ພົຕ ວັນທອງ ກອງມະນີ ຮອງ ລັດຖະມົນຕີ ຫົວໜ້າກົມໃຫຍ່ການເມືອງ ກະຊວງ ປກສ ໄດ້ຖະແຫຼງຂ່າວຕໍ່ສື່ມວນຊົນ ໃນວັນທີ 12 ກໍລະກົດນີ້ ກ່ຽວກັບປີສາມັກຄີມິດຕະພາບອັນຍິ່ງໃຫຍ່ 2 ວັນປະຫວັດສາດ ລາວ-ຫວຽດນາມ ຄື: ວັນສົນທິສັນຍາມິດຕະພາບຄວາມສາມັກຄີພິເສດ ການຮ່ວມມືຮອບດ້ານ ລາວ-ຫວຽດນາມ ຄົບຮອບ 45 ປີ (ວັນທີ 18 ກໍລະກົດ 1977-ວັນທີ 18 ກໍລະກົດ 2022) ແລະ ວັນສ້າງຕັ້ງສາຍພົວພັນການທູດ ຄົບຮອບ 60 ປີ (ວັນທິ 5 ກັນຍາ 1962-ວັນທີ 5 ກັນຍາ 2022).

ຕະຫຼອດໄລຍະຜ່ານມາ, ປະຊາຊົນ 2 ຊາດ ລາວ-ຫວຽດນາມ ໄດ້ຕົກຢູ່ໃນຊາຕາກຳອັນດຽວກັນ, ຖືກຈັກກະພັດຕ່າງດ້າວເຂົ້າມາຮຸກຮານ, ປະເທດຊາດເສຍຄວາມເປັນເອກະລາດ, ປະຊາຊົນບັນດາເຜົ່າຖືກກົດຂີ່ຂົ່ມເຫັງຢ່າງໜັກໜ່ວງແສນທໍລະມານ, ດ້ວຍນໍ້າໃຈຮັກເຊື້ອແພງຊາດ ກໍຄື ຜືນແຜ່ນດິນ ແລະ ຮັກບ້ານເກີດເມືອງນອນທີ່ຫວງແຫນອັນດູດດື່ມຂອງຕົນ, ດ້ວຍນໍ້າໃຈຄຽດແຄ້ນບໍ່ຍອມຈຳນົນຕໍ່ສັດຕູຜູ້ຮຸກຮານ, ປະຊາຊົນສອງຊາດ ໄດ້ພ້ອມກັນລຸກຂຶ້ນຕໍ່ສູ້ຕ້ານການຮຸກຮານຂອງຈັກກະພັດລ່າເມືອງຂຶ້ນແບບເກົ່າ ແລະ ແບບໃໝ່ ໄດ້ຮັບໄຊຊະນະຢ່າງພິລະອາດຫານ ແລະ ປົດປ່ອຍປະເທດຊາດອອກຈາກແອກປົກຄອງຂອງພວກຈັກກະພັດໄດ້ຢ່າງສົມບູນ.

ພາຍຫຼັງ 2 ປະເທດໄດ້ຮັບການປົດປ່ອຍ ກໍໄດ້ສືບຕໍ່ຊ່ວຍເຫຼືອເຊິ່ງກັນແລະກັນຢ່າງບໍ່ມີເງື່ອນໄຂ “ຄືໄມ້ຮ່ວມກໍ, ຄືປໍຮ່ວມເຊືອກ ແລະ ສຸກທຸກຮ່ວມກັນ” ພ້ອມກັນກ້າວເດີນຕາມເສັ້ນທາງທີ່ໄດ້ກຳນົດໄວ້ຢ່າງໜັກແໜ້ນ; ປະທານ ໄກສອນ ພົມວິຫານ ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ຟາມ ວັນດົງ ນາຍົກລັດຖະມົນຕີ ແຫ່ງ ສສ ຫວຽດນາມ ໄດ້ເຊັນສົນທິສັນຍາມິດຕະພາບ ແລະ ການຮ່ວມມືຂອງສອງປະເທດ ໃນວັນທີ 18 ກໍລະກົດ 1977; ຖືວ່າການພົວພັນມິດຕະພາບຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ ຍິ່ງໄດ້ຮັບການເພີ່ມພູນຄູນສ້າງ, ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ບໍ່ວ່າທາງດ້ານການເມືອງ, ເສດຖະກິດ, ວັດທະນະທຳ-ສັງຄົມ, ການປ້ອງກັນຊາດ-ປ້ອງກັນຄວາມສະຫງົບ, ການພົວພັນຕ່າງປະເທດ, ເຕັກນິກວິທະຍາສາດ ແລະອື່ນໆ ເຊິ່ງໄດ້ຮັບການຜັນຂະຫຍາຍ ແລະ ຈັດຕັ້ງປະຕິບັດມາເຖິງປັດຈຸບັນໄດ້ຮັບໝາກຜົນຢ່າງໜ້າຊື່ນຊົມ.

