ກອງບັນຊາການ ປກສ ແຂວງຈໍາປາສັກ ໄດ້ຈັດພິທີປະກາດເລື່ອນຊັ້ນໃຫ້ນາຍຕໍາຫຼວດຜູ້ທີ່ມີຜົນງານດີເດັ່ນ ຄົບມາດຖານເງື່ອນໄຂຕາມລະບຽບກົດໝາຍຂອງກໍາລັງປ້ອງກັນຄວາມສະຫງົບວາງອອກ ໃນວັນທີ 26 ພຶດສະພາ ຜ່ານມາ, ເປັນປະທານ ແລະ ປະດັບຊັ້ນໂດຍ ພັອ ສຸກພະຈັນ ສີລາເພັດ ຫົວໜ້າກອງບັນຊາການ ປກສ ແຂວງຈຳປາສັກ, ມີຄະນະພັກ-ຄະນະບັນຊາຈາກຫ້ອງ, ປກສ ເມືອງ, ປກສ ນະຄອນ, ໂຮງຮຽນ, ກອງພັນປ້ອງກັນເຄື່ອນທີ່, ຄ້າຍຄຸມຂັງ-ດັດສ້າງ ຕະຫຼອດຮອດນາຍຕໍາຫຼວດທີ່ຮັບການເລື່ອນຊັ້ນ ເຂົ້າຮ່ວມ.
ໃນພິທີ, ພັທ ເກດແກ້ວ ບຸນສະຫວັດ ຮອງຫົວໜ້າຫ້ອງການເມືອງ ກອງບັນຊາການ ປກສ ແຂວງ ໄດ້ຂຶ້ນຜ່ານຂໍ້ຕົກລົງຂອງ ກົມໃຫຍ່ການເມືອງ ກະຊວງ ປກສ ເລກທີ 1363/ກມ.ປກສ ລົງວັນທີ 20 ເມສາ 2022 ວ່າດ້ວຍ ການເລື່ອນຊັ້ນໃຫ້ນາຍຕຳຫຼວດຢູ່ກອງບັນຊາການ ປກສ ແຂວງຈຳປາສັກ, ຂໍ້ຕົກລົງຂອງ ກອງບັນຊາການ ປກສ ແຂວງຈຳປາສັກ ເລກທີ 666/ປກສ.ຈສ ລົງວັນທີ 17 ພຶດສະພາ 2022 ວ່າດ້ວຍ ການເລື່ອນຊັ້ນໃຫ້ນາຍຕໍາຫຼວດ ຈໍານວນ 91 ສະຫາຍ ຍິງ 24 ສະຫາຍ ດັ່ງນີ້:
- ຮ້ອຍຕີ ຂຶ້ນ ຮ້ອຍໂທ 55 ສະຫາຍ ຍິງ 11 ສະຫາຍ
- ວາທີ ຂື້ນ ຮ້ອຍຕີ ມີ 21 ສະຫາຍ ຍິງ 5 ສະຫາຍ
- ສິບເອກ ຂຶ້ນ ວາທີ 3 ສະຫາຍ ຍິງ 1 ສະຫາຍ
- ສິບໂທ ຂຶ້ນ ສິບເອກ 12 ສະຫາຍ ຍິງ 7 ສະຫາຍ
ພັອ ສຸກພະຈັນ ສີລາເພັດ ໄດ້ສະແດງຄວາມຍ້ອງຍໍຊົມເຊີຍຕໍ່ນາຍ ແລະ ພົນຕຳຫຼວດ ທີ່ໄດ້ຮັບການເລື່ອນຊັ້ນຄັ້ງນີ້ ຈົ່ງເພີ່ມສະຕິໃນການຮັບຜິດຊອບຕໍ່ໜ້າທີ່ການເມືອງໃຫ້ສູງຂຶ້ນ, ສືບຕໍ່ປະຕິບັດໜ້າທີ່ວຽກງານທີ່ຕົນຮັບຜິດຊອບໃຫ້ມີຜົນສຳເລັດ, ຕັ້ງໜ້າຝຶກຝົນຫຼໍ່ຫຼອມຕົນເອງໃຫ້ກາຍເປັນພະນັກງານທີ່ມີຄວາມຮູ້-ຄວາມສາມາດ, ປະກອບສ່ວນເຂົ້າໃນວຽກງານຮັກສາຄວາມສະຫງົບ ເພື່ອເຮັດສຳເລັດໜ້າທີ່ທີ່ພັກ-ລັດ ແລະ ປະຊາຊົນມອບໝາຍໃຫ້.
