ໃນລະຫວ່າງວັນທີ 3-6 ພະຈິກ 2022, ຄະນະຜູ້ແທນ ສານປະຊາຊົນສູງສຸດ ນໍາໂດຍ ທ່ານ ສຈ.ປອ ນາງ ວຽງທອງ ສີພັນດອນ ປະທານສານປະຊາຊົນສູງສຸດ ພ້ອມດ້ວຍຄະນະ ໄດ້ເດີນທາງເຂົ້າຮ່ວມ ກອງປະຊຸມສະພາປະທານສານ ອາຊຽນ ຄັ້ງທີ 10 ທີນະຄອນຫຼວງກົວລາລໍາເປີ ປະເທດມາເລເຊຍ, ມີບັນດາປະທານສານສູງສຸດ ແລະ ຄະນະຜູ້ແທນ ຈາກ ສປປ ລາວ, ສສ ຫວຽດນາມ, ມາເລເຊຍ, ມຽນມາ, ຟິລິບປິນ, ສິງກະໂປ, ຣາຊາອານາຈັກໄທ, ຣາຊາອານາຈັກກໍາປູເຈຍ, ບຣູໄນ ແລະ ອິນໂດເນເຊຍ ພ້ອມດ້ວຍປະເທດຜູ້ສັງເກດການ ຈາກ ສປ ຈີນ, ສ ເກົາຫຼີ ແລະ ຍີ່ປຸ່ນ ເຂົ້າຮ່ວມ.

ກອງປະຊຸມໄດ້ຮັບຟັງການລາຍງານ, ປຶກສາຫາລື ແລະ ຮັບຮອງເອົາກຸ່ມວຽກງານຕຸລາການ ອາຊຽນ ເປັນຕົ້ນແມ່ນ:

ການສ້າງເວບໄຊ ເພື່ອນໍາເອົາຂໍ້ມູນຂ່າວສານ, ບັນດາກົດໝາຍ ແລະ ອື່ນໆ ກ່ຽວກັບວຽກງານຕຸລາການອາຊຽນ ເຂົ້າໃນເວບໄຊ ເພື່ອເຮັດໃຫ້ບັນດາພາກພື້ນ, ສາກົນ ແລະ ປະຊາຊົນ ໄດ້ຮັບຮູ້ ແລະ ເຂົ້າໃຈວຽກງານຕຸລາການ ອາຊຽນ ເພີ່ມຂຶ້ນ.

ຮ່າງລະບຽບການນຳເອົາຫຼັກຖານສໍາລັບການດໍາເນີນຄະດີແພ່ງ ຫຼື ບັນຫາທາງການຄ້າ ເພື່ອສາມາດນໍາເອົາຫຼັກຖານຕ່າງໆທີ່ມີຂໍ້ຂັດແຍ່ງຂ້າມພົມແດນ ມານໍາໃຊ້ໃນແຕ່ລະປະເທດພາຍໃນອາຊຽນໄດ້.

ການນຳໃຊ້ເຕັກໂລຊີເຂົ້າໃນການບໍລິຫານຄະດີ (AI) ພາຍໃນອາຊຽນ.

ຮ່າງລະບຽບຂໍ້ຂັດແຍ່ງຂ້າມພົມແດນກ່ຽວກັບເດັກນ້ອຍ ໂດຍສະເພາະແມ່ນ ຄວາມຮັບຜິດຊອບຂອງພໍ່-ແມ່ຕໍ່ລູກ ແລະ ການປົກປ້ອງສິດ ແລະ ຜົນປະໂຫຍດຂອງເດັກ ໃນກໍລະນີມີການຢ່າຮ້າງ ຫຼື ຂໍ້ຂັດແຍ່ງກ່ຽວກັບເດັກ.

ວຽກງານດ້ານການສຶກສາ ແລະ ການຝຶກອົບຮົມຕຸລາການ.

ວຽກງານສ້າງສານດີເດັ່ນ ແລະ ແຜນການຮ່ວມມືໃນຕໍ່ໜ້າຂອງສານອາຊຽນ.

ນອກນັ້ນ, ໃນກອງປະຊຸມ ບັນດາປະທານສານອາຊຽນ ກໍໄດ້ລົງນາມຮັບຮອງເອົາຖະແຫຼງການຮ່ວມ ແລະ ຍັງໄດ້ປະຊຸມບວກ 3 ຮ່ວມກັບ ສານ ສປ ຈີນ, ສ ເກົາຫຼີ ແລະ ຍີ່ປຸ່ນ ເພື່ອປືກສາຫາລືແຜນການຮ່ວມມືໃນຕໍ່ໜ້າ ໂດຍສະເພາະການນໍາໃຊ້ເຕັກໂນໂລຊີເຂົ້າໃນການດໍາເນີນຄະດີ ໃນຂົງເຂດອາຊຽນ.