ໃນວາລະດຳເນີນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ໃນວັນທີ 22 ມິຖຸນາ 2022, ເປັນປະທານໂດຍ ພົທ ສຸວອນ ເລືອງບຸນມີ ຮອງປະທານສະພາແຫ່ງຊາດ, ພົຕ ຄໍາກິ່ງ ຜຸຍຫຼ້າມະນີວົງ ຫົວໜ້າກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ ໄດ້ຕາງໜ້າໃຫ້ ກະຊວງປ້ອງກັນຄວາມສະຫງົບ ຂຶ້ນຊີ້ແຈງຕໍ່ຄໍາຊັກຖາມ ພາຍຫຼັງທີ່ບັນດາສະມາຊິກສະພາແຫ່ງຊາດ (ສສຊ) ປະກອບຄຳເຫັນກ່ຽວກັບ ການປະຕິບັດກົດໝາຍຂອງ ອົງການສືບສວນ-ສອບສວນ.
ພົຕ ຄໍາກິ່ງ ຜຸຍຫຼ້າມະນີວົງ ໄດ້ຊີ້ແຈງຕໍ່ສະພາແຫ່ງຊາດ ກ່ຽວກັບ ການປະຕິບັດກົດໝາຍຂອງ ອົງການສືບສວນ-ສອບສວນ ໃນການກັກຕົວ ຕາມມາດຕາ 138, ການກັກຕົວ ຕາມມາດຕາ 139 ແລະ ການກັກຂັງພາງ ຕາມມາດຕາ 142 ຂອງກົດໝາຍ ວ່າດ້ວຍ ການດໍາເນີນຄະດີອາຍາ ທີ່ຢູ່ໃນຂອບເຂດຄວາມຮັບຜິດຊອບຂອງ ກະຊວງປ້ອງກັນຄວາມສະຫງົບ ໃນໄລຍະຜ່ານມາ ເພື່ອເປັນການຢັ້ງຢືນຕື່ມຕໍ່ການຈັດຕັ້ງປະຕິບັດ ກົດໝາຍ ວ່າດ້ວຍ ການດໍາເນີນຄະດີອາຍາ ຂອງອົງການສືບສວນ-ສອບສວນ ທີ່ຕິດພັນກັບວຽກງານວິຊາສະເພາະໃນການຈັດຕັ້ງປະຕິບັດ ຫຼື ນໍາໃຊ້ 7 ມາດຕະການສະກັດກັ້ນ ທີ່ກໍານົດໃນໝວດທີ IV, ມາດຕາ 136 ຂອງກົດໝາຍ ວ່າດ້ວຍ ການດໍາເນີນຄະດີອາຍາ ໂດຍທ່ານໄດ້ກ່າວວ່າ:
ກະຊວງປ້ອງກັນຄວາມສະຫງົບ ໄດ້ເປັນເຈົ້າການໃນການຈັດຕັ້ງປະຕິບັດເຊື່ອມຊຶມ, ກໍາແໜ້ນ ແລະ ອອກນິຕິກໍາໃຕ້ກົດໝາຍ, ສ້າງປື້ມຄູ່ມື, ຫັນເປັນແຜນການ ແລະ ໂຄງການ ເພື່ອຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນ ເຊັ່ນ: 7 ມາດຕະການທີ່ກົດໝາຍກໍານົດ ລວມມີ ການພາຕົວ, ການກັກຕົວ, ການຈັບຕົວ, ການກັກຂັງພາງ, ປ່ອຍຕົວພາງ, ການຄຸມຕົວຢູ່ກັບທີ່ ແລະ ການງົດໜ້າທີ່ ຫຼື ຕໍາແໜ່ງ.
ເຊິ່ງຕະຫຼອດໄລຍະທີ່ຜ່ານມາ, ກະຊວງປ້ອງກັນຄວາມສະຫງົບ ກໍໄດ້ເອົາໃຈໃສ່ ແລະ ເປັນເຈົ້າການໃນການຈັດຕັ້ງປະຕິບັດມາດຕະການສະກັດກັ້ນ ທີ່ໄດ້ກໍານົດໄວ້ໃນກົດໝາຍ ວ່າດ້ວຍ ການດໍາເນີນຄະດີອາຍາ ຢ່າງເຂັ້ມງວດ, ປະຕິບັດບົດບັນທຶກ 4 ພາກສ່ວນ ຄື: ກະຊວງປ້ອງກັນຄວາມສະຫງົບ, ກະຊວງຍຸຕິທໍາ, ອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ. ພ້ອມທັງ ຍັງໄດ້ປະຕິບັດມະຕິ, ຄໍາສັ່ງ, ຄໍາແນະນໍາ ແລະ ບັນດານິຕິກໍາອື່ນໆທີ່ກ່ຽວຂ້ອງໃນການດໍາເນີນຄະດີ, ໄດ້ນໍາເອົານິຕິກໍາດັ່ງກ່າວ ຜັນຂະຫຍາຍເປັນແຜນງານອັນລະອຽດເຂົ້າໃນຂົງເຂດວຽກງານການດໍາເນີນຄະດີຂອງ ອົງການສືບສວນ-ສອບສວນ ຂອງເຈົ້າໜ້າທີ່ຕໍາຫຼວດ, ປະຕິບັດສິດໜ້າທີ່ ແລະ ກົດໝາຍຖືກຕ້ອງ.
