ກອງບັນຊາການ ປກສ ແຂວງຜົ້ງສາລີ ຈັດພິທີປະກາດເລື່ອນຊັ້ນໃຫ້ນາຍຕໍາຫຼວດ ແລະ ປະກາດນະໂຍບາຍໃຫ້ນາຍຕໍາຫຼວດພັກການຮັບອຸດໜູນບໍານານ ໃນວັນທີ 13 ກໍລະກົດ 2022 ຜ່ານມາ, ໂດຍມີ ພັອ ຄຳຈັນ ແສງລາວົງ ຫົວໜ້າກອງບັນຊາການ ປກສ ແຂວງ, ມີບັນດາຄະນະປະຈຳພັກ, ຄະນະພັກ-ຄະນະບັນຊາ ພ້ອມດ້ວຍ ຫົວໜ້າຫ້ອງ-ຮອງຫ້ອງ, ຕະຫຼອດຮອດພະນັກງານຫຼັກແຫຼ່ງອ້ອມຂ້າງ ກອງບັນຊາການ ປກສ ແຂວງ ເຂົ້າຮ່ວມ.

ພັທ ນາງ ວຽງຄຳ ຄຸນສົມເຮືອງ ຫົວໜ້າຫ້ອງການເມືອງ ກອງບັນຊາການ ປກສ ແຂວງ ໄດ້ຜ່ານຂອງ ກະຊວງປ້ອງກັນຄວາມສະຫງົບ ວ່າດ້ວຍ ການເລື່ອນຊັ້ນໃຫ້ນາຍຕໍາຫຼວດ ກອງບັນຊາການ ປກສ ແຂວງຜົ້ງສາລີ ເຊິ່ງໄດ້ເລື່ອນຊັ້ນດັ່ງນີ້:

  • ພັນຕີ ຂຶ້ນ ພັນໂທ 12 ສະຫາຍ ຍິງ 1 ສະຫາຍ
  • ຮ້ອຍເອກ ຂຶ້ນ ພັນຕີ 9 ສະຫາຍ ຍິງ 1 ສະຫາຍ
  • ຮ້ອຍໂທ ຂຶ້ນ ຮ້ອຍເອກ 18 ສະຫາຍ ຍິງ 3 ສະຫາຍ

ນອກນີ້, ຍັງໄດ້ຜ່ານຂໍ້ຕົກລົງເລກທີ 207/ປກສ ລົງວັນທີ 11 ກຸມພາ 2022 ວ່າດ້ວຍ ການອະນຸມັດໃຫ້ນາຍຕໍາຫຼວດພັກການຮັບອຸດໜູນບໍານານ, ໃນນີ້ ລັດຖະມົນຕີ ກະຊວງປ້ອງກັນຄວາມສະຫງົບ ຕົກລົງອະນຸມັດໃຫ້ ຮ້ອຍໂທ ບຸນຈັນ ສີຄົດ ພັກການຮັບອຸດໜູນບໍານານ.

ໃນໂອກາດດັ່ງກ່າວ, ພັອ ຄຳຈັນ ແສງລາວົງ ໄດ້ເນັ້ນໃຫ້ເອົາໃຈໃສ່ເພີ່ມທະວີຄວາມຮັບຜິດຊອບສູງຕໍ່ໜ້າທີ່ການເມືອງໃຫ້ຕົນ ເພາະວ່າການປະກາດເລື່ອນຊັ້ນໃນຄັ້ງນີ້ ແມ່ນເປັນການມອບໝາຍໜ້າທີ່ຂຶ້ນຕື່ມອີກບາດກ້າວໜຶ່ງ, ພ້ອມທັງຮຽກຮ້ອງໃຫ້ແຕ່ລະສະຫາຍ ສືບຕໍ່ຝຶກຝົນຫຼ່ໍຫຼອມຕົນເອງ ໃຫ້ກາຍເປັນພະນັກງານ-ນັກຮົບທີ່ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ດໍາລົງຊີວິດປອດໃສຂາວສະອາດ, ໃຫ້ສືບຕໍ່ປັບປຸງແບບແຜນວິທີເຮັດວຽກໃຫ້ດີຂຶ້ນກວ່າເກົ່າ, ມີຈິນຕະນາການປັບປຸງແບບແຜນວິທີເຮັດວຽກຢ່າງມີວິທະຍາສາດ ແທດເໝາະກັບສະພາບຕົວຈິງ ແລະ ສຸມໃສ່ຊີ້ນໍາ-ນໍາພາປັບປຸງໃຫ້ມີຄວາມໜັກແໜ້ນເຂັ້ມແຂງ ກາຍເປັນກໍາລັງປະຕິວັດ, ທີ່ມີແບບແຜນ ແລະ ທັນສະໄໝຂຶ້ນເທື່ອລະກ້າວ.