ໃນໄລຍະ 6 ເດືອນຕົ້ນປີ 2022, ຢູ່ນະຄອນຫຼວງວຽງຈັນ ໄດ້ເກີດມີເຫດລົມພາຍຸພັດ ແລະ ໄຟໄໝ້ເຮືອນ 11 ຄັ້ງ ໃນ 8 ຕົວເມືອງ ລວມມູນຄ່າເສຍ ຫາຍ 2,4 ຕື້ກວ່າກີບ, ເຊິ່ງເຫດການດັ່ງກ່າວ ເຮັດໃຫ້ສົ່ງຜົນກະທໍາທາງກົງ ແລະ ທາງອ້ອມຕໍ່ການດໍາລົງຊີວິດຂອງປະຊາຊົນ ທັງສ້າງຄວາມເສຍທາງດ້ານຊັບສິນຫຼາຍສົມຄວນ.

ທ່ານ ສາລະພິດ ສູນວໍລະວົງ ຫົວໜ້າພະແນກແຮງງານ ແລະ ສະຫວັດດີການສັງຄົມນະຄອນຫຼວງວຽງຈັນ ຮອງປະທານຄະນະກໍາມະການປ້ອງກັນ ແລະ ຄວບຄຸມໄພພິບັດນະຄອນຫຼວງວຽງຈັນ ( ຄພນວ ) ກ່າວໃນກອງປະຊຸມສະຫຼຸບ ແລະ ຖອດຖອນບົດຮຽນການຈັດຕັ້ງປະຕິບັດວຽກງານປ້ອງກັນ ແລະ ຄວບຄຸມ ໄພພິບັດ 6 ເດືອນຕົ້ນປີ ແລະ ທິດທາງ ແຜນການ 6 ເດືອນທ້າຍປີ ເຊິ່ງຈັດຂຶ້ນ ໃນວັນທີ 7 ກໍລະກົດ 2022 ໂດຍການ ເປັນປະທານຂອງ ທ່ານ ພູວົງ ວົງຄໍາຊາວ ຮອງເຈົ້າຄອງ ປະທານ ຄພນວ ວ່າ: ໃນ 6 ເດືອນຕົ້ນປີ 2022 ນະຄອນຫຼວງວຽງຈັນ ໄດ້ມີເຫດການລົມພາຍຸພັດ ແລະ ໄຟໄໝ້ເຮືອນ ເກີດຂຶ້ນ 11 ຄັ້ງໃນ 8 ເມືອງ, ມີ 11 ບ້ານ 85 ຄອບຄົວ, ເຊິ່ງສົ່ງຜົນກະທົບໂດຍກົງຕໍ່ການດຳລົງຊີວິດຂອງປະຊາຊົນຈໍານວນ 425 ຄົນ ຍິງ 226 ຄົນ ເຖິງວ່າໄພພິບັດ ຄັ້ງນີ້ບໍ່ມີຜູ້ບາດເຈັບ ແລະ ເສຍຊີວິດ ແຕ່ໄດ້ສ້າງຄວາມເສຍຫາຍຕໍ່ຊັບສິນຂອງລັດ ແລະ ຂອງປະຊາຊົນ ສະເລ່ຍມູນຄ່າເສຍຫາຍທັງ ໝົດ 2.402.866.076 ກີບ; ໃນນີ້, ໄດ້ ສ້າງຄວາມເສຍຫາຍຕໍ່ຊັບສິນ, ເຮືອນຊານຂອງປະຊາຊົນ ລວມມູນຄ່າ .290.794. 076 ກີບ ແລະ ສ້າງຄວາມເສຍຫາຍຕໍ່ຊັບສິນຂອງລັດ ລວມມີໂຮງຮຽນ, ກາຣາລົດ, ຫ້ອງການ, ສາງເຂົ້າ, ສາຍໄຟຟ້າຄວາມແຮງຂະໜາດກາງ ແລະ ເຮືອນນອນຂອງກອງກຳລັງປະ ກອບອາວຸດ ລວມມູນຄ່າປະມານ 112.072. 000 ກີບ.

ໃນກອງປະຊຸມ, ຄະນະກໍາມະການ ຄພນວ ແລະ ພາກສ່ວນທີ່ກ່ຽວຂ້ອງ ຍັງໄດ້ປຶກສາຫາລືຄົ້ນຄວ້າຊອກຫາຊ່ອງທາງຮັບມືໃນການແກ້ໄຂ ເປັນຕົ້ນແມ່ນໄດ້ຕິດຕາມ ແລະ ຊຸກຍູ້ບັນດາເມືອງ ສ້າງຕັ້ງຄະນະຮັບຜິດຊອບຕໍ່ວຽກງານດັ່ງກ່າວຢ່າງລະອຽດ ໂດຍການສໍາຫຼວດກວດກາກໍານົດເຂດພື້ນທີ່ສ່ຽງທີ່ຈະເກີດໄພພິບັດ, ກໍານົດພື້ນທີ່ຊ່ວຍເຫຼືອສຸກເສີນ ແລະ ທ່າແຮງກຽມພ້ອມເພື່ອຕອບໂຕ້ ແລະ ຊ່ວຍເຫຼືອຜູ້ປະສົບໄພພິບັດທາງທໍາມະຊາດໃນລະດູຝົນເຖິງລະດູແລ້ງ ທັງນີ້ກໍເພື່ອເປັນການຕິດຕາມເຝົ້າລະວັງ ແລະ ຮັບປະກັນເມື່ອມີເຫດການທີ່ເກີດຂຶ້ນ ກໍໃຫ້ສາມາດເຂົ້າໄປຊ່ວຍເຫຼືອປະຊາຊົນ ກໍຄືຜູ້ປະສົບໄພໄດ້ທ່ວງທັນເວລາ.