ວາງກຳລັງຕຳຫຼວດຈະລາຈອນ ເຮັດໜ້າທີ່ອຳນວຍຄວາມສະດວກ ໃນການໄຂສົກຮຽນໃໝ່

0
4290

ພະແນກຕໍາຫຼວດຈະລາຈອນ ປກສ ນະຄອນຫຼວງວຽງຈັນ ໄດ້ວາງກໍາລັງຕໍາຫຼວດຈະລາຈອນຢູ່ຕາມສາຍທາງ ແລະ ຈຸດສໍາຄັນຕ່າງໆ ເພື່ອເຮັດໜ້າທີ່ອໍານວຍຄວາມສະດວກ ໃນໄລຍະເປີດສົກຮຽນໃໝ່ 2017-2018 ທີ່ຄາດວ່າສະພາບການສັນຈອນຈະເພີ່ມຂຶ້ນ ໃຫ້ມີຄວາມສະດວກ ແລະ ຄ່ອງຕົວ ທັງຫຼີກລ່ຽງບັນຫາເກີດອຸບັດຕິເຫດ.
ພັທ ຢຸດຕະພົງ ສຸວັນນະສິງ ຫົວໜ້າພະແນກຕໍາຫຼວດຈະລາຈອນ ປກສ ນະຄອນຫຼວງວຽງຈັນ ໃຫ້ຮູ້ໃນວັນທີ 29 ສິງຫາ 2017 ນີ້ວ່າ: ໃນໄລຍະເປີດສົກຮຽນໃໝ່ຕາມການຄາດກະ, ສະພາບການສັນຈອນໃນນະຄອນຫຼວງວຽງຈັນ ຈະເພີ່ມຂຶ້ນເປັນຈໍານວນຫຼວງຫຼາຍ ຈະເຮັດໃຫ້ພາຫະນະເກີດມີຄວາມແອອັດຢູ່ເສັ້ນທາງສາຍສໍາຄັນ ແລະ ຕໍ່ໜ້າໂຮງຮຽນສ້າງຄວາມຫຍຸ້ງຍາກໃຫ້ແກ່ຜູ້ໃຊ້ລົດ-ໃຊ້ຖະໜົນ ເພື່ອຮັບມືກັບສະພາບການທີ່ຈະເກີດຂຶ້ນນັ້ນ ພະແນກຕໍາຫຼວດຈະລາຈອນ ປກສ ນະຄອນຫຼວງວຽງຈັນ ກໍໄດ້ເປີດກອງປະຊຸມວາງແຜນປ້ອງກັນ ໂດຍສົມທົບກັບຕໍາຫຼວດຈະລາຈອນບັນດາເມືອງ ວາງກໍາລັງຕໍາຫຼວດຈະລາຈອນຢູ່ຕາມທາງຮ່ອມ, 3 ແຍກ, 4 ແຍກ, ວົງວຽນ, ໜ້າໂຮງຮຽນ ແລະ ຈຸດສໍາຄັນຕ່າງໆທີ່ຄາດວ່າ ສະພາບການສັນຈອນແອອັດ ເພື່ອເຮັດໜ້າທີ່ຈັດສັນ, ອໍານວຍຄວາມສະດວກ ເປັນຕົ້ນເຂັ້ມງວດໃສ່ການຢຸດ, ການຈອດຂອງຜູ້ຂັບຂີ່ນໍາເວລາຮັບ-ສົ່ງລູກຫຼານ. ຄຽງຄູ່ກັນນັ້ນ, ເຈົ້າໜ້າທີ່ຕໍາຫຼວດຈະລາຈອນ ແຕ່ງຕັ້ງກໍາລັງສາຍກວດຕາມເສັ້ນທາງໃນຊົ່ວໂມງຮີບດ່ວນ ເພື່ອບໍ່ໃຫ້ຜູ້ໃຊ້ລົດ-ໃຊ້ຖະໜົນຈອດຊະຊາຍ ທີ່ເປັນການກີດຂວາງການສັນຈອນ. ກໍລະນີພົບເຫັນລົດທີ່ຈອດບໍ່ຖືກລະບຽບ ຈະຖືກຕັກເຕືອນ ແລະ ປັບໃໝຕາມລະບຽບກໍານົດໄວ້.

