ກອງສິລະປະປ້ອງກັນຄວາມສະຫງົບ ສປປ ລາວ ຈະໄດ້ເຂົ້າຮ່ວມສະແດງສິລະປະວັນນະຄະດີ ຢູ່ ສສ ຫວຽດນາມ ໃນລະຫວ່າງວັນທີ 6-12 ກໍລະກົດ ທີ່ຈະມາເຖິງນີ້ ເນື່ອງໃນໂອກາດສະເຫຼີມສະຫຼອງ ວັນສ້າງຕັ້ງວິທະຍາຄານຕໍາຫຼວດ ກະຊວງປ້ອງກັນຄວາມສະຫງົບ ສສ ຫວຽດນາມ ຄົບຮອບ 60 ປີ.
ພິທີຝຶກຊ້ອມການສະແດງ ໄດ້ຈັດຂຶ້ນໃນວັນທີ 1 ກໍລະກົດ 2022 ທີ່ສະໂມສອນສະໜາມມ້າ, ໂດຍການເຂົ້າຮ່ວມຮັບຊົມຂອງ ພົຈວ ປອ ສຸວັນນີ ສີສຸພາບມີໄຊ ຮອງຫົວໜ້າກົມໃຫຍ່ການເມືອງ ປກສ, ມີບັນດາແຂກຮັບເຊີນຈາກອ້ອມຂ້າງ ກະຊວງ ແລະ ກະຊວງ ຖວທ.
ພັອ ສອນພະຈັນ ທຳມະວົງ ຫົວໜ້າກົມໂຄສະນາອົບຮົມ ກ່າວວ່າ:
ການເຄື່ອນໄຫວຂອງສິລະປະປ້ອງກັນຄວາມສະຫງົບ ສປປ ລາວ ຄັ້ງນີ້ ແມ່ນເຂົ້າຮ່ວມງານມະຫາກຳດົນຕີຕຳຫຼວດບັນດາປະເທດອາຊຽນ ຈັດຂຶ້ນທີ່ນະຄອນຫຼວງຮ່າໂນ້ຍ. ຈາກນັ້ນ, ເດີນທາງໄປສະແດງຢູ່ແຂວງເຫງະອານ ເນື່ອງໃນໂອກາດສະເຫຼີມສະຫຼອງ ວັນສ້າງຕັ້ງວິທະຍາຄານຕໍາຫຼວດ ກະຊວງປ້ອງກັນຄວາມສະຫງົບ ສສ ຫວຽດນາມ ຄົບຮອບ 60 ປີ.
+ ເຊິ່ງລາຍການສະແດງ ປະກອບມີ:
- ດ່ຽວແຄນ
- ບົດຟ້ອນໃຕ້ຮົ່ມທຸງພັກ
- ບົດເພງ ປກສ ປະຊາຊົນ
- ງາມແດນຈໍາປາ
- ເພງ Hanoi cua toi
- ລໍາຕັ່ງຫວາຍ
- ບົດຟ້ອນນັກຮົບສັນຕິລາດ
ຜ່ານການຮັບຊົມການສະແດງ ຜູ້ເຂົ້າຮ່ວມກໍໄດ້ປະກອບຄໍາຄິດຄໍາເຫັນໃສ່ລາຍການສະແດງ ເປັນຕົ້ນແມ່ນຈັງຫວະ, ສຽງດົນຕີ, ການນຸ່ງຖື ແລະ ກ້ອນຮູບແຖວ ຍັງບໍ່ທັນໄດ້ດີເທົ່າທີ່ຄວນ, ເຊິ່ງຄຳປະກອບຄຳເຫັນດັ່ງກ່າວ ກອງສິລະປະ ຈະນຳໄປປັບປຸງໃຫ້ເນື້ອໃນອຸດົມສົມບູນດີຂຶ້ນກວ່າເກົ່າ.