ໃນຕອນບ່າຍວັນທີ 13 ກໍລະກົດ 2022, ຄະນະນຳກົມໃຫຍ່ການເມືອງ ປກສ, ກອງບັນຊາການ ປກສ ແຂວງບໍລິຄຳໄຊ, ກົມຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ, ວິທະຍາຄານສັນຕິບານປະຊາຊົນ, ກົມຄົ້ນຄວ້າວິທະຍາສາດ ແລະ ປະຫວັດສາດ, ວິທະຍາຄານຕຳຫຼວດປະຊາຊົນ, ກົມສື່ສານ, ກອງບັນຊາການ ປກສ ນະຄອນຫຼວງວຽງຈັນ ໄດ້ນຳເອົາກະຕ່າດອກໄມ້ ແລະ ກະຕ່າຂອງຂວັນມອບໃຫ້ ພົຈວ ຟານ ແທັງ ຕວັນ ຫົວໜ້າອົງການຜູ້ຕາງໜ້າ ກະຊວງປ້ອງກັນຄວາມສະຫງົບ ສສ ຫວຽດນາມ ປະຈຳ ສປປ ລາວ ພ້ອມຄະນະ ເພື່ອເປັນການອວຍພອນເນື່ອງໃນໂອກາດປີສາມັກຄີມິດຕະພາບ ລາວ-ຫວຽດນາມ.

ການເຂົ້າອວຍພອນຂອງຄະນະນຳພາກສ່ວນຕ່າງໆ ອ້ອມຂ້າງ ກະຊວງ ປກສ ນອກຈາກຈະເປັນການສະຫຼອງເນື່ອງໃນໂອກາດດັ່ງກ່າວແລ້ວ ຍັງເປັນການສະຫຼອງ 2 ວັນປະຫວັດສາດ ຄື: ວັນເຊັນສົນທິສັນຍາມິດຕະພາບການຮ່ວມມື ລາວ-ຫວຽດນາມ ຄົບຮອບ 45 ປີ (18 ກໍລະກົດ 1977-2022) ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ (5 ກັນຍາ 1962-2022).

ແຕ່ລະພາກສ່ວນໄດ້ກ່າວສະແດງຄຳອວຍພອນມາຍັງ ທ່ານຫົວໜ້າອົງການຜູ້ຕາງໜ້າ ກະຊວງປ້ອງກັນຄວາມສະຫງົບ ສສ ຫວຽດນາມ ປະຈຳ ສປປ ລາວ ພ້ອມຄະນະ ຈົ່ງມີສຸຂະພາບແຂງແຮງ, ມີຄວາມຜາສຸກໃນຊີວິດຄອບຄົວ ແລະ ມີຜົນສຳເລັດໃນໜ້າທີ່ວຽກງານອັນມີກຽດສະຫງ່າທີ່ພັກ-ລັດ ມອບໝາຍໃຫ້ ແລະ ສືບຕໍ່ເພີ່ມທະວີສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ-ລັດ ແລະ ປະຊາຊົນສອງຊາດ ລາວ-ຫວຽດນາມ ເວົ້າສະເພາະແມ່ນຂອງກຳລັງປ້ອງກັນຄວາມສະຫງົບ ລາວ-ຫວຽດນາມ, ຫວຽດນາມ-ລາວ ໃຫ້ໝັ້ນຄົງຕະຫຼອດໄປ.

ເນື່ອງໃນໂອກາດອັນມີຄວາມໝາຍສຳຄັນ, ພົຈວ ຟານ ແທັງ ຕວັນ ໄດ້ສະແດງຄວາມຂອບໃຈຕໍ່ຄະນະນຳແຕ່ລະພາກສ່ວນໃນກຳລັງ ປກສ ລາວ ທີ່ເວລາໃດກໍໄດ້ເອົາໃຈໃສ່ປະສານສົມທົບກັບກຳລັງປ້ອງກັນຄວາມສະຫງົບ ຫວຽດນາມ ຮ່ວມມືກັນປະຕິບັດໜ້າທີ່ ແຕ່ລະຂົງເຂດວຽກງານວິຊາສະເພາະຢ່າງເປັນຮູບປະທຳ ແລະ ມີຜົນດີທີ່ສຸດ.