ວັນສື່ມວນຊົນແຫ່ງຊາດແລະການພິມຈຳໜ່າຍຄົບຮອບ 71 ປີ ( 13 ສິງຫາ 1950-13 ສິງຫາ 2021) ເປັນວັນທີ່ມີຄວາມໝາຍຄວາມສຳຄັນທາງດ້ານປະຫວັດສາດຂອງລາວເຮົາອີກວັນໜຶ່ງເຊິ່ງສະແດງໃຫ້ເຫັນເຖິງການເຕີບໃຫຍ່ຂະຫຍາຍຕົວຂອງວຽກສື່ມວນຊົນແລະການພິມຈຳໜ່າຍ ທີ່ໄດ້ຕິດພັນກັບທຸກບາດກ້າວເດີນໄຊຊະນະຂອງພາລະກິດປະຕິວັດລາວ, ເປັນກະບອກສຽງອັນແຫຼມຄົມໃນການໂຄສະນາປຸກລະດົມຂົນຂວາຍປະຊາຊົນໃຫ້ເຂົ້າຮ່ວມຂະບວນການຕໍ່ສູ້ກູ້ຊາດແລະການປົກປັກຮັກສາ-ສ້າງສາພັດທະນາປະເທດຊາດນັບແຕ່ມື້ສ້າງຕັ້ງເຖິງປັດຈຸບັນ, ສື່ມວນຊົນແລະການພິມຈຳໜ່າຍໄດ້ຮັບການພັດທະນາຂຶ້ນເລື້ອຍໆທັງດ້ານປະລິມານແລະຄຸນນະພາບສາມາດຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງແຕ່ລະໄລຍະ.
ພັທພອນພິລຸນປັນຍາສິລິ ຮອງຫົວໜ້າກົມສື່ມວນຊົນປກສ ໄດ້ສໍາພາດຕໍ່ສື່ມວນຊົນ ປກສ ເນື່ອງໃນວັນສໍາຄັນດັ່ງກ່າວວ່າ: ກົມສື່ມວນຊົນປກສກໍເປັນອີກສື່ມວນຊົນສຳນັກງານໜຶ່ງຂອງລາວເຮົາທີ່ເປັນກະບອກສຽງອັນສຳຄັນຂອງພັກແລະລັດ ກໍຄືໂຄສະນາຜົນງານຂອງກຳລັງປ້ອງ ກັນຄວາມສະຫງົບອອກສູ່ສັງຄົມໃຫ້ຮັບຮູ້ຢ່າງທົ່ວເຖິງ; ກົມສື່ມວນຊົນ ປກສໄດ້ຮັບການສ້າງຕັ້ງຂຶ້ນໃນວັນທີ 25 ພຶດສະພາ 2009 ເຊິ່ງໃນເບື້ອງຕົ້ນໃສ່ຊື່ວ່າ: ຄະນະບັນນາທິການຂ່າວສານປກສປະກອບມີ 4 ກອງບັນນາທິການຂຶ້ນກັບຄື: ວິທະຍຸກະຈາຍສຽງປກສ, ກອງໂທລະພາບປກສ, ກອງວາລະສານປກສແລະກອງໜັງສືພິມຄວາມສະຫງົບ, ມາຮອດປີ 2021 ເພື່ອໃຫ້ແທດເໝາະກັບພາລະບົດບາດແລະການເຄື່ອນໄຫວວິຊາສະເພາະຕົວຈິງຈຶ່ງໄດ້ປ່ຽນຊື່ຈາກຄະນະບັນນາທິການຂ່າວສານ ປກສມາເປັນ ກົມສື່ມວນຊົນປກສມີໜ້າທີ່ໂຄສະນາເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ແນວທາງປ້ອງກັນຊາດ-ປ້ອງກັນຄວາມສະຫງົບໂດຍສະເພາະແມ່ນການໂຄສະນາເຜີຍແຜ່ໝາກຜົນກໍ່ຄືຜົນງານຂອງກຳລັງປ້ອງກັນຄວາມສະຫງົບ, ປຸກລະດົມຂົນຂວາຍປະຊາຊົນໃຫ້ເຂົ້າຮ່ວມວຽກງານປ້ອງກັນຄວາມສະຫງົບໃຫ້ກາຍເປັນໜ້າທີ່ຂອງປວງຊົນຮອບດ້ານຈາກຄະນະພັກກະຊວງກໍ່ຄືຄະນະພັກກົມໃຫຍ່ການເມືອງປກສເຮັດໃຫ້ສື່ມວນຊົນປກສຂອງພວກເຮົາໄດ້ຮັບການພັດທະນາຢ່າງຕໍ່ເນື່ອງສາມາດຮັບໃຊ້ໜ້າທີ່ການເມືອງໄດ້ເປັນຢ່າງດີ, ທັງເປັນແຫຼ່ງຂໍ້ມູນທີ່ໄດ້ຮັບຄວາມເຊື່ອຖື ແລະ ນິຍົມຈາກມວນຊົນ.