ກະຊວງປ້ອງກັນຄວາມສະຫງົບ ໄດ້ສ້າງນິຕິກໍາເປັນອັນສະເພາະໃນການຄຸ້ມຄອງ, ຕິດຕາມ ແລະ ກວດກາການດໍາເນີນຄະດີ ເປັນຕົ້ນແມ່ນ ຂໍ້ຕົກລົງຂອງ ອົງການສືບສວນ-ສອບສວນ ຂອງເຈົ້າໜ້າທີ່ຕໍາຫຼວດ, ຄໍາສັ່ງວ່າດ້ວຍ ການຊີ້ນໍາ-ນໍາພາຕິດຕາມກວດກາ ແລະ ແນະນໍາກຳລັງຕໍາຫຼວດຂອງ ອົງການສືບສວນ-ສອບສວນ, ຂໍ້ຫ້າມຕໍ່ນາຍ ແລະ ພົນຕໍາຫຼວດ ໃນການເຄື່ອນໄຫວດໍາເນີນຄະດີສືບສວນ-ສອບສວນ ແລະ ໄດ້ອອກນໍາສັ່ງແນະນໍາວ່າດ້ວຍ ການເພີ່ມທະວີເອົາໃຈໃສ່ໃນການສືບສວນ-ສອບສວນຄະດີ ຈໍານວນຫຼາຍສະບັບ.
ຜ່ານການຈັດຕັ້ງປະຕິບັດໃນການດໍາເນີນຄະດີ ໃນປີ 2021 ເຖິງ 6 ເດືອນຕົ້ນປີ 2022 ສາມາດດໍາເນີນຄະດີທີ່ເກີດຂຶ້ນໄດ້ 7.948 ລາຍ, ສາມາດມ້າງຄະດີໄດ້ 5.743 ລາຍ, ຜູ້ຖືກຫາ 8.901 ຄົນ ຍິງ 882 ຄົນ; ໃນນີ້, ຄົນຕ່າງປະເທດ 175 ຄົນ ຍິງ 17 ຄົນ ແລະ ສາມາດແກ້ໄຂ ຫຼື ດໍາເນີນຄະດີສໍາເລັດ 5.656 ລາຍ, ຜູ້ຖືກຫາ 7.708 ຄົນ ຍິງ 888 ຄົນ, ຕ່າງປະເທດ 178 ຄົນ ຍິງ 18 ຄົນ.
ເພື່ອຮັບປະກັນການຈັດຕັ້ງປະຕິບັດ ບັນດາມາດຕະການສະກັດກັ້ນຕາມກົດໝາຍ ວ່າດ້ວຍ ການດໍາເນີນຄະດີອາຍາ ໃຫ້ເຂົ້າສູ້ລວງເລິກ, ກວ້າງຂວາງ ແລະ ຖືກຕ້ອງຕາມກົດໝາຍ ຕາມແນວທາງ ແລະ ຫຼັກການວິຊາສະເພາະ, ທາງກະຊວງປ້ອງກັນຄວາມສະຫງົບ ຈະນໍາເອົາຜົນສໍາເລັດກອງປະຊຸມຄັ້ງນີ້ ໄປຈັດຕັ້ງປະຕິບັດ ເພື່ອປັບປຸງແກ້ໄຂຕາມທິດ ດັ່ງນີ້:
ຈະຍົກສູງວຽກງານສຶກສາອົບຮົມການເມືອງ-ນໍາພາແນວຄິດ ໃຫ້ແກ່ນາຍ ແລະ ພົນຕໍາຫຼວດເປັນກົກ, ຖືເປັນບັນຫາຮາກຖານທີ່ສໍາຄັນ ໂດຍສະເພາະແມ່ນ ເຈົ້າໜ້າທີ່ຢູ່ໃນຂົງເຂດທີ່ເຮັດວຽກງານສືບສວນ-ສອບສວນ ເພື່ອໃຫ້ເຂົາເຈົ້າມີຄຸນທາດການເມືອງໜັກແໜ້ນ, ມີຄວາມຈົງຮັກພັກດີຕໍ່ພັກ-ລັດ, ມີຈັນຍາບັນ, ຈັນຍາທໍາ, ເປັນກໍາລັງຕໍາຫຼວດຂອງປະຊາຊົນ ໂດຍປະຊາຊົນ ແລະ ເພື່ອຜົນປະໂຫຍດອັນຊອບທໍາຂອງປະຊາຊົນ.
ຮັບປະກັນເຮັດສໍາເລັດໜ້າທີ່ການເມືອງ ທີ່ໄດ້ຮັບມອບໝາຍ, ການຊີ້ນໍາ-ນໍາພາວຽກງານຂອງ ອົງການສືບສວນ-ສອບສວນ ໂດຍສະເພາະແມ່ນນໍາໃຊ້ມາດຕະການທີ່ກົດໝາຍກໍານົດໃຫ້ຖືກຕ້ອງ, ສອບຄ່ອງ ເພື່ອນໍາເອົາຜູ້ກະທໍາຜິດມາລົງໂທດຕາມລະບຽບກົດໝາຍ, ສືບຕໍ່ສ້າງຄວາມເຂັ້ມແຂງບໍາລຸງຍົກລະດັບໃຫ້ເຈົ້າໜ້າທີ່ສືບສວນ-ສອບສວນ ໃຫ້ກໍາແໜ້ນກົດໝາຍແນວທາງຫຼັກການວິຊາສະເພາະ ການເປັນອົງການທີ່ມີຄວາມເຂັ້ມແຂງທາງດ້ານກົດໝາຍ, ເຂັ້ມແຂງທາງດ້ານການຈັດຕັ້ງ ແລະ ເກັ່ງທາງດ້ານວິຊາສະເພາະ, ມີລະບຽບວິໄນ ແລະ ທັນສະໄໝ.