ສະເພາະພື້ນທີ່ຂອງແຕ່ລະເມືອງ ພະແນກຕໍາຫຼວດຈະລາຈອນ ໃນນາມຊີ້ນໍາລວມ ໄດ້ເນັ້ນໃຫ້ກອງຕໍາຫຼວດຈະລາຈອນຂອງເມືອງ ຂຶ້ນແຜນສະເພາະ ແລະ ບັນຈຸກໍາລັງໃສ່ແຕ່ລະຈຸດ ທັງເນັ້ນໃຫ້ເຮັດໜ້າທີ່ຢ່າງຕັ້ງໜ້າ ແລະ ມີຄວາມຮັບຜິດຊອບສູງເພື່ອເຮັດໃຫ້ ສະພາບການສັນຈອນຢູ່ແຕ່ລະເມືອງມີຄວາມສະດວກ ຖ້າຫຼາກວ່າເມືອງ ສຸມໃສ່ແກ້ໄຂບັນຫາການສັນຈອນແອອັດກໍມີຄວາມຄ່ອງຕົວ ແລະ ສະດວກຍິ່ງຂຶ້ນ; ເຊິ່ງມາຮອດປັດຈຸບັນ, ແຜນການປ້ອງກັນຂອງພະແນກ ແລະ ເມືອງ ໄດ້ສໍາເລັດ, ໄດ້ມີການຈັດກອງປະຊຸມຜ່ານແຜນປ້ອງກັນ ແລະ ເຈົ້າໜ້າທີ່ທຸກສະຫາຍກໍມີຄວາມພ້ອມໃນການເຮັດໜ້າທີ່ຮັບໃຊ້ພໍ່-ແມ່ປະຊາຊົນ. ຈາກການປະຕິບັດໜ້າທີ່ດັ່ງກ່າວ, ເຈົ້າໜ້າທີ່ພະແນກຕໍາຫຼວດຈະລາຈອນເຊື່ອໝັ້ນວ່າຈະເຮັດໃຫ້ບັນຫາການສັນຈອນພາຍໃນຕະຫຼອດສົກຮຽນ ມີຄວາມເປັນລະບຽບຮຽບຮ້ອຍ, ສໍາລັບມື້ເປີດສົກຮຽນຢ່າງເປັນທາງການເຈົ້າໜ້າທີ່ພະແນກຕໍາຫຼວດຈະລາຈອນ ຈະໄດ້ລົງຕິດການສະພາບການຕົວຈິງ ເພື່ອນໍາມາຖອດບົດຮຽນໃນການປະຕິບັດໜ້າທີ່ໃຫ້ດີຂຶ້ນກວ່າເກົ່າ. ສິ່ງທີ່ພົບພໍ້ໃນແຕ່ລະສົກຮຽນທີ່ຜ່ານມາ, ຍັງມີໂຮງຮຽນຫຼາຍແຫ່ງຕັ້ງຢູ່ແຄມທາງ ແລະ ບໍ່ມີບ່ອນຈອດລົງພຽງພໍໃນເວລາຮັບສົ່ງລູກ-ຫຼານຜູ້ປົກຄອງໄດ້ນໍາລົດມາຈອດໄວ້ແຄມທາງເກີດມີການຈະລາຈອນຕິດຂັດຢູ່ຈຸດດັ່ງກ່າວຍັງເປັນບັນຫາທີ່ແກ້ໄຂໄດ້ຍາກ. ຕໍ່ກັບບັນຫານີ້ ເຈົ້າໜ້າທີ່ຕໍາຫຼວດຈະລາຈອນຈະໄດ້ປະສົມທົບກັບແຕ່ລະໂຮງຮຽນ ເພື່ອແກ້ໄຂ.

ຢ່າງໃດກໍດີ, ໃນໄລຍະສົກຮຽນໃໝ່ນີ້ ອາດເຮັດໃຫ້ສະພາບການສັນຈອນບໍ່ມີຄວາມສະດວກ ເພື່ອແກ້ໄຂບັນຫາດັ່ງກ່າວເຈົ້າໜ້າທີ່ຕໍາຫຼວດຈະລາຈອນ ຮຽກຮ້ອງຍັງຜູ້ໃຊ້ລົດ-ໃຊ້ຖະໜົນ ເປັນເຈົ້າການໃນການປະຕິບັດກົດລະບຽບການສັນຈອນທີ່ວາງອອກ, ຖ້າຫາກທຸກຄົນເປັນເຈົ້າການ ເຊື່ອແນ່ວ່າບັນຫາການສັນຈອນແອອັດໃນປັດຈຸບັນ ຄົງແກ້ໄຂໄດ້ ແລະ ອຸບັດຕິເຫດກໍຈະຫຼຸດລົງ.

LEAVE A REPLY

Please enter your comment!
Please enter your name here