອງພະຍາດໂຄວິດ-19  ຢູ່ແຂວງໄຊຍະບູລີ ໄດ້ຢຸດເຊົາ, ບໍ່ມີການຂະຫຍາຍຕົວຂອງຈໍານວນຜູ້ຕິດເຊື້ອເພີ່ມໃໝ່ ແລະ ເປົ້າໝາຍກຸ່ມສ່ຽງກໍຖືກຈໍາກັດບໍລິເວນ ແລະ ຄົບຕາມກຳນົດເວລາແມ່ນບໍ່ມີອາການຂອງການຕິດເຊຶ້ອ; ການສັກວັກສິນເຂັມທີ 1 ໄດ້ 42.262 ຄົນເທົ່າກັບ 49.83% ຂອງຢາທັງໝົດຫຼືເທົ່າກັບ 10.25% ຂອງປະຊາກອນ, ເຂັມທີ່ 2 ໄດ້ 14.573 ຄົນ ເທົ່າກັບ 34.48% ຂອງເຂັມທີ 1 ຫຼືເທົ່າກັບ 3.536% ຂອງປະຊາກອນແຂວງໄຊຍະບູລີ, ກອງປະຊຸມດັ່ງກ່າວຍັງໄດ້ຮັບຟັງການຈັດຕັ້ງປະຕິບັດມາດຕະການປ້ອງກັນ; ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ຂອງແຕ່ລະເມືອງ ພ້ອມທັງໄດ້ຜັດປ່ຽນກັນປະກອບຄໍາຄິດຄໍາເຫັນຕື່ມອີກ.