ກະຊວງປ້ອງກັນຄວາມສະຫງົບ ໄດ້ຈັດພິທີປະດັບຫຼຽນໄຊແຮງງານໃຫ້ ຄະນະຮັບຜິດຊອບຄົ້ນຄວ້າຮຽບຮຽງປະຫວັດສາດຊ່ຽວຊານ ກະຊວງປ້ອງກັນຄວາມສະຫງົບ ສສ ຫວຽດນາມ ປະຈໍາລາວ ໃນວັນທີ 7 ກໍລະກົດ 2022, ເຂົ້າຮ່ວມ ແລະ ເປັນປະທານໂດຍ ພົອ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ ລັດຖະມົນຕີ ກະຊວງປ້ອງກັນຄວາມສະຫງົບ, ມີຄະນະປະຈໍາພັກ, ຄະນະພັກກະຊວງ, ກົມໃຫຍ່, ຫ້ອງວ່າການ, ກົມ, ກອງບັນຊາການ, ວິທະຍາຄານ, ພະນັກງານທີ່ໄດ້ຮັບການຍ້ອງຍໍ ແລະ ພະນັກງານຫຼັກແຫຼ່ງ ກົມຄົ້ນຄວ້າວິທະຍາສາດ ແລະ ປະຫວັດສາດ ເຂົ້າຮ່ວມ.

ພົຈວ ປອ ສຸວັນນີ ສີສຸພາບມີໄຊ ຮອງຫົວໜ້າກົມໃຫຍ່ການເມືອງ ກະຊວງປ້ອງກັນຄວາມສະຫງົບ ໄດ້ຜ່ານລັດຖະດຳລັດຂອງ ປະທານປະເທດ ເລກທີ 027/ປປທ, ລົງວັນທີ 7 ກຸມພາ 2022 ວ່າດ້ວຍ ການປະດັບຫຼຽນໄຊແຮງງານ ເຊິ່ງໄດ້ປະດັບຫຼຽນໄຊແຮງງານ ຊັ້ນ II ແລະ ຊັ້ນ III ໃຫ້ຄະນະຮັບຜິດຊອບຄົ້ນຄວ້າ, ຮຽບຮຽງປະຫວັດສາດ ກະຊວງປ້ອງກັນຄວາມສະຫງົບ ສປປ ລາວ ດັ່ງນີ້:

+ ຫຼຽນໄຊແຮງງານ ຊັ້ນ II ຈຳນວນ 6 ສະຫາຍ ຄື:

  • ພົທ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ
  • ພົຈວ ປອ ມາລາ ວິລະຈິດ ຮອງຫົວໜ້າກໍາມາທິການ ປກຊ-ປກສ ສະພາແຫ່ງຊາດ
  • ພັອ ປອ ບັນເທົາ ພິມພິສານ ຮອງຫົວໜ້າກົມຄົ້ນຄວ້າວິທະຍາສາດ ແລະ ປະຫວັດສາດ
  • ພັອ ກໍລະກັນ ຄ້ໍາພູປະຖົມ ຮອງຫົວໜ້າກົມຄົ້ນຄວ້າວິທະຍາສາດ ແລະ ປະຫວັດສາດ
  • ພັທ ວົງເພັດ ປະເສີດ ຮອງຫົວໜ້າພະແນກຄົ້ນຄວ້າປະຫວັດສາດ-ມູນເຊື້ອ ປກສ ກົມຄົ້ນຄວ້າວິທະຍາສາດ ແລະ ປະຫວັດສາດ
  • ພັຕ ພອນສຸກ ລິນທະວົງສາ ຮອງຫົວໜ້າພະແນກຄົ້ນຄວ້າຍຸດທະສາດ ປກສ ກົມຄົ້ນຄວ້າວິທະຍາສາດ ແລະ ປະຫວັດສາດ

ທັງນີ້, ໃຫ້ກຽວປະດັບຫຼຽນໄຊໂດຍ ພົອ ວິໄລ ຫຼ້າຄໍາຟອງ.

+ ປະດັບຫຼຽນໄຊແຮງງານ ຊັ້ນ III ໃຫ້ 4 ສະຫາຍ ຄື

  • ສະຫາຍ ພັອ ປອ ບຸນຊະນະ ສິມມາລາວົງ ຮອງຫົວໜ້າອຳນວຍການ ວິທະຍາຄານສັນຕິບານປະຊາຊົນ
  • ພັອ ປອ ແກ້ວມີໄຊ ໄຊຍະວົງ ຮອງຫົວໜ້າອໍານວຍການ ວິທະຍາຄານຕຳຫຼວດປະຊາຊົນ
  • ພັອ ບຸນມີ ມັກຄະວານ ຫົວໜ້າກົມກໍ່ສ້າງກໍາລັງ
  • ພັທ ສາຍພອນ ຫອມມີໄຊ ຮອງຫົວໜ້າກົມພົວພັນຕ່າງປະເທດ

ເຊິ່ງກຽດປະດັບຫຼຽນໄຊໂດຍ ພົຕ ຄຳກິ່ງ ຜຸຍຫຼ້າມະນີວົງ ຫົວໜ້າກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ.

ໂຄງລ່າງຄົ້ນຄວ້າຮຽບຮຽງປະຫວັດສາດຊ່ຽວຊານ ກະຊວງປ້ອງກັນຄວາມສະຫງົບ ສສ ຫວຽດນາມ ປະຈຳລາວ (1961-2016) ເປັນໂຄງການຮ່ວມມືລະຫວ່າງ ກະຊວງປ້ອງກັນຄວາມສະຫງົບ ສປປ ລາວ ແລະ ກະຊວງປ້ອງກັນຄວາມສະຫງົບ ສສ ຫວຽດນາມ ໂດຍມອບໃຫ້ກົມຄົ້ນຄວ້າວິທະຍາສາດ ແລະ ປະຫວັດສາດ ປກສ ສົມທົບກັບ ກົມຄົ້ນຄວ້າຍຸດທະສາດ, ວິທະຍາສາດ ແລະ ປະຫວັດສາດ ກະຊວງປ້ອງກັນຄວາມສະຫງົບ ຫວຽດນາມ ຮ່ວມມືກັນໃນການຈັດຕັ້ງປະຕິບັດ.

ຜ່ານການຈັດຕັ້ງປະຕິບັດເປັນເວລາ 2 ປີ ແຕ່ປີ 2019-2021 ແມ່ນໄດ້ສຳເລັດຕາມແຜນການ, ຈັດພິມເປັນສອງພາສາ ຄື: ພາສາລາວ ແລະ ພາສາຫວຽດນາມ ລວມມີ 310 ໜ້າ ຈຳນວນ 350 ຫົວ; ໃນນີ້, ພິມເປັນພາສາລາວ ຈຳນວນ 150 ຫົວ ແລະ ພາສາຫວຽດນາມ ຈຳນວນ 200 ຫົວ.

ສອງກະຊວງໄດ້ຈັດພິທີມອບ-ຮັບປຶ້ມປະຫວັດສາດດັ່ງກ່າວ ຂຶ້ນຢ່າງເປັນທາງການ ໃນວັນທີ 24 ມີນາ 2021 ເນື່ອງໃນໂອກາດພິທີສະເຫຼີມສະຫຼອງ ວັນຊ່ຽວຊານກະຊວງປ້ອງກັນຄວາມສະຫງົບ ສສ ຫວຽດນາມ ປະຈໍາລາວ ຄົບຮອບ 60 ປີ (22 ມີນາ 1961-22 ມີນາ 2021).