ນັບແຕ່ໄດ້ຮັບການສ້າງຕັ້ງ; ສື່ມວນຊົນປກສໄດ້ເອົາໃຈໃສ່ຄຽງບ່າຄຽງຄູ່ກັບສື່ມວນຊົນລາວທຸກຂະແໜງການຂອງລັດໂດຍສະເພາະກໍ່ຄືກົມສື່ມວນຊົນກະຊວງຖະແຫຼງຂ່າວ, ວັດທະນະທຳແລະທ່ອງທ່ຽວໃນການເຄື່ອນໄຫວປະຕິບັດໜ້າທີ່ວິຊາສະເພາະຢ່າງມີຄວາມຮັບຜິດຊອບສູງແລະມີຜົນສຳເລັດຫຼາຍດ້ານເຊິ່ງສະແດງອອກ ຄື: ໄດ້ເຄື່ອນໄຫວລາຍງານຂ່າວກອງປະຊຸມລະດັບຊາດ-ລະດັບສາກົນທີ່ສປປລາວໄດ້ຮັບກຽດເປັນເຈົ້າພາບ, ຕິດຕາມການນຳຂັ້ນສູງກະຊວງປກສ ເຄື່ອນໄຫວວຽກງານທັງພາຍໃນແລະຕ່າງປະເທດ,ເກັບກຳ-ລາຍງານຂ່າວວັນສຳຄັນຂອງ ພັກ-ຂອງຊາດ, ໄພທຳມະຊາດ, ພະຍາດລະບາດຢ່າງເປັນເຈົ້າການແລະມີຜົນສຳເລັດ. ຕໍ່ກັບຜົນງານເຫຼົ່ານັ້ນ ສື່ມວນຊົນປກສຈຶ່ງໄດ້ຮັບການປະຕິບັດນະໂຍບາຍຍ້ອງຍໍຈາກພັກ-ລັດ ກໍຄື ກະຊວງປ້ອງກັນຄວາມສະຫງົບໃນນັ້ນໄດ້ຮັບ: ໄດ້ຮັບຫຼຽນໄຊອິດສະຫຼະຊັ້ນ II ລວມໝູ່ 1 ໜ່ວຍ, ບຸກຄົນມີຫຼຽນໄຊແຮງງານຊັ້ນ II ຈໍານວນ 4 ສະຫາຍ, ຫຼຽນໄຊແຮງງານຊັ້ນ III ຈໍານວນ 6 ສະຫາຍ, ຫຼຽນກາແຮງງານ ມີ 11 ສະ ຫາຍ,ໃບຍ້ອງຍໍລັດຖະບານມີ2 ສະຫາຍ,ໄດ້ຮັບການເລື່ອນຊັ້ນ 12 ສະຫາຍ, ເລື່ອນຕຳແໜ່ງ1 ສະຫາຍ (ສະເພາະປີ 2021).
ພາບ-ຂ່າວ: ສົມສະໄຫວ ສີລາວົງ