ກົມຕໍາຫຼວດຈະລາຈອນ ກົມໃຫຍ່ຕໍາຫຼວດ ກະຊວງ ປກສ ເຊື່ອມຊຶມແຜນກໍານົດຕໍາແໜ່ງງານ ແລະ ປັບປຸງກົງຈັກການຈັດຕັ້ງ ໃນວັນທີ 7 ກໍລະກົດ, ເປັນປະທານໂດຍ ພັອ ກົງສີ ສຸວັນນະຕຸ້ມ ຫົວໜ້າກົມຕໍາຫຼວດຈະລາຈອນ ພ້ອມດ້ວຍຄະນະກົມ, ຫົວໜ້າພະແນກ, ຫ້ອງການ ແລະ ພະນັກງານ-ນັກຮົບ ເຂົ້າຮ່ວມ.

ພັອ ກົງສີ ສຸວັນນະຕຸ້ມ ກ່າວວ່າ:

ການກໍານົດຕໍາແໜ່ງງານ ແລະ ການປັບປຸງກົງຈັກການຈັດຕັ້ງໃນແຕ່ລະຂັ້ນ ກໍເພື່ອເປັນບ່ອນອີງໃຫ້ບັນດາກົມໃຫຍ່, ກົມກອງ, ວິທະຍາຄານ, ກອງບັນຊາການ ປກສ ແຂວງ-ນະຄອນຫຼວງ ແນໃສ່ຮັບປະກັນການປັບປຸງກົງຈັກການຈັດຕັ້ງ, ການບັນຈຸ, ການສັບຊ້ອນນາຍ ແລະ ພົນຕໍາຫຼວດ ເຂົ້າໃນ ຕໍາແໜ່ງງານ, ແຕ່ລະໜ້າວຽກໃຫ້ມີປະສິດທິພາບ ແລະ ປະສິດທິຜົນ.

ນອກນັ້ນ, ການກໍານົດຕໍາແໜ່ງງານ ຍັງເປັນການກໍານົດທີ່ເປັນເອກະສານກ່ຽວກັບ ຄວາມຮັບຜິດຊອບຂອງນາຍ ແລະ ພົນຕໍາຫຼວດ ຕາມກຸ່ມວຽກ ຫຼື ຂົງເຂດວຽກງານ ໂດຍອີງຕາມທີ່ຕັ້ງພາລະບົດບາດ, ຂອບເຂດສິດ ແລະ ໜ້າທີ່ຂອງແຕ່ລະກົມກອງ-ທ້ອງຖິ່ນ ເພື່ອໃຫ້ນາຍ ແລະ ພົນຕໍາຫຼວດ ນໍາໄປຈັດຕັ້ງປະຕິບັດ. 

ສໍາລັບເອກະສານທີ່ນໍາມາເຊື່ອມຊຶມຄັ້ງນີ້ ປະກອບມີ:

  • ຂໍ້ຕົກລົງ ວ່າດ້ວຍ ການກໍານົດຕໍາແໜ່ງງານຂອງກົມກອງ ແລະ ທ້ອງຖິ່ນ ໃນກໍາລັງປ້ອງກັນຄວາມສະຫງົບ
  • ຄໍາແນະນໍາວ່າດ້ວຍ ການຜັນຂະຫຍາຍຄໍາສັ່ງຂອງ ກະຊວງປ້ອງກັນຄວາມສະຫງົບ ກ່ຽວກັບ ການປັບປຸງກົງຈັກການຈັດຕັ້ງຂອງບັນດາກົມກອງ ແລະ ທ້ອງຖິ່ນ ໃນກໍາລັງປ້ອງກັນຄວາມສະຫງົບ
  • ຂໍ້ຕົກລົງ ວ່າດ້ວຍ ການແຕ່ງຕັ້ງຄະນະຮັບຜິດຊອບກໍານົດຕໍາແໜ່ງງານ ແລະ ປັບປຸງກົງຈັກການຈັດຕັ້ງຂອງ ກົມຕໍາຫຼວດຈະລາຈອນ ແລະ ແນະນໍາກ່ຽວກັບແຜນກໍານົດດັ່ງກ່າວ

ທັງນີ້, ກໍເພື່ອເປັນການຈັດຕັ້ງຜັນຂະຫຍາຍບັນດາຄໍາສັ່ງ ແລະ ຄໍາແນະນໍາດັ່ງກ່າວ ໃຫ້ໄດ້ຮັບການຈັດຕັ້ງປະຕິບັດຢ່າງເປັນເອກະພາບ ແລະ ມີປະສິດທິຜົນ. ດັ່ງນັ້ນ, ຮຽກຮ້ອງມາຍັງນາຍ ແລະ ພົນຕໍາຫຼວດ ທົ່ວກົມຈະລາຈອນ ຈົ່ງເປັນເຈົ້າການໃນການຈັດຕັ້ງປະຕິບັດຢ່າງເຂັ້ມງວດ ເພື່ອເປັນບ່ອນອີງໃຫ້ແກ່ບັນດາກົມກອງ, ທ້ອງຖິ່ນ ໃນວຽກງານປັບປຸງກົງຈັກການຈັດຕັ້ງ ໃຫ້ຖືກຕ້ອງຕາມທິດກະທັດຮັດ, ໂປ່ງໃສ-ສອດຄ່ອງກັບສະພາບຕົວຈິງ ແລະ ທ່ວງທັນກັບເວລາທີ່ຂັ້ນເທິງກໍານົດໄວ້.