ກະຊວງປ້ອງກັນປະເທດ ໄດ້ຈັດພິທີຖະແຫຼ່ງຂ່າວການກະກຽມ ແລະ ສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022 ຂຶ້ນໃນວັນທີ 13 ກໍລະກົດ 2022, ຖະແຫຼງຂ່າວໂດຍ ພົທ ທອງລອຍ ສີລິວົງ ຮອງລັດຖະມົນຕີກະຊວງປ້ອງກັນປະເທດ, ມີບັນດາຄະນະນໍາກະຊວງ, ກົມ ໃຫຍ່, ຫ້ອງວ່າການ, ອົງການ, ກົມກອງອ້ອມຂ້າງກະຊວງປ້ອງກັນປະເທດເຂົ້າຮ່ວມ.

ພົທ ທອງລອຍ ສີລິວົງ ກ່າວວ່າ: ສໍາລັບການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດ ນາມ ໃນຄັ້ງນີ້, ແມ່ນສະແດງເຖິງເຈດຈໍານົງອັນແນ່ ນອນຂອງສອງຊາດ, ສອງກອງທັບ ລາວ-ຫວຽດນາມ ໃນການສືບຕໍ່ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອທີ່ ປະທານ ໂຮ່ຈິມິນ ຜູ້ນໍາທີ່ຍິ່ງໃຫຍ່ຂອງປະຊາຊົນຫວຽດນາມ ແລະ ປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປະຊາຊົນລາວ ໄດ້ກໍ່ຕັ້ງນັ້ນໃຫ້ນັບມື້ກ້າວເຂົ້າສູ້ລວງເລິກ ແລະ ຂະຫຍາຍຕົວຢ່າງແຂງແຮງ ທັງເປັນການສະແດງເຖິງຄວາມຮູ້ບຸນຄຸນຕໍ່ກັບການຊ່ວຍເຫຼືອເຊິ່ງກັນແລະກັນ ເປັນຕົ້ນແມ່ນການຊ່ວຍເຫຼືອອັນລໍ້າຄ່າຂອງເພື່ອນຫວຽດນາມ ຕະຫຼອດໄລຍະຂອງການປະຕິວັດລາວ ແລະ ທັງເປັນການສຶກສາອົບຮົມໃຫ້, ສະມາຊິກພັກ, ພະນັກງານ, ພົນທະຫານ ແລະ ປະຊາຊົນ ໂດຍສະເພາະແມ່ນຄົນຮຸ່ນໜຸ່ມຮຸ່ນສືບທອດມີຄວາມເຂົ້າໃຈທີ່ຖືກຕ້ອງເລິກເຊິ່ງ, ໜັກແໜ້ນ ເພື່ອສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມດັ່ງກ່າວ ກໍຄືປົກປັກຮັກສາໝາກຜົນຂອງການປະຕິວັດໃຫ້ໝັ້ນຄົງຕະຫຼອດໄປ. ເພື່ອເຮັດໃຫ້ບັນຍາກາດຂອງການພົວພັນຮ່ວມມືໃນປີສາມັກຄີມິດຕະພາບລາວ-ຫວຽດນາມ 2022 ເປັນຂະບວນການກວ້າງຂວາງຟົດຟື້ນ, ມີຊີວິດຊີວາ ແລະ ເປັນສັນຍາລັກແຫ່ງການພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານສອງຊາດ-ສອງກອງທັບລາວ-ຫວຽດນາມ.

