ກອງບັນຊາການປ້ອງກັນທີ່ຕັ້ງ (ປຕ) ກະຊວງ ປກສ ໄດ້ເປິດຝຶກອົບຮົມວຽກງານວິຊາສະເພາະປ້ອງກັນທີ່ຕັ້ງ ປະຈຳປີ 2021 ໃຫ້ນາຍຕຳຫຼວດ ໃນທົ່ວປະເທດ ໃນວັນທີ 21 ມິຖຸນາ 2022, ເປັນປະທານໂດຍ ພົຈວ ໄຊສີ ແກ້ວສະຫງ່າ ຫົວໜ້າກອງບັນຊາການປ້ອງກັນທີ່ຕັ້ງ, ມີຄະນະພັກ-ຄະນະກອງບັນຊາການ, ບັນດາຄະນະພັກ 4 ຫ້ອງ, 3 ກອງພັນ ພ້ອມດ້ວຍກອງຮ້ອຍເອກະລາດ ແລະ ສູນຝຶກວິຊາສະເພາະປ້ອງກັນທີ່ຕັ້ງ ແລະ ນັກສຳມະນາກອນ ໃນທົ່ວປະເທດ 21 ສະຫາຍ ເຂົ້າຮ່ວມ.
ພັທ ແສງຄຳ ໄຊຍະວົງ ຫົວໜ້າຫ້ອງເສນາທິການ ປຕ ກ່າວວ່າ:
ການຝຶກອົບຮົມວຽກງານວິຊາສະເພາະປ້ອງກັນທີ່ຕັ້ງໃນຄັ້ງນີ້ ແມ່ນເພື່ອເຮັດໃຫ້ນາຍຕຳຫຼວດກຳແໜ້ນເຊື່ອມຊຶມທາງດ້ານທິດສະດີ, ຫຼັກການວິຊາສະເພາະຂອງກຳລັງປ້ອງກັນຄວາມສະຫງົບ ກໍຄື ກຳລັງປ້ອງກັນທີ່ຕັ້ງ ໃຫ້ກຳແໜ້ນດ້ານສິນລະປະຍຸດ-ຍຸດທະວິທີການນຳໃຊ້ອາວຸດ-ລູກກະສູນຕ່າງໆທີ່ທັນສະໄໝເພື່ອກຽມພ້ອມສູ້ຮົບ, ການປ້ອງກັນເວນຍາມຢູ່ຕາມຈຸດສຳຄັນຕ່າງໆຂອງພັກ-ຂອງຊາດ ໃນຂອບເຂດທົ່ວປະເທດ ໃຫ້ມີຄວາມສະຫງົບປອດໄພ; ເປັນການຍົກສູງຄວາມຮູ້, ຄວາມສາມາດໃຫ້ນາຍຕຳຫຼວດໃນຂອບເຂດທົ່ວປະເທດ ໃຫ້ມີຄວາມຕື່ນຕົວສູງໃນການຄຸ້ມຄອງນຳພາ-ບັນຊາກຳລັງຂອງຕົນ ຢູ່ໃນແຕ່ລະກົມກອງທ້ອງຖິ່ນ ໃຫ້ມີການຫັນປ່ຽນຢ່າງຕັ້ງໜ້າ.
ໃນນີ້, ນັກສຳມະນາກອນ ຈະໄດ້ຮຽນຮູ້ກ່ຽວກັບ ພາລະບົດບາດ ກອງບັນຊາການປ້ອງກັນທີ່ຕັ້ງ, ວິທີສ້າງບົດບັນທຶກສັນຍາ, ວຽກງານປ້ອງກັນເຄື່ອນຍ້າຍວັດຖຸມີຄ່າ ແລະ ວຽກງານສືບສວນ-ສອບສວນ.