ການພົວພັນຮ່ວມມືຂອງ ກະຊວງປ້ອງກັນຄວາມສະຫງົບ ລາວ ແລະ ກະຊວງປ້ອງກັນຄວາມສະຫງົບ ຫວຽດນາມ ໃນໄລຍະຜ່ານມາ, ພວກເຮົາໄດ້ສືບຕໍ່ຮ່ວມມື ແລະ ປະສານສົມທົບກັນຢ່າງແໜ້ນແຟ້ນ ເພື່ອຮັບປະກັນສະຖຽນລະພາບທາງດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມຢູ່ປະເທດຂອງຕົນ ແລະ ພ້ອມກັນພັດທະນາເຂດຊາຍແດນຮອບດ້ານ ໂດຍສົມທົບກັບກອງທັບ, ອົງການປົກຄອງທ້ອງຖິ່ນ ເພື່ອປະກອບສ່ວນຍົກສູງລະດັບຊີວິດການເປັນຢູ່ຂອງປະຊາຊົນ ຕາມເຂດຊາຍແດນໃຫ້ນັບມື້ດີຂຶ້ນ ເວົ້າລວມ, ເວົ້າສະເພາະ ໃນໄລຍະ 5 ປີຜ່ານມາ ກະຊວງປ້ອງກັນຄວາມສະຫງົບ ລາວ ແລະ ກະຊວງປ້ອງກັນຄວາມສະຫງົບ ຫວຽດນາມ ໄດ້ພົວພັນຮ່ວມມືກັນຢ່າງຮອບດ້ານ ເຊິ່ງຕິດພັນກັບວຽກງານວິຊາສະເພາະ ແລະ ຊ່ວຍເຫຼືອເຊິ່ງກັນແລະກັນໃນຫຼາຍດ້ານ ເປັນຕົ້ນແມ່ນ:

ຂົງເຂດວຽກງານປ້ອງກັນຄວາມສະຫງົບທາງດ້ານການເມືອງ:

ສອງຝ່າຍໄດ້ຈັດກອງປະຊຸມ, ແຈ້ງສະພາບ ແລະ ແລກປ່ຽນຂໍ້ມູນ-ຂ່າວສານ ທີ່ພົວພັນເຖິງຄວາມສະຫງົບຂອງສອງປະເທດລາວ-ຫວຽດນາມ ເປັນຕົ້ນແມ່ນ ກົນອຸບາຍ, ເລ່ລ່ຽມ, ຮູບການ ແລະ ວິທີການເຄື່ອນໄຫວຂອງອິດທິກຳລັງປໍລະປັກ ແລະ ກຸ່ມຄົນບໍ່ດີເປັນປົກກະຕິ ຕິດພັນກັບການປະສານສົມທົບ ແລະ ແລກປ່ຽນດ້ານເຕັກນິກວິຊາສະເພາະຂັ້ນກະຊວງ, ກົມກອງວິຊາສະເພາະ ຕາມສາຍຕັ້ງທີ່ຕິດພັນກັບສະພາບຄວາມເປັນຈິງແຕ່ລະໄລຍະ; ນອກນັ້ນ, ສອງຝ່າຍໄດ້ຊີ້ນໍາກົມກອງ ແລະ ທ້ອງຖິ່ນຂອງຕົນ ຈັດຕັ້ງຜັນຂະຫຍາຍ ແລະ ປະຕິບັດສັນຍາຮ່ວມມືປະຈຳປີ ລະຫວ່າງສອງກະຊວງກຳນົດ ໄດ້ຮັບຜົນເປັນຢ່າງດີ.