ກົມການເມືອງສູນກາງພັກປະຊາຊົນ ປະຕິວັດລາວ ກໍໄດ້ມີມະຕິຕົກລົງແຕ່ງຕັ້ງຄະນະຊີ້ນໍາລະດັບຊາດ ປະກອບມີ 8 ທ່ານ ໂດຍແມ່ນ ທ່ານ ບຸນທອງ ຈິດມະນີ ກໍາມະການກົມການເມືອງ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດເປັນຫົວໜ້າ, ຄະນະຊີ້ນໍາລະດັບຊາດໄດ້ແຕ່ງຕັ້ງຄະນະຊ່ວຍວຽກ, ເຊິ່ງປະກອບດ້ວຍ 34 ທ່ານ. ສ່ວນກະຊວງປ້ອງກັນປະເທດ ກໍມີຂໍ້ຕົກລົງແຕ່ງຕັ້ງຄະນະຮັບຜິດຊອບສ້າງກິດຈະກໍາ ແລະ ຂະບວນ ການ ປະກອບມີ 8 ສະຫາຍ ແລະ ໄດ້ພ້ອມກັນຄົ້ນຄວ້າ-ກໍານົດເນື້ອໃນການເຄື່ອນໄຫວກິດຈະກໍາຕ່າງໆ ໂດຍອີງໃສ່ 8 ໜ້າວຽກທີ່ຄະນະ ຊີ້ນໍາລະດັບຊາດໄດ້ກໍານົດ ຄື: ພິທີເປີດ-ປິດ, ພິທີເປີດຈັດຂຶ້ນຢູ່ ສສ ຫວຽດນາມ ໃນເດືອນມັງກອນ 2022, ສ່ວນພິທີປິດຈະໄດ້ຈັດຂຶ້ນໃນເດືອນທັນວາ 2022 ທີ່ນະຄອນຫຼວງວຽງຈັນ. ສ່ວນກະຊວງປ້ອງກັນປະເທດຈະຈັດຂຶ້ນຢູ່ເມືອງວຽງໄຊ ແຂວງຫົວພັນ, ມີການ ແລກປ່ຽນຄະນະຜູ້ແທນຂັ້ນຕ່າງໆ 16 ທ່ານ, ຈັດປາຖະກະຖາ, ໂຮມຊຸມນຸມ, ແລກປ່ຽນສານອວຍພອນ, ແລກປ່ຽນດ້ານວັດທະນະທໍາ, ຈັດຕັ້ງຕະຫຼາດນັດ-ວາງສະແດງສິນຄ້າ, ຈັດຕັ້ງໂຄສະນາຖະແຫຼງຂ່າວ ແລະ ສ້າງຂະບວນການ ແຂ່ງຂັນ-ຍ້ອງຍໍ.

ສະນັ້ນ, ຕໍ່ກັບການກະກຽມ-ຈັດຕັ້ງສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022 ຄະນະນໍາກະຊວງປ້ອງກັນປະເທດ, ໃນນາມຫົວໜ້າຄະນະຮັບຜິດຊອບສ້າງກິດຈະກໍາ ແລະ ຂະບວນການງານສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ຢູ່ກະຊວງປ້ອງກັນປະ ເທດ, ຂໍຮຽກຮ້ອງມາຍັງບັນດາສະຫາຍ ຄະນະພັກ-ຄະນະບັນຊາກົມໃຫຍ່, ຫ້ອງວ່າການກະຊວງ, ອົງການ, ກົມກອງ, ກໍາລັງຫຼວງ-ກໍາລັງທ້ອງຖິ່ນໃນທົ່ວກອງທັບ, ສື່ມວນຊົນທຸກພາກສ່ວນທັງພາກລັດ ແລະ ເອກະຊົນທັງພາຍໃນ ແລະ ພາຍນອກກອງທັບ ຈົ່ງພ້ອມກັນໂຄສະນາ, ເຜີຍແຜ່ຜົນງານການຮ່ວມມື, ການພົວພັນຊ່ວຍເຫຼືອເຊິ່ງກັນແລະກັນລະຫວ່າງສອງຊາດ, ສອງກອງທັບລາວ-ຫວຽດນາມ ດ້ວຍເນື້ອໃນ, ຮູບແບບທີ່ເລິກເຊິ່ງ, ອຸດົມສົມບູນ.