ກົມໃຫຍ່ພະລາທິການ ກະຊວງ ປກສ ໄດ້ຈັດພິທີປາຖະກະຖາມູນເຊື້ອສາຍພົວພັນມິດຕະພາບປີສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ວັນເຊັນສັນຍາມິດຕະພາບການຮ່ວມມື ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ໃນວັນທີ 14 ກໍລະກົດ 2022, ເປັນປະທານ ແລະ ປາຖະກະຖາໂດຍ ພົຈວ ທອງສຸກ ຍ່າເອີລາວລີ ຮັກສາການຫົວໜ້າກົມໃຫຍ່ພະລາທິການ ກະຊວງ ປກສ, ມີ ຄະນະພັກ-ຄະນະບັນຊາກົມກອງ ແລະ ພະນັກງານ-ນັກຮົບ ເຂົ້າຮ່ວມ.

ພົຈວ ທອງສຸກ ຍ່າເອີລາວລີ ໄດ້ຍົກໃຫ້ເຫັນຄວາມໝາຍ-ຄວາມສຳຄັນຂອງ ປີສາມັກຄີມິດຕະພາບ ລາວ-ຫວຽດນາມ, ວັນເຊັນສັນຍາມິດຕະພາບການຮ່ວມມື ຄົບຮອບ 45 ປີ ແລະ ວັນສ້າງຕັ້ງສາຍພົວການທູດ ຄົບຮອບ 60 ປີ ເຊິ່ງເປັນປະຫວັດສາດທີ່ມີມູນເຊື້ອສາຍພົວພັນມິດຕະພາບອັນຍິ່ງໃຫຍ່ ສະແດງອອກຫຼາຍເຫດການທີ່ສຳຄັນຂອງສອງພັກ-ສອງລັດ ກໍຄື ປະຊາຊົນສອງຊາດ ລາວ-ຫວຽດນາມ ໄດ້ຮ່ວມສາມັກຄີກັນຕໍ່ສູ້ຕ້ານພວກລ່າເມືອງຂຶ້ນແບບເກົ່າ ແລະ  ແບບໃໝ່ ເພື່ອກູ້ຊາດ, ກູ້ເອກະລາດຂອງສອງປະເທດໃນເມື່ອກ່ອນ.

ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ເຊິ່ງເປັນປັດໄຈທີ່ສຳຄັນຕັດສິນໄຊຊະນະຂອງການປະຕິວັດ ລາວ-ຫວຽດນາມ ໃນພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ກໍຄື ການສ້າງສາພັດທະນາຂອງສອງປະເທດໃນປັດຈຸບັນ.

ການປາຖະກະຖາໃນຄັ້ງນີ້ ກໍເພື່ອເປັນການໂຄສະນາສຶກສາອົບຮົມໃຫ້ນາຍ ແລະ ພົນຕຳຫຼວດ ມີຄວາມຮັບຮູ້ເຂົ້າໃຈຖືກຕ້ອງ, ເລິກເຊິ່ງ, ໜັກແໜ້ນ ພ້ອມທັງເປັນການຈາລຶກຄວາມສາມັກຄີພິເສດຂອງສອງພັກ, ສອງລັດ ແລະ ປະຊາຊົນສອງອ້າຍນ້ອງ ລາວ-ຫວຽດນາມ ທີ່ໄດ້ໃຫ້ການຊ່ວຍເຫຼືອເຊິ່ງກັນແລະກັນຕະຫຼອດມາ, ປົກປັກຮັກສາສາຍສຳພັນມິດຕະພາບສອງຊາດໃຫ້ໝັ້ນຄົງ ລາວ-ຫວຽດນາມ ຄືໃນປັດຈຸບັນ, ສືບຕໍ່ເສີມຂະຫຍາຍ ແລະ ປົກປັກຮັກສາໝາກຜົນຂອງມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ໄວ້ໃຫ້ໝັ້ນຄົງຍາວນານ,   ທັງເປັນເຈົ້າການຖະນຸຖະໜອມເພີ່ມພູນຄູນສ້າງມູນເຊື້ອດັ່ງກ່າວ ໃຫ້ຈະເລີນງອກງາມຍິ່ງຂຶ້ນ.