ກອງປະຊຸມສໍາມະນາວິທະຍາສາດຮ່ວມ ລະຫວ່າງ 4 ສະຖາບັນການສຶກສາຊັ້ນສູງ ໄດ້ຈັດຂຶ້ນ ໃນວັນທີ 4 ເມສາ 2022 ຢູ່ທີ່ວິທະຍາຄານຕໍາຫຼວດປະຊາຊົນ ພາຍໃຕ້ຫົວຂໍ້ “ຄວາມເປັນລະບຽບຮຽບຮ້ອຍ, ປອດໄພຂອງສັງຄົມ ແມ່ນໜ້າທີ່ພື້ນຖານໃຫ້ແກ່ການພັດທະນາປະເທດຊາດ ໃນເງື່ອນໄຂໃໝ່”, ໂດຍການເປັນປະທານຮ່ວມທັງ 4 ສະຖາບັນ, ມີບັນດາທ່ານອົງການຕາງໜ້າຊັ້ນສູນກາງ ແລະ ບັນດານັກວິທະຍາສາດ, ຄູ-ອາຈານ ເຂົ້າຮ່ວມ.
ພົຈວ ປອ ວົງເຊໂດນ ພັນທະແກ້ວ ຫົວໜ້າອໍານວຍການວິທະຍາຄານຕໍາຫຼວດປະຊາຊົນ ກ່າວວ່າ:
ກອງປະຊຸມດັ່ງກ່າວ, ບັນດານັກວິທະຍາສາດທີ່ເຂົ້າຮ່ວມ ຈະໄດ້ພ້ອມກັນຄົ້ນຄວ້າ, ວິເຄາະ, ວິໄຈໃຫ້ເລິກເຊິ່ງ, ສ້າງຄວາມກະຈ່າງແຈ້ງດ້ວຍຫຼາຍຮູບ, ຫຼາຍສີທີ່ມີເນື້ອໃນອຸດົມສົມບູນ ແລະ ນໍາສະເໜີແນວຄວາມຄິດຂອງຕົນຕໍ່ຫົວຂໍ້: “ຄວາມເປັນລະບຽບຮຽບຮ້ອຍ, ປອດໄພຂອງສັງຄົມ ແມ່ນໜ້າທີ່ພື້ນຖານໃຫ້ແກ່ການພັດທະນາປະເທດຊາດ ໃນເງື່ອນໄຂໃໝ່” ເຊິ່ງເປັນຫົວຂໍ້ຫຼັກຂອງກອງປະຊຸມ ແລະ ບັນດາຜູ້ເຂົ້າຮ່ວມ ຍັງຈະໄດ້ຮັບຟັງການນໍາສະເໜີຂອງນັກວິທະຍາສາດ ທັງໝົດ 8 ຫົວຂໍ້ ຄື:
- ປຸກລະດົມຂົນຂວາຍມະຫາຊົນເຂົ້າຮ່ວມ ວາລະແຫ່ງຊາດແກ້ໄຂບັນຫາເສບຕິດ ຢູ່ ສປປ ລາວ
- ສະກັດກັ້ນ ແລະ ຕ້ານປະກົດການຫຍໍ້ທໍ້ທາງດ້ານວັດທະນະທໍາ ຢູ່ປະເທດເຮົາໃນເງື່ອນໄຂໃໝ່
- ສ້າງກໍາລັງປ້ອງກັນຊາດ ຕາມທິດປະຕິວັດ, ມີແບບແຜນ ແລະ ທັນສະໄໝ ຮັບປະກັນໃຫ້ແກ່ຄວາມໝັ້ນຄົງຂອງຊາດ
- ຍົກສູງສະຕິເຄົາລົບກົດໝາຍຂອງພົນລະເມືອງ ເພື່ອສ້າງລັດທີ່ປົກຄອງດ້ວຍກົດໝາຍ
- ປັບປຸງອົງການສືບສວນ-ສອບສວນຂອງເຈົ້າໜ້າທີ່ຕຳຫຼວດ ໃຫ້ມີຄວາມຮັດກຸມ, ໂປ່ງໃສ, ມືອາຊີບ ແລະ ຍຸຕິທຳ
- ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານໃນຖັນແຖວພະນັກງານ ຢູ່ປະເທດເຮົາ
- ຈັດຕັ້ງ, ນຳໃຊ້ກຳລັງເຄື່ອນທີ່ຂອງ ກະຊວງປ້ອງກັນປະເທດ ເຂົ້າຮ່ວມຕ້ານຂະບວນການກໍ່ກະບົດລຸກຮື້ຂຶ້ນ
- ປັບປຸງວຽກງານຄຸ້ມຄອງລັດດ້ານຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ ຢູ່ປະເທດເຮົາ
ທັງນີ້, ກໍເພື່ອສະໜອງຕອບເຖິງຄວາມຮຽກຮ້ອງຕ້ອງການທັນຍຸກນຳສະໄໝ, ເຊື່ອມໂຍງ ແລະ ການປະຕິວັດອຸດສາຫະກຳ ຄັ້ງທີ IV, ແນໃສ່ປົກປັກຮັກສາຄວາມສະຫງົບທາງດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມ, ກໍ່ສ້າງພະນັກງານ ຕິດພັນກັບ ການພັດທະນາເສດຖະກິດ-ສັງຄົມຂອງປະເທດຊາດ ເພື່ອກ້າວສູ່ຄວາມຮັ່ງມີ, ເຂັ້ມແຂງ, ໂປ່ງໃສ ແລະ ຍຸຕິທຳ.