ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຈຳປາສັກ ສາມາດຈັບຕົວເປົ້າໝາຍຄ້າ-ຂາຍຢາເສບຕິດ ຜ່ານບໍລິສັດຂົນສົ່ງ ແຫ່ງໜຶ່ງຢູ່ບ້ານສະຜ່າຍ ເມືອງຊະນະສົມບູນ ແຂວງຈຳປາສັກ ໄດ້ 2 ຄົນ ພ້ອມທັງຢຶດຂອງກາງບ້າໄດ້ 60 ພັນເມັດ ແລະ ຢາໄອສ໌ 0,7 ກຼາມ.
ເຈົ້າໜ້າທີ່ພະແນກຕຳຫຼວດສະກັດກັ້ນແລະຕ້ານຢາເສບຕິດ ປກສ ແຂວງຈຳປາສັກ ໃຫ້ຮູ້ວ່າ: ໃນວັນທີ 13 ຕຸລາ 2021, ເຈົ້າໜ້າທີ່ວິຊາສະເພາະ ໄດ້ຮັບການລາຍງານຈາກພົນລະເມືອງດີ ວ່າ: ມີກຸ່ມຄົນບໍ່ດີຈໍານວນໜຶ່ງ ເຄື່ອນໄຫວຄ້າ-ຂາຍຢາເສບຕິດ ຜ່ານບໍລິສັດຂົນສົ່ງແຫ່ງໜຶ່ງຢູ່ບ້ານສະຜ່າຍ ເມືອງຊະນະສົມບູນ ແຂວງຈຳປາສັກ; ຈາກນັ້ນ, ເຈົ້າໜ້າທີ່ວິຊາສະເພາະພວກ ຈຶ່ງໄດ້ລົງສົມທົບກັບພາກສ່ວນທີ່ກ່ຽວຂ້ອງ ລົງສະຖານທີ່ດັ່ງກ່າວ ສາມາດກັກຕົວຜູ້ຖືກຫາໄດ້ 2 ຄົນ, ຊື່ ທ້າວ ກິເຮັ່ງ ອາຍຸ 25 ປີ ກຳມະກອນ ບ້ານຈັດສັນ ນະຄອນປາກເຊ ແຂວງຈຳປາສັກ, ທ້າວ ເດດທະວີ ອາຍຸ 34 ປີ ຄ້າຂາຍ ຢູ່ບ້ານ ສິງສໍຳພັນ ເມືອງຊະນະສົມບູນ ແຂວງຈຳປາສັກ, ພ້ອມເຄື່ອງຂອງກາງຢາເສບຕິດ ປະເພດຢາບ້າ ຈໍານວນ 30 ມັດ ເທົ່າ 60 ພັນເມັດ, ຢາໄອສ໌ 0,7 ກຼາມ, ເງິນກີບ 500.000 ກີບ, ລົດກະບະຟອດສີຂາວ, ທະບຽນ ກຮ 6214 ຈໍາປາສັກ ແລະ ເຄື່ອງຂອງກາງອີກຈຳນວນໜຶ່ງ.
ປັດຈຸບັນ, ຄະດີດັ່ງກ່າວທາງເຈົ້າໜ້າທີ່ວິຊາສະເພາະກຳລັງເລັ່ງດຳເນີນການສືບສວນ-ສອບສວນ ເພື່ອຊອກຫາຜູ້ຮ່ວມຂະບວນການດຽວກັນມາດຳເນີນຄະດີຕາມລະບຽບກົດໝາຍ.