ຂົງເຂດການປົກປັກຮັກສາຄວາມເປັນລະບຽບຮຽບຮ້ອຍທາງສັງຄົມ ແລະ ຮັບປະກັນຄວາມປອດໄພ ໃຫ້ພົນລະເມືອງຂອງຕົນ:

ສອງຝ່າຍໄດ້ມີການສະຫຼຸບ, ແລກປ່ຽນເຊິ່ງກັນແລະກັນກ່ຽວກັບຂໍ້ມູນ-ຂ່າວສານ ແລະ ບົດຮຽນ ໃນການຮັກສາຄວາມເປັນລະບຽບຮຽບຮ້ອຍທາງສັງຄົມຂອງສອງປະເທດ, ໄດ້ເພີ່ມທະວີຂອດການໂຄສະນາອົບຮົມພົນລະເມືອງຂອງຕົນ ໃນການເຄົາລົບ ແລະ ປະຕິບັດກົດໝາຍ ກໍຄື ລະບຽບການ ແລະ ຮີດຄອງປະເພນີອັນດີງາມຂອງປະເທດທີ່ຕົນອາໄສຢູ່ຢ່າງເຂັ້ມງວດ; ພ້ອມທັງເປັນເຈົ້າການປ້ອງກັນສະກັດກັ້ນ ແລະ ຕ້ານອາຊະຍາກຳຕ່າງໆ ມີຜົນສຳເລັດຢ່າງຕັ້ງໜ້າ; ໂດຍສະເພາະ, ການຮ່ວມມືແກ້ໄຂບັນຫາຢາເສບຕິດ, ການເຂົ້າ-ອອກເມືອງຜິດກົດໝາຍ ແລະ ດຳເນີນການສືບຄົ້ນຫາເປົ້າໝາຍກະທຳຜິດທີ່ສອງຝ່າຍແຈ້ງຕໍ່ກັນ ເພື່ອນຳໄປດຳເນີນຄະດີຕາມກົດໝາຍຂອງປະເທດຕົນ; ໄປຄຽງຄູ່ກັບການສ້າງເງື່ອນໄຂອຳນວຍຄວາມສະດວກ ແລະ ຮັບປະກັນຄວາມປອດໄພໃຫ້ພົນລະເມືອງຂອງສອງປະເທດ ເປັນຕົ້ນແມ່ນ ການໄປມາຢ້ຽມຢາມ ແລະ ພົບປະເຮັດວຽກຂອງຄະນະຜູ້ແທນຂັ້ນສູງ, ຄູ່ຮ່ວມມືຂອງສູນກາງ ແລະ ທ້ອງຖິ່ນ, ການສຶກສາຮໍ່າຮຽນ, ພັກຜ່ອນ, ປິ່ນປົວ, ທ່ອງທ່ຽວ, ດຳເນີນທຸລະກິດ ແລະອື່ນໆ ໃນປະເທດຂອງຕົນ ມີຄວາມຮັບປະກັນເປັນຢ່າງດີ.

ຂົງເຂດວຽກງານກໍ່ສ້າງກຳລັງ:

ສະເພາະ 5 ປີຜ່ານມານີ້, ກະຊວງປ້ອງກັນຄວາມສະຫງົບ ຫວຽດນາມ ໄດ້ໃຫ້ການຊ່ວຍເຫຼືອໃນການກໍ່ສ້າງກຳລັງປ້ອງກັນຄວາມສະຫງົບ ລາວ ໃນລະບົບຕ່າງໆ ເປັນຕົ້ນແມ່ນ ລະບົບປະລິນຍາເອກ, ປະລິນຍາໂທ, ປະລິນຍາຕີ, ການບຳລຸງວິຊາສະເພາະຕຳຫຼວດ ແລະ ກໍ່ສ້າງນັກຮຽນວັດທະນະທຳ ກະຊວງປ້ອງກັນຄວາມສະຫງົບ ລາວ ລວມ 1.638 ທຶນ, ນັບທັງການສົ່ງນັກຄົ້ນຄວ້າ, ອາຈານສາຍວິຊາສະເພາະ ແລະ ຄູສອນພາສາຫວຽດນາມ ມາແລກປ່ຽນ ແລະ ສິດສອນຢູ່ວິທະຍາຄານ ແລະ ໂຮງຮຽນໄດ້ຫຼາຍຊຸດ ເຊິ່ງເປັນການປະກອບສ່ວນກໍ່ສ້າງ ແລະ ພັດທະນາກຳລັງປ້ອງກັນຄວາມສະຫງົບ ລາວ ຂອງພວກເຮົາມີປະສິດທິຜົນກ້າວຂຶ້ນ; ນອກນີ້, ຍັງມີຫຼາຍຂົງເຂດວຽກງານທີ່ 2 ກະຊວງ ລາວ-ຫວຽດນາມ ໃຫ້ການຊ່ວຍເຫຼືອເຊິ່ງກັນແລະກັນ.