ພິທີປະກາດການສ້າງຕັ້ງຄະນະພັກຮາກຖານກອງບັນຊາການທະຫານເມືອງໄຊເສດຖາ ນະຄອນຫຼວງວຽງຈັນ (ນວ) ຈັດຂຶ້ນໃນວັນທີ 11 ສິງຫາ 2021; ໂດຍມີ ສະຫາຍ ຄຳມາ ແສງມີໄຊ ກຳມະການພັກ ນວ ເລຂາຄະນະພັກເມືອງ ເຈົ້າເມືອງ-ເມືອງໄຊເສດຖາ; ມີ ສະຫາຍ ພັທ ບົວລຽນ ໄຊຍະຈັກ ກຳມະການພັກເມືອງ ຫົວໜ້າການເມືອງ ກອງບັນຊາການທະຫານເມືອງໄຊເສດຖາ, ມີຕາງໜ້າກົມກອງອ້ອມຂ້າງຈາກກຳລັງປ້ອງກັນຊາດ-ປ້ອງກັນຄວາມສະຫງົບພາຍໃນເມືອງ ແລະ ພະແນກການທີ່ກ່ຽວຂ້ອງ, ຕະຫຼອດຮອດບັນດາສະມາຊິກພັກພາຍໃນກອງບັນຊາການທະຫານເມືອງ ເຂົ້າຮ່ວມ.

ສະຫາຍ ຈິດຕະພອນ ອັກຄະວົງ ຄະນະປະຈຳພັກເມືອງ ຫົວໜ້າພະແນກຈັດຕັ້ງເມືອງໄຊເສດຖາ ໄດ້ຜ່ານມະຕິຕົກລົງວ່າດ້ວຍການສ້າງຕັ້ງຄະນະພັກຮາກຖານກອງບັນຊາການທະຫານເມືອງ ໄຊເສດຖາ ນວ; ເຊິ່ງອີງຕາມກົດລະບຽບຂອງພັກປະຊາຊົນ ປະຕິວັດລາວ ສະໄໝທີ XI ໃນໝວດທີ II ມາດຕາ 13 ກ່ຽວກັບການຈັດຕັ້ງ ແລະ ລະບົບສາຍໃຍການຈັດຕັ້ງຂອງພັກ; ອີງຕາມການຕົກລົງເຫັນດີໃນກອງປະຊຸມຂອງ ຄະນະປະຈຳພັກເມືອງໄຊເສດຖາ ສະບັບເລກທີ 008/ຄພ.ມຊຖ ລົງວັນທີ 8 ກໍລະກົດ 2021; ຄະນະປະຈຳພັກເມືອງໄຊເສດຖາ ຕົກລົງເຫັນດີສ້າງຕັ້ງຄະນະພັກຮາກຖານກອງບັນຊາການທະຫານ ເມືອງໄຊເສດຖາ ນວ. ເຊິ່ງປະກອບ ມີ 3 ໜ່ວຍພັກທີ່ຂຶ້ນກັບ ຄື: ໜ່ວຍພັກ ພະແນກການເມືອງ, ໜ່ວຍພັກພະແນກເສນາທິການ ແລະ ໜ່ວຍພັກພະແນກພະລາທິການ.

ພ້ອມນັ້ນ, ກໍໄດ້ບົ່ງຕົວແຕ່ງແຕ່ງຄະນະພັກຮາກຖານກອງບັນຊາການທະຫານເມືອງໄຊເສດຖາ ຄື: ສະຫາຍ ພັທ ບົວລຽນ ໄຊຍະຈັກ ເປັນເລຂາຄະນະພັກຮາກຖານ, ພັທ ພອນໄຊ ໄຊຍະສິນ ເປັນຮອງເລຂາ, ພັທ ອຸທອນ ວິໄລສັກ, ພັທ ບັງອອນ ໂຄດປັນຍາ, ພັຕ ແກ້ວຈັນທະລາ ສີຫາລັກ ເປັນຄະນະ; ໄດ້ບົ່ງຕົວແຕ່ງຕັ້ງປະທານ ແລະ ຮອງປະທານກວດກາ ຄື: ສະຫາຍ ພັທ ພອນໄຊ ໄຊຍະສິນ ເປັນປະທານກວດກາ, ພັຕ ບຸນຫຼອດ ຈະເລີນລາດ, ພັຕ ຄົມສັນ ເພັດຈຳພອນ ເປັນຮອງປະທານ ກວດກາ ແລະ ບົ່ງຕົວແຕ່ງຕັ້ງເລຂາ-ຮອງເລຂາ; ຄະນະ ແລະ ປະທານ-ຮອງປະ ທານກວດກາທັງ 3 ໜ່ວຍພັກທີ່ຂຶ້ນກັບ.

ໂອກາດນີ້, ສະຫາຍ ຄຳມາ ແສງມີໄຊ ໄດ້ເນັ້ນໜັກໃຫ້ຜູ້ທີ່ໄດ້ຮັບການບົ່ງຕົວແຕ່ງຕັ້ງໃໝ່ໃນຄັ້ງນີ້, ຈົ່ງພ້ອມກັນຍົກສູງພາລະບົດບາດການຊີ້ນໍາ-ນຳພາ ຂອງຄະນະພັກຮາກຖານຂອງຕົນ ໃຫ້ມີຄວາມໜັກແໜ້ນ ເຂັ້ມແຂງ ແລະ ກວ້າງຂວາງ; ໂດຍສະເພາະແມ່ນການປັບປຸງກໍ່ສ້າງພັກໄປພ້ອມກັບການຈັດຕັ້ງປະຕິ ບັດຕໍ່ໜ້າທີ່ວຽກງານໃຫ້ມີປະສິດທິຜົນສູງ, ເອົາໃຈໃສ່ສຶກສາອົບຮົມການເມືອງນຳພາແນວຄິດໃຫ້ເຂັ້ມແຂງ, ເອົາໃຈໃສ່ ຝຶກຝົນຫຼ່ໍຫຼອມຕົນເອງໃນການຊອກຮູ້ຮ່ຳຮຽນເພື່ອຍົກລະດັບຄວາມຮູ້-ຄວາມສາມາດຂອງຕົນໃຫ້ສູງຂຶ້ນເປັນກ້າວໆ, ມີຄວາມສາມັກຄີພາຍໃນໃຫ້ແໜ້ນແຟ້ນ,ປັບປຸງແບບແຜນການນຳພາເຮັດວຽກ ລວມສູນປະຊາທິປະໄຕເປັນໝູ່ຄະນະ,ແບ່ງໃຫ້ບຸກຄົນຮັບຜິດຊອບຕໍ່ໜ້າທີ່ການເມືອງຂອງຕົນ ເພື່ອເຮັດສຳເລັດໜ້າທີ່ ທີ່ພັກ-ລັດ ກໍຄືການຈັດຕັ້ງຂັ້ນເທິງມອບໝາຍໃຫ້ເປັນຢ່າງດີ.