ເຈົ້າໜ້າທີຕໍາຫຼວດພະແນກສືບສວນ – ສອບສວນ ປກສ ແຂວງຫຼວງນໍ້າທາ ໄດ້ມອບຊັບທີ່ຖືກຄົນຮ້າຍລັກໄປ ປະເພດລົດຈັກຈຳນວນ 3 ຄັນ; ໃນນີ້, ມີລົດຈັກເວບ 100 ສີແດງ-ດຳ ບໍ່ມີປ້າຍທະບຽນ 1 ຄັນ, ລົດຈັກ ຄິກ ສີຂາວ ບໍ່ມີປ້າຍທະບຽນ 1 ຄັນ ແລະ ລົດຈັກຮອນດາ ເວັບໄອ ສີແດງ-ດຳ ປ້າຍທະບຽນ ຈຈ 2977 ຈໍານວນ 1 ຄັນ ຄືນໃຫ້ເຈົ້າຂອງເດີມ ໃນວັນທີ 21 ກັນຍາ 2021 ມອບໂດຍ ພັຕ ຄຳມະນີ ລືໄຊ ຮອງຫົວໜ້າພະແນກສືບ ສວນ-ສອບສວນ ປກສ ແຂວງ ແລະ ຕາງໜ້າຮັບໂດຍ ທ່ານ ບຸນມີ ປະຊາຊົນ ບ້ານນໍ້າຂຸນ ເມືອງ ແລະ ແຂວງຫຼວງນໍ້າທາ.
ພັຕ ຄຳມະນີ ລືໄຊ ໃຫ້ຮູ້ຕື່ມອີກວ່າ: ລົດຈັກຈໍານວນ 3 ຄັນ ທີ່ທາງເຈົ້າໜ້າທີໄດ້ເກັບກູ້ຄືນຈາກຄົນຮ້າຍ ຈຳນວນ 2 ຄົນ ຊື່ ທ້າວ ສອງ ອາຍຸ 19 ປີ ວ່າງງານ ຢູ່ບ້ານ ແສນອ່ອນ ແລະ ທ້າວ ສິງແກ້ວ ອາຍຸ 18 ປີ ວ່າງງານ ຢູ່ບ້ານ ຫ້ວຍຕາ ທັງສອງຢູ່ ເມືອງສິງ ແຂວງຫຼວງນໍ້າທາ ເຊີ່ງພວກກ່ຽວໄດ້ຮ່ວມມືກັນລັກຊີງຊັບໃນຄັ້ງວັນທີ 10 ສິງຫາ 2021 ຢູ່ຮ້ານອາຫານ ເຂດບ້ານ ນາຫ້ອມ ເມືອງ ແລະ ແຂວງຫຼວງນໍ້າທາ ແຕ່ຖືກເຈົ້າໜ້າທີຈັບຕົວມາດໍາເນີນຄະດີຕາມລະບຽບກົດໝາຍ.
ຕໍ່ກັບເຫດການດັ່ງກ່າວ, ເຈົ້າໜ້າທີຈຶ່ງຢາກຮຽກຮ້ອງມາຍັງພໍ່ແມ່ ປະຊາຊົນ ພໍ່ຄ້າຊາວຂາຍທີ່ໃຊ້ລົດ ໂດຍສະເພາະແມ່ນລົດຈັກ ບໍ່ຄວນຈອດປະຊະຊາຍ, ຕ້ອງໃສ່ກຸນແຈ່ລັອກຄໍ, ລັອກຕີນລົດ ແລະ ຕິດຕັ້ງລະບົບກັນຂະໂມຍ ເພື່ອເປັນການປ້ອງກັນບໍ່ໃຫ້ກຸ່ມຄົນບໍ່ດີ ສວຍໂອກາດລັກໄປໄດ້ງາຍ ຄືກັບເຫດການທີ່ເກີດຂື້ນຜ່ານມາ.ຮຕ ພາວັນ ສຸວັນນາ
